Ərzaq məhsullarının qiymətinin artması nəzərə alınaraq, cari ilin dövlət büdcəsində dəyişikliklərin edilməsi çərçivəsində 193 mln. manat məbləğində vəsaitin ərzaq təhlükəsizliyi üzrə ehtiyatın yaradılması üçün ayrılması nəzərdə tutulur. Bunu maliyyə naziri Samir Şərifov deyib.
Onun sözlərinə görə, bunun əsasında dövlət tərəfindən bu sahədə əlavə çevik tədbirlərin keçirilməsi nəzərdə tutulur:
"Hökumət tərəfindən, Azərbaycan Prezidentinin tapşırıqlarına uyğun olaraq, müəyyən antiinflyasiya tədbirləri hazırlanıb həyata keçirilməkdədir. Onların əksər hissəsi onunla bağlıdır ki, ilk növbədə Azərbaycana idxal olunan ərzaq məhsulları üzrə mövcud olan gömrük rüsum və müəyyən vergilərin aradan qaldırılmasıdır. Yəni bununla əlaqədar müvafiq qərarlar qəbul edilir. Bu qərarların icrası nəticəsində, hesab edirik ki, ən azı Azərbaycan hökumətinin payına düşən o məhsulların qiymətinin artımını aradan götürməklə, qiymətlərdə bir qədər azalma baş verəcək".
Elan edilən bu tədbirlərin görülməsi Azərbaycanda bahalaşmanın qarşısını ala biləcəkmi?
İqtisadçı Günay Hüseynova “Bakı-Xəbər”ə açıqlamasında bildirdi ki, koronavirus pandemiyası və onunla yanaşı Rusiya-Ukrayna müharibəsi ərzaq böhranını daha da gücləndirib, eyni zamanda problemin həllini mürəkkəbləşdirib: “Bu ilin ərzaq böhranı dünyada müşahidə olunan qiymətlərin sürətlə artması ilə özünü daha qabarıq şəkildə göstərir. Bununla yanaşı, Rusiya-Ukrayna müharibəsi çoxmilyonlu yeni qaçqınlar ordusu yaradıb və ərzaq böhranına əlavə problemlər qatıb. Bəzi ölkələrdə həyata keçirilən siyasət, bir sıra məhsulların ixracına qadağalar, tarif və rüsumlar ərzaq qiymətlərinin artmasına təsir edən səbəblər sırasındadır. Dünyada ərzaq qiymətlərinin kəskin bahalaşmasının ölkəmizdə işgüzar fəallığa, əhalinin rifahına və alıcılıq qabiliyyətinə mənfi təsirinin qarşısını almaq məqsədilə təxirəsalınmaz antiinflyasiya tədbirlərinin görülməsi işlərinə başlanıb. Bildirilir ki, bununla əlaqədar Nazirlər Kabineti tərəfindən fevral ayında müvafiq sərəncam imzalanıb. Nazirlər Kabinetinin qərarı ilə bir sıra malların istehsalı rüsumdan azad edilib. Həmin məhsulların əlavə dəyər vergisindən azad edilməsi istiqamətində təkliflər hazırlanaraq təqdim olunub. Həmçinin dünyada baş verən proseslərdə ölkəmizin ərzaq təhlükəsizliyinə potensial mənfi təsirinin qarşısını almaq məqsədilə Nazirlər Kabineti minimum istehlak səbətinə daxil olan bir sıra ərzaq məhsullarının ölkə ərazisindən çıxarılmasının tənzimlənməsini əzərdə tutan qərarlar qəbul edib. Maliyyə nazirinin elan etdiyi güzəştlər ərzaq qiymətlərinin ən azından bundan donra bahalaşmasının qarşısını ala bilər.
Birləşmiş Millətlər Təşkilatı ekspertlərinin proqnozlarına görə, Rusiya-Ukrayna müharibəsi dünyada ərzaq qıtlığına, bəzi ölkələrdə isə hətta aclığa səbəb ola bilər. Bir sıra alim və mütəxəssislərin fikrincə, 2022-2023-cü illərdə dünya qlobal ərzaq böhranı ilə üzləşəcək. Əsas səbəb kimi onu göstərirlər ki, Ukrayna ilə Rusiya günəbaxan yağı, buğda, eləcə də qarğıdalı, arpa və digər məhsullar bazarlarında xüsusi çəkiyə malikdir. Buna görə də, hökümət bu problemlərdən sığortalanmaq üçün əlindən gələn bütün tıxirəsalmaz işləri görməlidir”.
Məhəmmədəli QƏRİBLİ
