Azərbaycan startaplarından biri olan Bankoff Rusiya vətəndaşlarına maliyyə əməliyyatları aparmağa şərait yaratdığına görə ABŞ tərəfindən sanksiyaya məruz qalıb. Problem ondadır ki, şirkətin öz resursları və hesabında olan fərdi şəxslərin vəsaitləri dondurulub. Habelə, Viza və Stripe kimi qlobal ödəniş sistemləri startapın kartlarına xidmət göstərməyi dayandırıb. Nəticədə həm Azərbaycan, həm də digər ölkələrin vətəndaşlarının külli miqdarda vəsaitinin taleyi naməlumdur.
Bankoff-un öz resurslarının da bloklandığı bildirilir. Problemlə bağlı Bankoff da müştərilərinə məlumat verib. Məlumat üçün qeyd edək ki, Bankoff 2020-ci ildə fəaliyyətə başlayıb. İnternet üzərindən virtual kartlar təqdim edən bir servisdir. Belə baxanda, Rusiya iş adamlarının, şirkətlərinin çoxu Ermənistana köçüb. Bir sıra işlər Ermənistan üzərindən görülür. Ancaq nədənsə,onlara qarşı bu kimi sanksiyaların tətbiqi müşahidə olunmur.
O baxımdan bütün bunları ekspertlər necə dəyərləndirir?
“Startapın çoxsaylı kartlarının alınması xaricdə diqqət çəkib və hesab ediblər ki, belə bir artım ancaq Rusiya amili ilə bağlı ola bilər”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, Azərbaycandakı startapların belə sanksiyaya məruz qalma ehtimalı var idi: “Məsələ ondadır ki, Rusiyaya tətbiq olunan sanksiyalar üzündən Birləşmiş Ştatlar bir sıra ölkələrdə maliyyə əməliyyatlarının istiqamətini izləyir. Onlar yaxşı bilir ki, Rusiya vəziyyətdən çıxmaq üçün postsovet ölkələri üzərindən bir sıra maliyyə əməliyyatları aparır, iş adamları orada biznesini qurur və s. Çünki Rusiyaya sanksiyalar tətbiq ediləndə birdən-birə Bankoff un müştərilərinin sayının 10 dəfə artdığı bildirilirdi. Qlobal yazışmaları izləyəndə proqnozlaşdırmaq olurdu ki, Bankoff bu qaydada, kütləvi olaraq ruslara kartlar verməkdə davam edərsə problem olacaq. Təəssüf ki, gözlənilən baş verdi. Bundan təkcə ruslar yox, orada yaşayan, işləyən azərbaycanlılar da kütləvi istifadə etməyə başladılar. Startapın çoxsaylı kartlarının alınması xaricdə diqqət çəkib və hesab ediblər ki, belə bir artım ancaq Rusiya amili ilə bağlı ola bilər. Bu səbəbən sanksiyaların tətbiqi gözlənilən idi. Visa və Stripe təsir edərək startapımıza qarşı sanksiya tətbiq etdiriblər. Bütün bunlar istər-istəməz müəyyən problemlər yaradacaq. Sanksiyalar götürülənə qədər həmin vəsaitlərdən istifadə etmək mümkün olmayacaq. Ümumən, bundan sonra Rusiya ilə bu kimi maliyyə əməliyyatlarında ehtiyatlı olmaq lazımdır. Əks təqdirdə Azərbaycan da sanksiyaların hədəfinə çevrilə bilər. Nəzərə almaq lazımdır ki, başda ABŞ olmaqla Qərb bununla bağlı digər ölkələrə xəbərdarlıq edir. Ukraynada müharibə uzanacaqsa, sanksiyalarla bağlı tələblər daha da sərtləşəcək. Rusiya ilə qonşu olan ölkələrlə bağlı tələblər artacaq”.
Bu baxımdan ekspert hesab edir ki, Azərbaycan bu kimi məsələlərdə diqqətli olmalıdır.
Viadi ORDAHALLI
