Ağstafa şəhər Mənzil Kommunal Təsərrüfatı Birliyinin (MKTB) tender elanı yayımlanandan sonra yaranan şirkəti qalib elan etməsi sosial şəbəklələrdə geniş müzakirə mövzusuna çevrilib. Belə ki, Ağstafa MKTB ümumilikdə 47 min manat dəyərində olan son 3 satınalma müqaviləsini həmin şirkətlə bağlayıb. Etender.gov.az saytında dərc olunan məlumata görə, tenderlərin qalibi “Palma-Z” MMC (VÖEN – 3601462631) olub.
Tender müsabiqəsinin şərtlərinə görə, “Palma-Z” MMC Ağstafa şəhər Mənzil Kommunal Təsərrüfatı Birliyinə 21 min 640 manat dəyərində nəqliyyat vasitələrinin cari təmiri üçün ehtiyat hissələri, 13 min 190 manat dəyərində elektrik mal-materialı, 12 min 958.5 manat dəyərində isə işçi ləvazimatları və mal-materialın alınmasını təşkil edəcək. Tender müsabiqəsinin qalibi olan “Palma-Z” MMC 05.04.2022-ci il tarixində dövlət qeydiyyatına alınıb. Qeyd edək ki, "Dövlət satınalmaları haqqında" Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığın, təcrübənin, texniki və maliyyə imkanların, işçi qüvvəsinin, idarəetmə səriştəsinin, etibarlılığın olması lazımdır.
Belə olan halda, tender elan olunduğu gündən bir gün sonra yaranan şirkətin hansı təcrübəsinin olacağı aydın deyil.
Ağstafa RİH: “Satınalan təşkilat tenderdə iştirak etmək istəyən iddiaçı təşkilata məhdudiyyət qoya bilməz”
Məsələ ilə bağlı Ağstafa rayon İcra Hakimiyyətindən bildirildi ki, kotirovka sorğusu “Dövlət satınalmaları haqqında” Azərbaycan Respublikasının Qanununa əsasən Ağstafa Rayon İcra Hakimiyyəti tərəfindən deyil Ağstafa şəhər Mənzil Kommunal Təsərrüfatı Birliyi tərəfindən verilib: “Nəzərinizə çatdırırıq ki, qeyd olunan bütün əməliyyatlar müraciət etmiş iddiaçılar tərəfindən aydın şəkildə izlənilə bilir. Əgər iddiaçılar tərəfindən hər hansı bir şikayət məktubu əsasında narazılıq irəli sürülərsə, işə yenidən baxılır. Heç bir halda rəsmi qeydə alınmamış işlə bağlı maliyyələşmə açılmır. Satınalmaların düzgün həyata keçirilməsinin araşdırılması səlahiyyəti yerli icra hakimiyyəti başçısına deyil, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə aiddir. Satınalan təşkilat tenderdə iştirak etmək istəyən iddiaçı təşkilata məhdudiyyət qoya bilməz".
Natiq Cəfərli: “Bu sahədə qanunvericiliyin aşkar şəkildə pozulması görünürsə, təbii ki, tenderlərlə bağlı şəffaflığın artırılmasına ehtiyac var”
İqtisadçı-ekspert Natiq Cəfərli qeyd etdi ki, qanunvericiliyə görə, ümumiyyətlə, həmin şirkət tenderi uda bilməz: ““Dövlət satınalmaları haqqında” qanunda aydın şəkildə qeyd olunub ki, tenderdə iştirak edən və qalib olan şirkətlərin həmin sahədə bəlli təcrübəsi olmalıdır. Əvvəllər qanunda 3 il təcrübənin olması qeydi var idi, lakin bir neçə il öncə o cümlə yığışdırıldı. Təcrübənin olması isə yenə də qanunda var. Yeni, hətta tenderdən sonra yaranmış şirkətin hansı təcrübəsi ola bilər? Bu sahədə qanunvericiliyin aşkar şəkildə pozulması görünürsə, təbii ki, tenderlərlə bağlı şəffaflığın artırılmasına ehtiyac var. İndiki elektron və onlayn formada bir sıra məsələrin həlli varsa, tenderlər niyə onlayn qaydada şəffaf keçirilməsin? Bir çox ölkələrdə tenderlər televiziya vasitəsilə canlı yayımlanır. Hesab edirəm ki, Azərbaycana bu təcrübəni gətirmək lazımdır. Tenderlər şəffaf keçirilməli, rəqabətli olmalı və bu məsələ ilə bağlı illərdir yaranan problemlər aradan qaldırılmalıdır”.
Günel CƏLİLOVA
