Rusiyanın iri market şəbəkələri Azərbaycandan ildə 6-8 milyon yumurta idxalı üçün təklif göndəriblər. Təklifi dəyərləndirmək üçün hazırda Azərbaycan Qida Təhlükəsizliyi Agentliyi ilə sənədləşmə işlərinin sürətləndirilməsi istiqamətində işlər aparılır. Sənədlər qaydasına salındıqdan sonra Rusiyaya yumurta ixrac ediləcək. Belə bir məlumat yayılıb ki, Azərbaycan Rusiyaya yumurta ixrac edərsə ölkədə qeyd edilən ərzaq növü üzrə qıtlıq müşahidə olunacaq və bu, qiymətin yüksəlməsinə səbəb olacaq.
Maraqlıdır, yumurtanın ixracı daxili bazarda qiymətə necə təsir edəcək? Ümumiyyətlə, bu proses yerli bazarda hansı dəyişikliklərə səbəb olacaq?
“Azərbaycan Quş əti, Yumurta İstehsalçıları və İxracatçıları Assosiasiyası” İctimai Birliyinin sədri Mürvət Həsənli media nümayəndələrinə açıqlamasında bildirib ki, yumurta ilə bağlı heç bir problemimiz yoxdur: “Azərbaycanda süfrə yumurtasına gündəlik tələbat, təxminən 3 milyon 600 min ədəddir. Bundan 20-30 faiz də artıq istehsal edirik. Təxmini 5,2-5,3 milyon civarında istehsalımız var. Rusiyanın iri market şəbəkələri isə illik 6 milyon 800 min yumurta istəyir. Əgər müqavilə bağlanarsa, onlara veriləcək yumurta artıqlaması ilə var”.
“Yumurta tək-tük ərzaqlardandır ki, Azərbaycan öz bazarını tam olaraq təmin edir”
Iqtisadçı Kamran Məmmədli bildirdi ki, yumurtanın daxili bazarı ödəmək səviyyəsi 100 faizdir: "Yumurta tək-tük ərzaqlardandır ki, Azərbaycan öz bazarını tam olaraq təmin edir. 2020-ci ildə Statistika Komitəsi tərəfindən yayılan məlumata əsasən, illik 2 milyarda qədər yumurta istehsal olunub. Daxili bazarın da tələbi 1,7-1,8 milyard ədəd olub. Yumurtanın istehsalı və daxili bazarı ödəmək səviyyəsi 100 faizdir. Tələbatı ödəmək üçün xaricdən idxal olunmur. Ancaq yerli istehsalla təmin edilir.
Həmsöhbətimiz onu da əlavə etdi ki, istehsalla əlaqədar olaraq, xərclər ciddi surətdə artıb. Bu vəziyyət fermerləri narahat edir: "Yumurtanı istədiyi qədər sata bilmədiyinə görə, fermerlər əziyyət çəkir və gəlir itkisinə məruz qalırlar.
Iqtisadçının sözlərinə görə, Rusiyaya yumurta ixracı əlavə gəlir deməkdir. Yox, əgər yerli istehsal ölkənin tələbatını ödəyəcək səviyyədə deyilsə və sırf Rusiyada yumurta bahadır deyə oraya ixracat nəzərdə tutulubsa, bu, əlavə problemlər yarada bilər.
Günel CƏLİLOVA
