Baş nazir Əli Əsədov “Heyvan xəstəliklərinin diaqnostikası və profilaktikası üzrə baytarlıq tədbirlərinin həyata keçirilməsinə nəzarət edilməsi və bu məqsədlə hər bir heyvanı və ya heyvanlar qrupunu müşahidə etməyə imkan verən kənd təsərrüfatı heyvanlarının identikləşdirilməsinin aparılması Qaydası”nda dəyişikliklər edilməsi barədə Qərar imzalayıb.
Qərara əsasən, baytarlıq pasportunun alınması tələb olunmayacaq, hər heyvan üçün 20 manat dövlət rüsumu tutulmayacaq, heyvan ətinin maya dəyəri azalacaq. Bir heyvan üçün maliyyə yükü 25 manat azalacaq.
Bəs, görəsən bu dəyişikliklər ətin qiymətinə təsir edəcəkmi? Yeni qaydalar tətbiq edildikdən sonra hər hansı qiymət azalması müşahidə olunacaqmı?
Xalid Kərimli: “Xərclərin aşağı düşməsi qiymətlərə eyni qədər təsir göstərəcək”
İqtisadçı-ekspert Xalid Kərimli bildirdi ki, xərclərin aşağı düşməsi qiymətlərə eyni qədər təsir göstərəcək: "Çünki fermerlər ciddi surətdə xərc artımı ilə üzləşib. İndiki qərar müəyyən qədər qiymətlərin aşağı düşməsinə səbəb olacaq. Bu qərar, ən əsası, ətin satış qiymətinin qalxmasının qarşısını alacaq”.
Natiq Cəfərli: “Bu qərar qiymətin aşağı düşməsinə səbəb olmayacaq”
Iqtisadçı Natiq Cəfərli isə fərqli düşünür. Onun fikrincə, bu qərar qiymətin aşağı düşməsinə səbəb olmayacaq.
Onun sözlərinə görə, Nazirlər Kabineti “Heyvan xəstəliklərinin diaqnostikası və profilaktikası üzrə baytarlıq tədbirlərinin həyata keçirilməsinə nəzarət edilməsi və bu məqsədlə hər bir heyvanı və ya heyvanlar qrupunu müşahidə etməyə imkan verən kənd təsərrüfatı heyvanlarının identikləşdirilməsinin aparılması Qaydası”nda dəyişikliklə bağlı qərar elan edilən kimi ətin satış qiymətinə təsir etməyəcək: “Qərar pozitiv addımdır, ən azından maldarlıqla (saxlanması və satışı) məşğul olan fermerlərin canını mənasız kağız-kuğuz işindən qurtaracaq. Reallığa gələndə isə hər bir xırda və iribuynuzlu mal-qara üçün təyin edilmiş 20 manatlıq rüsum ləğv edilir. Yəni 20 kq ət verən qoyun-qoç üçün bu rüsumun ləğvinin qiymətlərdə 1 manata yaxın təsiri ola bilər, amma 200 kq-lıq dananın ət qiymətlərinə hər kq-da 10 qəpik, 400 kq-lıq malın ət qiymətlərinə isə hər kq-da 5 qəpik təsir edə bilər. Vəssalam! Amma nəzərə alın ki, mal-qara üçün təbii yem bazası azalıb, payız-qış aylarında isə satılan yemin qiyməti kəskin artıb və biz hələ də daxili tələbatı ödəyə bilmirik deyə Gürcüstandan diri mal-qara idxal edirik. Yəni “Nazilər Kabinetinin son qərarı əti ucuzlaşdıracaq” yanaşması doğru deyil”.
Günel CƏLİLOVA
