7 saylı Bakı “ASAN xidmət” mərkəzində “YAŞAT” fondunun fəaliyyətinə dair kütləvi informasiya vasitələrinin nümayəndələri üçün mətbuat konfransı təşkil olunub. Mətbuat konfransında müzakirə olunan məsələlərdən biri də istehlak kreditləri və digər borc öhdəliklərinin qarşılanması olub.
Qeyd edilib ki, istehlak kreditləri və digər borc öhdəliklərinin qarşılanması istiqaməti üzrə şəhid ailə üzvlərinin 832, itkin ailə üzvlərinin 3 və yaralıların 1 166 müraciəti olmaqla ümumilikdə 2 001 müraciət təmin edilib. Fondun təşəbbüsü ilə borc öhdəliyinin qarşılanması üzrə müəssisələr tərəfindən 125 926.74 AZN vəsait qarşılanıb.
“Fond yarandığı gündən etibarən Azərbaycan Respublikasının ərazi bütövlüyünün bərpası uğrunda yaralananlara və şəhid ailələrinə xüsusi diqqət və qayğı göstərir”
İqtisadçı Əli Əlirzayev qeyd etdi ki, “YAŞAT” Fondunun yaradılması ilk növbədə Azərbaycan dövlətinin humanizm prinsiplərinə sadiqliyinin, əhalinin sosial rifah halının daha da yaxşılaşdırılmasına sonsuz diqqətin, ölkəmizin ərazi bütövlüyünün müdafiəsi zamanı əlil olmuş hərbi qulluqçulara və şəhid olmuş şəxslərin ailə üzvlərinə xüsusi həssas münasibətin ən bariz nümunəsidir: “Fond yarandığı gündən etibarən Azərbaycan Respublikasının ərazi bütövlüyünün bərpası uğurunda yaralanan və şəhid ailələrinə xüsusi diqqət və qayğı göstərir. Ümumiyyətlə, Vətən və xalq naminə şəhid olan Vətən övladlarının ailələrinin sosial müdafiəsinin gücləndirilməsi, onların problemlərinin vaxtında həllinə nail olunması, hər cür qayğı ilə əhatə olunması ölkə Prezidenti İlham Əliyevin rəhbərliyi ilə həyata keçirilən siyasətin əsas və ən vacib istiqamətlərindəndir”.
Həmsöhbətimiz onu da əlavə etdi ki, Fondun fəaliyyət istiqamətlərindən biri də istehlak kreditləridir: “Qazi və şəhid ailələrinin 6 milyondan çox kredit borcu ödənilib. Bu rəqəm o deməkdir ki, Yaşat Fondu həmin ailələri həm maddi sıxıntıdan qurtarıb, həm də sosial vəziyyətlərinin yaxşılaşmasına şərait yaradıb. YAŞAT Fondunun yaradılmasından bugünə kimi görülən tədbirlərə və əldə edilən nəticələrə statistik rəqəmlər əsasında diqqət yetirməklə bir daha birliyimizin, həmrəyliyimizin, xalqımızın xeyirxahlıq və könüllülük prinsipinə sadiqliyinin şahidi olarıq”.
Günel CƏLİLOVA
