Beynəlxalq Avrasiya Mətbuat Fondunun (BAMF) Prezidenti Umud Mirzəyevin rəhbərlik etdiyi nümayəndə heyəti Birləşmiş Millətlər Təşkilatının 72-ci sessiyasının Sülh və Təhlükəsizlik mövzusunda keçirilən panel müzakirələrinə qatılıb.
BAMF-ın mətbuat xidmətindən “Bakı Xəbər”ə verilən məlumata görə, maraqlı debatlara səhnə olan müzakirələrdə GUAM ölkələrində münaqişələrin alovlanmasında sülh və təhlüəsizlik amilləri, münaqişələr zamanı humanitar böhranın aradan qaldırılması, münaqişələrin həllində qarşılıqlı etimad, sülh və dayanıqlı inkişaf kimi məsələlər diqqətə çatdırılıb. BAMF-ın prezidenti Umud Mirzəyev və nümayəndələr Azərbaycanın işğal altındakı ərazilərindəki vəziyyətlə bağlı məsələləri və ölkəmizin mövqeyini sessiya iştirakçılarının diqqətinə çatdırıb.
İlk görüş BMT-nin İqtisadi və Sosial Şurasının QHT bölməsinin rəhbəri Mark Andre Dorel (Marc-Andre Dorel) ilə keçirilib. BAMF-ın bu illər ərzində gördüyü işləri, Şuranın dünyada tanınmasına verdiyi töhvəni çox yüksək qiymətləndirən cənab Dorel bu sahədə istənilən dəstəyi göstərməyə hazır olduğunu deyib. O, BAMF-nı BMT-nin İqtisadi və Sosial Şurasının QHT bölməsinin 2019-cu ildə təşkil edəcəyi ən yüksək statuslu Liderlər Forumuna qatılmağa, eyni zamanda forumun işinə ayrıca töfhə verməyə dəvət edib. BAMF–ın bu forumda xüsusi təqdimatla çıxışının əhəmiyyətinə toxunan cənab Dorel təşkilatın beynəlxalq təcrübəsinin bütün üzvlərə ciddi faydalar gətirəcəyinə, şuranın gələcək layihələrinin inkişafı üçün perspektiv imkanlar açacağına inandığını bildirib.
Görüş zamanı BAMF prezidenti Azərbaycanın vətəndaş cəmiyyətinin inkişafında QHT-lərin və dövlətin oynadığı vacib rol barədə Mark Andre Dorelə ətraflı məlumat verib. Fikir mübadiləsi zamanı ECOSOC-un QHT bölməsi ilə birgə fəaliyyətin zəruriliyindən söhbət açıb. BMT-in Baş Assambleyası kimi yüksək səviyyəli tədbirlərə qatılmağın əhəmiyyəti haqqında danışılan görüşdə gələcək əməkdaşlığın imkanları da geniş müzakirə olunub. Cənab Mirzəyev bu yaxınlarda BAMF-ın təşkilatçılığı ilə Azərbaycanın bir sıra qeyri-hökumət təşkilatlarının iştirakı ilə “BMT-nin İqtisadi Sosial Şurası ilə əməkdaşlıq imkanları və perspektivləri” mövzusunda keçirilən tədbiri yada salıb. Bildirib ki, BAMF-ın ofisində baş tutan tədbirdə Azərbaycandan olan vətəndaş cəmiyyəti qurumlarının BMT qurumları ilə əlaqələrinin gücləndirilməsi, İqtisadi Sosial Şuranın QHT bölməsində təmsilçiliyi, dayanıqlı inkişaf hədəflərinin təşviq edilməsi və zəruri yardımların göstərilməsi geniş müzakirə olunub. Bu görüş həm yerli QHT-lər, həm də BMT-nın Bakıdakı nümayəndəliyi tərəfindən çox müsbət qarşılanıb.
Umud Mirzəyev bildirib ki, rəhbərlik etdiyi BAMF vətəndaş cəmiyyəti təşkilatı olaraq artıq bir neçə ildir dayanıqlı inkişaf məqsədləri istiqamətində həyata keçirilən fəaliyyət proqramları üzrə dövlət və icma əsaslı qurumların etibarlı tərəfdaşıdır. Son illər BAMF–ın müharibədən zərər çəkmiş regionlarda ortaya qoyduğu vətəndaş cəmiyyəti-mikromaliyyə və peşə təhsili birgə modeli sosial-iqtisadi korporativ proqramların hədəfə doğru inkişafı üçün uğurlu tendensiya olub.
Bununla yanaşı, BAMF prezidenti dünya ictimaiyyətinin, xüsusilə münaqişə bölgələrindəki vəziyyətə həssas yanaşması və dayanıqlı inkişaf üçün bütün regionlarda sülhün və barışığın təbliğ olunmasının vacibliyini diqqətə çatdırıb.
BMT-yə səfər çərçivəsində BAMF nümayəndələri İnsan Haqları Bəyənnaməsinin elan olunmasının 70 illiyinə həsr olunmuş tədbirə də qatılıblar. Tədbirdə çıxış edən BMT baş katibi Antoni Quterreş, BMT Baş Assambleyasının 72 sessiyasının prezidenti Miroslav Lajçak, BMT-nin Miqrasiya məsələləri üzrə xüsusi nümayəndəsi Louis Arbor və digərləri bugünkü dünyamızda insan haqlarının pozulmasının bəşəriyyətin üz-üzə qaldığı ən ağrılı problem olduğunu qeyd edib. Çıxışçılar insan haqlarının pozulmasına səbəb olan müharibələrin heç zaman qələbə ilə yekunlaşmadığını ifadə edib. Tədbirdə BMT İnsan Haqları Komissiyasının keçmiş komissarı, Beynəlxalq Cinayət Məhkəməsinin hakimi Navi Pilayla görüşən Umud Mirzəyev insan haqları ilə bağlı durumun yaxşılaşdırılması üçün zəruri olan tədbirlər və bu sahədə Azərbaycanın təşəbbüslərindən söz açıb. Xanım Navi Pilay gənc ölkələrin bu sahədə əzmlə fəaliyyət göstərməli olduqlarını və Azərbaycanın beynəlxalq münasibətlər sistemində müsbət mövqeyini qeyd edib. Daha sonra Umud Mirzəyev BMT Sosial-İqtisadi Şurasının baş komissarı Hu Vonqbo və BMT-nin Afrika üzrə xoşməramlı səfiri, Yeni Gələcək Fondunun prezidenti Delois Blakely ilə görüşüb. Xanım Delois Blakely BAMF-ın fəaliyyəti ilə tanış olduğunu, görülən işləri yüksək dəyərləndirdiyini bildirib.
Qeyd edək, Azərbaycan vətəndaş cəmiyyəti təmsilçisi BAMF-ın Birləşmiş Millətlər Təşkilatının 72-ci sessiyasının müzakirələrində iştirakı Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə yardımı ilə reallaşıb.
Namiq QULİYEV
