19/08/2019 17:10
728 x 90

“Novoe vremya” rusdillilər arasında Azərbaycan birincisi oldu

Şakir Habiloğlu:“Azərbaycan Slavyan Gənclər Assosiasiyası və İcmal.az Analitik Təhlil Mərkəzi 1000-dən çox oxucu arasında sorğu keçirib və sorğunun nəticəsindən asılı olaraq “Novoe vremya” ilin ən çox oxunan rusdilli qəzeti seçilib”

img

“Bu sorğunun nəticəsi, eyni zamanda,  son vaxtlar “çap mediası az oxunur, tənəzzülə uğrayıb” deyənlərin fikirlərini də təkzib edir”

“Oxucuların qəzetimizə müsbət rəy verməsi bizim üçün sevindirici haldır”

Azərbaycanda anadilli mətbuat orqanları ilə yanaşı, qeyri dillərdə də kütləvi informasiya vasitələrinin inkişafına dövlət səviyəsində böyük diqqət yetirilir. Bu gün ölkəmizdə nəşr edilən rusdilli qəzet və jurnalların özünün sabit oxucu auditoriyası formalaşıb. Rusdilli qəzetlər sırasında özünün xüsusi yeri olan 20 yaşlı “Novoe vremya” qəzeti “İlin rusdilli nəşri” seçilib.

“Novoe vremya” qəzetinin baş redaktoru Şakir Habiloğlu (Ağayev) bu uğurlarını oxucu diqqətilə əlaqələndirir. O hesab edir ki, istənilən KİV-in uğur qazanmasında əsas meyar oxucu tələbatı və diqqətidir. “Azərbaycan Slavyan Gənclər Assosiasiyası və İcmal.az Analitik Təhlil Mərkəzi müxtəlif istiqamətdə sorğular keçirir. Bu qurumlar keçən mətbuat günü ilə bu mətbuat günü arasında oxucular arasında sorğu keçiriblər, sorğunun nəticələri mənim üçün tamaimlə göslənilməz oldu. Ümumiyyətlə, o təşkilatların belə bir sorğu keçirməsindən xəbərim olmayıb. Azərbaycan Slavyan Gənclər Assosiasiyası və İcmal.az Analitik Təhlil Mərkəzi 1000-dən çox oxucu arasında sorğu keçirib və sorğunun nəticəsindən asılı olaraq “Novoe vremya” ilin ən çox oxunan rusdilli qəzeti olub. Milli Mətbuat Günü ərəfəsində bu barədə mənə məlumat verdilər və sözün düzü, çox sevindim ki, gündəlik nəşr edilən qəzetimizə oxucular tərəfindən belə yüksək bir qiymət verilib. Bilirsiz ki, qəzet üçün ən böyük qiymət oxucunun verdiyi qiymətdir. İstənilən jurnalist üçün oxucu münasibəti əsasdır. Fərqi yoxdur, istər müsbət, istərsə də mənfi olsun. Əsas odur ki, yazdığın hədəfə dəyib və insanları maraqlandırıb. Həsən bəy Zərdabinin xatirələrini oxuyarkən bu dahi şəxsiyyətin oxucu məktublarına verdiyi dəyərlə tanış oldum. O, “Əkinçi”ni buraxarkən ona çoxlu oxucu məktubları gəlirdi. O, evdə həmin məktubları oxuyarkən gülüb-sevinirmiş, yoldaşı soruşub ki, o məktublarda nə yazıblar, “məni söyürlər” deyə cavab verib. Deyib səni söyürlərsə ona niyə sevinirsən? Cavab verib ki, mənim yazdıqlarıma reaksiya var və yazdıqlarım hədəfə dəyib. Təbii ki, bu təşkilatların bizdən xəbərsiz belə bir sorğu keçirməsi, oxucuların qəzetimizə müsbət rəy verməsi bizim üçün sevindirici haldır. Bu bizə əlavə bir güc, bir enerji, stimul verir ki, daha böyük əzmlə işləyək. Bu sorğunun nəticəsi, eyni zamanda,  son vaxtlar “çap mediası az oxunur, tənəzzülə uğrayıb” deyənlərin fikirlərini də təkzib edir. Fakt budur ki, çap mediasını oxuyanlar var və ona tələbat azalmayıb. Bu sorğu da bunu bir daha sübut etdi”.  

Ş.Habiloğlu sorğu keçirən qurumlara və oxuculara təşəkkürünü bildirməklə yanaşı qeyd etdi ki, oxucunun ona ünvanlanan qəzetləri qiymətləndirməsi müsbət haldır.   Artıq mükafatın redaksiyaya təqdim edildiyini qeyd edən Ş.Habiloğlunun sözlərinə görə, bu hadisəni qəzetin kollektivi də böyük sevinclə qarşılayıb. “Bu o deməkdir ki, bizim il ərzində buraxdığımız qəzetə tələbat var. Bu qəzet Azərbaycanın milli dövlətçilik maraqlarından çıxış edərək, ölkəmizdə həyata keçirilən işlərin obyektiv qiymətləndirilməsi oxucuların diqqətinə səbəb olur. Bilirsiz ki, bu gün çap mediasını daha çox rusdilli ictimaiyyət oxuyur. Bizim qəzetdə ən çox Qarabağ məsələsi, Azərbaycanın haqlı mövqeyi, dövlətimizin beynəlxalq siyasəti, sosial-iqtisadi, mədəni və  və sair məsələlər işıqlandırılır. Biz bunu rusdilli ictimaiyyətə çatdıra biliriksə və çatdırdığımız informasiyalar ortalıqda qalmayıb oxunursa, bu ən böyük mükafatımızdır. Rus dili dünyanın böyük ölkələrində qəbul edilən və oxunan bir dildir. Biz dünyada gedən proseslərlə bağlı məlumatları da əsasən rus dili vasitəsilə alırıq və dünyaya öz problemlərimizi rus dilində daha geniş səviyyədə çatdıra bilirik. Dünyanın 380 milyon əhalisi rus dilində danışır, bu dili anlayır və bu dildə oxumağı bacarır. Məhz rusdilli qəzetə oxucuların belə müsbət münasibət bəsləməsi, onlar tərəfindən qəbul edilməsi istər qəzet, istərsə də Azərbaycan üçün əhəmiyyətli məsələdir. Azərbaycanın haqlı mövqeyi rusdilli ictimaiyyətə çatdırılırsa və bu məsələ rus dili vasitəilə oxunursa, bu təbii ki, hamımızdan ötrü müsbət haldır və bizə verilən böyük qiymətdir”.

Ş.Habiloğlu bildirdi ki, “Novoe vremya” qəzeti 1999-cu ilin 9 oktyabr tarixində işıq üzü görüb və bu il qəzetin 20 yaşı tamam olur.  20 ildir ki, Azərbaycanın rusdilli ictimaiyyətinə Azərbaycanla bağlı həqiqətləri çatdıran qəzetin bu yaşa çatmasının böyük hadisə olduğunu deyən Ş.Ağayevin sözlərinə görə, bu illər ərzində qəzetin stabil oxucu auditoriyası formalaşdırılıb.

İradə SARIYEVA  

Son xəbərlər