“Hazırda biz işğaldan azad edilmiş ərazilərdə kənd təsərrüfatının inkişafının planlaşdırılması mərhələsindəyik”. Bunu Prezident İlham Əliyev BMT-nin Ərzaq və Kənd Təsərrüfatı Təşkilatının (FAO) baş direktoru Qu Donqyunu videoformatda qəbul edərkən deyib.
Ölkə başçısının sözlərinə görə, qarşıdakı illərdə Azərbaycan FAO ilə səmərəli tərəfdaşlığı davam etdirəcək: “Xüsusilə indi - hər bir ölkə, o cümlədən Azərbaycan üçün ərzaq təhlükəsizliyi ilə bağlı məsələlərin getdikcə daha çox əhəmiyyət kəsb etdiyi bu çətin zamanda. Çünki kənd təsərrüfatı məhsullarının ixracında artım olduğuna baxmayaraq, biz hələ də kənd təsərrüfatı məhsullarını idxal edirik. Görüşümüz zamanı qaldırmaq istədiyim məsələlərdən biri də işğaldan azad edilmiş ərazilərdə kənd təsərrüfatının inkişafı ilə bağlı planlarımızdır. Azərbaycan ərazilərinin işğaldan azad edilməsi nəticəsində hazırda biz infrastrukturun, o cümlədən kənd təsərrüfatının inkişafı baxımından həmin torpaqların işlənilməsinin aktiv mərhələsindəyik. Çünki işğaldan azad edilmiş ərazilərdə kənd təsərrüfatı potensialı həqiqətən də çox böyükdür. Bu ərazinin fərqli təbiəti, iqlim qurşaqları və həm yerli istehlak, həm də ixrac üçün istehsalımızı əhəmiyyətli dərəcədə artırmaq imkanı var. Hazırda biz işğaldan azad edilmiş ərazilərdə kənd təsərrüfatının inkişafının planlaşdırılması mərhələsindəyik və ona görə də sizin dəyərli tövsiyələriniz yüksək qiymətləndiriləcək”.
Görünən odur ki, işğaldan azad edilmiş rayonlarda çox ciddi aqrar layihələrin həyata keçirilməsi gözlənilir. O baxımdan bütün bunların perspektivini ekspertlər necə dəyərləndirir?
Məsələyə münasibət bildirən iqtisadçı alim, professor Əli Əlirzayevin fikrincə, ölkə başçısının işğaldan azad edilən rayonların aqrar potensialı ilə bağlı dəyərləndirməsi çox ciddi əsaslara söykənir: “Çünki həmin ərazilər məhsuldarlığına, iqlim şəraitinə, məhsul çeşidinə görə çox əhəmiyyətli potensiala malikdir. Kəlbəcər, Laçın, Qubadlı heyvandarlıq, Zəngilan, Cəbrayıl, Xocavənd, Füzuli və Ağdam rayonları əkinçilik üzrə çox ciddi potensiala malikdir. Düzgün inkişaf strategiyası qəbul olunarsa və yüksək aqrotexniki qulluq təmin edilərsə, çox böyük məhsuldarlıq əldə etmək mümkündür. Bununla bir sıra ərzaq məhsullarına olan tələbatı həm daxili istehsal hesabına təmin etmək mümkün olacaq, həm də müəyyən məhsulların ixracını artırmaq olar. Nəzərə alsaq ki, bir sıra səbəblərdən dünyada kənd təsərrüfatı məhsullarının qiyməti artır, o baxımdan bu istiqamətdə işlərin sürətləndirilməsi çox vacibdir. Bir sıra amillər imkan verir ki, azad olunan rayonlarda aqrar istehsalı artıraq. Birincisi, neft gəlirləri hesabına maliyyə imkanlarımız artıb. İkincisi, məhsuldarlığı artırmaq üçün müasir innovativ aqrotexniki üsullar mövcuddur. Üçüncüsü, Azərbaycan əlverişli coğrafi məkanda yerləşir. Çoxşaxəli nəqliyyat infrastrukturuna malikdir. Ona görə də azad edilən rayonların aqrar potensialına daha çox güvənmək olar. Prezidentin səsləndirdiyi fikirlər ciddi təhlillərə və statistik hesablamalara əsaslanır. Bu baxımdan qarşıdakı illərdə ciddi məhsul bolluğu əldə etmək mümkündür”.
Professor onu da əlavə etdi ki, görülən işlər yaxın illərdə öz səmərəsini verəcək.
Vidadi ORDAHALLI
