“Bugünkü geosiyasi vəziyyəti nəzərə alsaq, aydın olur ki, Azərbaycanın enerji resurslarına ehtiyac heç vaxt olmadığı qədər böyük olacaq”. Bunu Prezident İlham Əliyev Bakıda Heydər Əliyev Mərkəzində Azərbaycan-Litva biznes forumunda çıxışı zamanı deyib.
Ölkə başçısının sözlərinə görə, bu gün Azərbaycan öz enerji təhlükəsizliyini 100 faiz təmin edir: “Və bir çox digər ölkələrin, o cümlədən Avropa İttifaqının üzvlərinin də enerji təhlükəsizliyini təmin edir. Biz neft, qaz, elektrik enerjisi, neft-kimya məhsulları ixrac edirik”.
Dövlət başçısı qeyd edib ki, bizim planlarımıza qazın, elektrik enerjisinin və neft-kimya məhsullarının ixracını böyük həcmdə artırmaq daxildir: “Neft ixracına gəldikdə, ixracın bugünkü profili bizi və istehlakçıları qane edir. Eyni zamanda, bugünkü geosiyasi vəziyyəti nəzərə alsaq, aydın olur ki, Azərbaycanın enerji resurslarına ehtiyac heç vaxt olmadığı qədər böyük olacaq. Bu il biz artıq Azərbaycanla Avropa İttifaqı arasında enerji dialoquna başlamışıq. O, bir çox sahələri - neft, qaz, elektrik enerjisi, hidrogen və bərpaolunan enerji mənbələrini əhatə edir”.
Görünən odur ki, Rusiyanın Ukraynaya təcavüzündən sonra Azərbaycanın enerji təchizatında Avropa üçün önəmi daha da artıb.
“Bu da ölkəmizin geosiyasi və geoiqtisadi mövqeyinin daha da güclənməsinə gətirib çıxarır”
Məsələyə münasibət bildirən millət vəkili Vüqar Bayramovun fikrincə, bütün bunlar təsadüfi deyil: “Çünki Azərbaycan Avropanın enerji təchizatında xüsusi paya malik olan ölkələrdəndir. Nəzərə almaq lazımdır ki, biz bir tərəfdən Bakı-Tbilisi-Ceyhan kəməri ilə Avropaya neft nəql edirik, digər tərəfdən 2020-ci ilin dekabrından Azərbaycan qazını Avropaya ixrac edirik. Ötən il Azərbaycan Avropaya 9 milyard kubmetrə yaxın qaz ixrac edib. Bu il bunun 10 milyard kubmetrdən artıq olacağı gözlənilir. O üzdən, Azərbaycanın Avropanın enerji təhlükəsizliyində rolu artmaqdadır. Gözlənilir ki, bu tendensiya növbəti illərdə də davam edəcək. Çünki Cənub Qaz Dəhlizi çərçivəsində Azərbaycan ikinci mərhələdə Avropaya 20 milyard kubmetrə yaxın mavi qaz ixrac etmək imkanına malik olacaq. Bu da Azərbaycanın geosiyasi və geoiqtisadi mövqeyinin daha da güclənməsinə gətirib çıxarır. Nəticə etibari ilə Azərbaycanla Avropa İttifaqı arasında əməkdaşlığın, o cümlədən iqtisadi və ticari tərəfdaşlığın növbəti illərdə daha da dərinləşəcəyi gözlənilir. Bununla yanaşı, digər enerji ixrac edən ölkələrin də Azərbaycanın tranzit imkanlarından istifadə edəcəyi gözlənilir. Bu isə o deməkdir ki, Azərbaycan üzərindən Avropaya daha çox enerji resursu ixrac olunacaq. Başqa bir tərəfdən nəqliyyat yükdaşımalarda da Azərbaycanın tranzit imkanlarından geniş istifadə olunması qaçılmazdır. Şərqdən Qərbə və əks istiqamətdə yüklərin daşınması ölkəmizin tranzit gəlirlərini artıracaq”.
Bir sözlə, millət vəkili hesab edir ki, Azərbaycanın Avropa üçün önəmi daha da artacaq.
Vidadi ORDAHALLI
