Məşhur “Relax” hadisəsi bir daha deputatların və bəzi məmurların biznes şəbəkəsinin mövcudluğunu təsdiqləmiş oldu. İş burasındadır ki, qanunvericilik bu kateqoriyadan olan adamlara bizneslə məşğul olmağı qadağan edir. Praktika göstərir ki, belə adamlar məsuliyyətdən yayınmaq üçün əsasən bizneslərini çox yaxın adamlarının adına rəsmiləşdirirlər. “Relax” hadisəsində bu amil də üzə çıxdı və nəticədə millət vəkilinin oğlu və bir neçə qohumu barəsində həbs qətiimkan tədbiri seçildi.
Sosial şəbəkələrdə yayılan və bəzi elektron KİV-lərin təqdim etdiyi müstəqil jurnalistlərə məxsus araşdırma materiallarından görünür ki, bəzi millət vəkillərinin xarici ölkələrdə də böyük biznes şəbəkəsi var. Həmin araşdırma materialları sadəcə sözdən ibarət olsaydı, hardasa qərəzli və ya sifarişlə yazıldığı qənaətinə gələ bilərdik. Ancaq ortaya konkret sənədlər, fotolar, vergi ödəmələri, hansısa ölkədə qeydiyyatdan keçmiş firmanın məhz deputata və ya onun doğmalarına məxsus olduğunu bildirən rəsmi sənədlərin sürətləri belə təqdim edilir. Əksər hallarda bu cür materiallar millət vəkilləri tərəfindən sükutla qarşılanır. Yəni bu qədər qalmaqala və qanun pozuntusuna onlar seyrçi qalmaqla reaksiya vermiş olurlar. Çox nadir hallarda hansınınsa reaksiyası müşahidə edilir. Məsələn, bu yaxınlarda yayılan analoji məlumatla bağlı millət vəkillərindən biri bildirmişdi ki, bunların hamısı ona yox, oğluna məxsusdur. Çox cavan yaşlarında övladın birdən-birə bu qədər əmlakı xarici ölkədə necə əldə etməsi isə əlavə sualların yaranmasına gətirib çıxarır. Bu tip materiallarla bağlı millət vəkillərinin reaksiyasızlığı necə qiymətləndirilə bilər və bununla bağlı hüquqi aspektdən hansı ölçülər götürülməlidir? Hüquqşunas Mehman Muradlı qəzetimizə bildirdi ki, dediyimiz mövzuda yayılan məlumatlara o da tez-tez rast gəlir: “Haqq üçün deyim ki, sanballı araşdırmalar da olur. Ortaya ciddi faktlar qoyulur. Təbiidir ki, oğurluq üstündə yaxalanan adam bununla bağlı susmağa üstünlük verəcək. Çünki istəməz ki, səs-soraq aləmi bürüsün. Ancaq söhbət ölkədən çıxarılan külli miqdarda vəsaitdən gedir. Hansısa deputat və ya məmur o qədər cah-cəlalı ancaq ölkədən pul çıxarmaqla əldə edə bilib. Bununla bağlı da bizim əlaqədar qurumlar hərəkətə keçməlidir. Bu məslədə deputat toxunulmazlığı arxasında gizlənmək də effekt verə bilməz. Məlumatların yoxlanması üçün prokurorluq həmin faktlar əsasında adıkeçən ölkələrin müvafiq qurumlarına sorğu göndərib, cavab almalıdır. Bundan sonra həmin adamlarla bağlı burda iş aparıla bilər. Reaksiya verilsə belə, bu əsas sayıla bilməz. Hüquqi araşdırma mütləq olmalıdır. Təbiidir ki, kimsə biznesinin olduğunu açıq etiraf etməyəcək. Bunun üçün hüquqi araşdırma aparıb, ortada olan faktları həmin adamlara sübut etmək lazımdır. Hətta həmin əmlakların üzərinə həbs qoydurub, ölkəyə qaytarmaq da mümkündür”.
Məhəmmədəli QƏRİBLİ
