Ziyadxan Əliyev: “Məsələ ondadır ki, bu vaxta qədər Azərbaycanda təşkil olunan beynəlxalq tədbirlər çox yüksək səviyyədə keçirilib”
Azərbaycan Respublikasının Birinci vitse-prezidenti Mehriban Əliyeva dekabrın 12-də Beynəlxalq Sərgilər Bürosu baş katibinin müavini Dimitri Kerkentzes ilə görüşüb. Görüşdə Mehriban xanım noyabr ayında Parisdə Bakının Ümumdünya “Expo-2025” sərgisinə namizəd şəhər olması ilə bağlı qəbulun təşkil edildiyini, həmçinin, Beynəlxalq Sərgilər Bürosunun 162-ci Assambleyası çərçivəsində Azərbaycan nümayəndə heyəti tərəfindən “Bakı Expo-2025”in təqdimatının keçirildiyini xatırladıb.
Ümumdünya “Expo-2025” üçün Bakının da öz namizədliyini irəli sürdüyünü deyən Birinci vitse-prezident ölkəmizin bu sahədə zəngin təcrübəsini qeyd edib. Bildirib ki, son illər Bakı bir neçə beynəlxalq tədbirə uğurla evsahibliyi edib: “Bu tədbirlərin yüksək səviyyədə keçirilməsi göstərir ki, ölkəmiz “Expo-2025”in keçiriləcəyi məkan kimi seçilsə, bu tədbir də yüksək hazırlığı ilə yadda qalacaq”.
Mehriban Əliyeva “Expo-2025”in Bakıda təşkili təşəbbüsünün həm dövlət qurumları, həm hökumət, həm də cəmiyyət tərəfindən dəstəkləndiyini vurğulayıb.
Beynəlxalq Sərgilər Bürosu baş katibinin müavini Dimitri Kerkentzes qeyd edib ki, Azərbaycan dövlətinin, o cümlədən Birinci vitse-prezident Mehriban Əliyevanın Bakının “Expo-2025”ə namizədliyini irəli sürməsi ilə bağlı tədbirləri dəstəkləməsi Azərbaycanın bu layihəyə önəm verdiyini nümayiş etdirir.
Maraqlıdır, Mehriban xanım “Bakı Expo-2025”in yüksək səviyyədə keçiriləcəyini deyərkən nələrə əsaslanarq belə ürəkli bəyanat verib?
Məsələyə münasibət bildirən əməkdar incəsənət xadimi, sənətşünas Ziyadxan Əliyev bunu bir sıra arqumentlərlə əsaslandırdı: “Mehriban xanımın bununla bağlı səsləndirdiyi fikirlər həqiqəti əks etdirir. Səsləndirdiyi fikirlər ölkədə bu sahədə görülən işlərə söykənir. Məsələ ondadır ki, bu vaxta qədər Azərbaycanda təşkil olunan beynəlxalq tədbirlər çox yüksək səviyyədə keçirilib. İdman, incəsənət və digər sahələrdə keçirilən tədbirlər buna əyani sübutdur. İstər təşkilatçılar, istərsə də iştirakçıların hamısı bu tədbirlərdən razı qalıblar. Ona görə də hesab edirəm ki, Azərbaycanın bu sahədə kifayət qədər zəngin təcrübəsi var. Bu baxımdan hesab edirəm ki, Azərbaycan “Expo-2025”in keçiriləcəyi məkan kimi seçilsə, bu tədbir çox yüksək səviyyədə təşkil olunacaq. O üzdən, Mehriban xanımın səsləndirdiyi fikirlər həqiqətdir və Azərbaycan bütün mənalarda buna qadirdir. Bütün bunlarla yanaşı, həmin sərgi Azərbaycanda keçirilsə, bir sıra məqamlara önəm verilməsini arzu edərdim. Çox güman ki, belə bir qərar verilsə, dünyanın müxtəlif ölkələrindən bura nümayəndələr, şirkətlər gələcək. Çox istərdim ki, sərginin quruluşunda, onun ümumi görünüşündə Azərbaycanı dünyaya tanıdan, sərgiləri təbliğ edə biləcək müəyyən elementlərdən, digər məzmun tutumlu elementlərdən istifadə olunsun. Ona görə ki, sözügedən sərgi həm də Azərbaycanın bir tanınma nişanına çevrilsin”.
Vidadi ORDAHALLI
