Eyyub Hüseynov: “Bu həm qanun pozuntusudur, həm də istehlakçı hüquqlarının pozulması deməkdir”
Nağd alırsansa endirim var, kartla ödəniş edirsənsə yox. Bakıda satışla məşğul olan bir çox ictimai iaşə, müxtəlif ticarət obyektləri yeni fırıldaq üsuluna keçiblər. Məhsul endirimlə satılsa da, bu, kartla ödniş edənlərə şamil olunmur. Nağd alırsansa endirim var, kartla alırsansa endirim edə bilməzsən. Yəni pos-terminalla ödəniş etdikdə endirim edilmir. Açıq şəkildə deyirlər ki, kartla ödəniş etsəniz endrimdən yararlana bilməyəcəksiniz.
Prinsip etibari ilə ticarət obyekti vergi ödəyicisidirsə, o zaman endirimlə məhsul satanda hansısa fərq olmamalıdır. Hər iki halda müştəri endirimdən yararlanmalıdır. Təbii ki, sahibkarların endirim etmək səlahiyyəti var, amma bundan sui-istifadə etməməlidirlər. Hətta pos-terminallarla bağlı yaranan problem belə onları bu haldan sığortalamır. Hazırda kredit kartı təqdim edən banklar nağdsız ödənişlərin edilməsi zamanı müştəriyə alternativ üstünlüklər qazandırmağa çalışırlar. Bütün bunlar isə nağdsız ödənişlərin stimullaşdırılması məqsədi ilə edilir. Bu da vətəndaşa bir sıra xidmət obyektlərində məhsulları daha endirimli və imtiyazlı şərtlərlə əldə etməsinə imkan verir. Ancaq görünən odur ki, satışla məşğul olan obyektlr vətənaşları bu imkanlardan məhrum edir. Nağdsız ödənişlə məhsul alan vətəndaş endirimdən məhrum edilir. Bütün bunlar nə dərəcədə doğrudur?
- “Ticarət və iaşə obyektlərində dövlətin qanunları boykot olunmaqdadır”
Məsələyə münasibət bildirən Azad İstehlakçılar Birliyinin sədri Eyyub Hüseynovun fikrincə, kartla ödəniş edən müştərilərin endirimdən məhrum edilməsi yolverilməzdir: “Bu, həm qanun pozuntusudur, həm də istehlakçı hüquqlarının pozulması deməkdir. Ümumiyyətlə, ticarət və iaşə obyektlərində dövlətin qanunları boykot olunmaqdadır. Dəfələrlə müraciət etmişik ki, Nazirlər Kabineti ticarət obyektləri ilə bağlı qaydalar hazırlamalıdır. Çünki istehlakçı içəri girəndə ona potensial oğru kimi yanaşırlar və s. Dəfələrlə bununla bağlı İqtisadiyyat Nazirliyi qarşısında məsələ qaldırmışıq. Deyiblər ki, onların öz ərazisidir, özləri bilər. O cümlədən, endirimlə bağlı yanaşma qanun pozuntusudur. Necə yəni nağd alırsansa endirimdən yararlan, kartla alırsansa olmaz? Bu, əslində həm də istehlakçıların aldadılması deməkdir. Ona görə də belə hallara qarşı mübarizə gücləndirilməlidir”.
AİB sədri onu da əlavə etdi ki, belə hallar baş verərsə, vətəndaşlar 195 qaynar xəttinə müraciət etməlidir.
Vidadi ORDAHALLI
