Avtomobil qəzalarında ortaya çıxan ən aktual problemlərdən biri icbari sığorta məsələsidir. Hər il müəyyən məbləğdə pul ödənilən sığorta şirkətləri bəzən heç bir əsası olmadan ödəniş etməkdən imtina edirlər. Bəzən də həmin proses o qədər uzanır ki, sürücülərin vaxtı sadəcə sənəd toplamaqla keçir.
Hətta elə sığorta şirkətləri də var ki, avtomobilin təmir olunması üçün lazım olan məbləğin cüzi bir hissəsini verərək məsuliyyətdən yayınırlar. Bəzən də sırf vətəndaşların qanunları az bilməsindən istifadə edilir. Məlumdur ki, avtoqəza zamanı hadisə yerinə sığorta şirkətinin nümayəndəsi gəlir. Qəza zamanı sığorta şirkətləri ekspert kimi şirkətin ekspertlərini çağırırlar. Müstəqil ekspertlərin hadisə yerinə cəlb olunmasına qarşı çıxırlar. Avtomobil sahibi hadisə yerinə müstəqil ekspert dəvət etməkdə sərbəst olsa da, sığorta şirkətləri məbləğin çox hesablanmaması üçün şirkətin ekspertini qəza yerinə çağırırlar.
Qeyd edək ki, Mərkəzi Bankın reyestrində olan müstəqil sığorta ekpertlərinin fəaliyyəti "Sığorta Fəaliyyəti haqqında" qanunda nəzərdə tutulur. Sığort şirkəti ilə vətəndaşlar arasında yaranan narazılığın aradan qaldırılması üçün hər iki tərəfin ortaq razılığı ilə müstəqil ekspert cəlb olunur. Müstəqil ekspertləri Mərkəzi Bank rəsmi şəkildə öz reyestrinə daxil edir.
“Sığorta şirkətləri hiyləyə əl ataraq, siyahıya işləməyən sığorta ekspertləri və öz yaxın adamları olan ekspertlərin adını daxil edirlər”
Sığorta eksperti İlkin İbrahimov qeyd etdi ki, sığorta hadisələri zamanı tərəflər arasında yaranan mübahisələrin həll olunması və ortaq mövqenin tapılması üçün məhkəmədən öncə müstəqil sığorta ekspertinin cəlb edilməsi vacibdir: “Mərkəzi Bankın ekspertlərlə bağlı reyestrində olan ekspertlərin fəaliyyətinin yoxlanılması mexanizmi demək olar ki, yoxdur. Həmin reyestrdə adı olan mütəxəssislərin çoxu aidiyyəti üzrə fəaliyyətlərini davam etdirməsələr də adı müstəqil ekspert kimi Mərkəzi Bankın reyestrində saxlanılır. Bu hal da bir sıra problemlərin yaranmasına gətirib çıxarır. Belə ki, bəzi sığorta şirkətləri bu haldan xəbərdar olduqları üçün yaranmış vəziyyətdən öz xeyirləri üçün sui-istifadə edirlər. Sığorta mübahisəsi yaranan zaman müstəqil ekspertin cəlb olunmasına ehtiyac olanda tərəflərin qarşısına həmin adı reyestrdə olsa da sığorta ekperti kimi fəaliyyət göstərməyən şəxslərin ad-familyasından ibarət siyahı qoyulur. Sığorta şirkətləri hiyləyə əl ataraq, siyahıya işləməyən sığorta ekspertləri və öz yaxın adamları olan ekspertlərin adını daxil edirlər. Nəticədə sığortalı sığorta şirkətinin istədiyi eksperti seçir”.
Ekspert hesab edir ki, Mərkəzi Bank tənzimləyici orqan olaraq bu məsələlərin uyğun həllini həyata keçirsə, sığorta bazarında mübahisələrin sayı çox böyük həcmdə azala bilər.
Günel CƏLİLOVA
