"Razılaşdırılan konvensiya layihəsində Xəzərin təkinin üzbəüz və yanakı dövlətlər arasındakı ikitərəfli sazişlər əsasında sektorlara bölünməsi nəzərdə tutulub". APA-nın xəbərinə görə, bunu xarici işlər nazirinin müavini Xələf Xələfov deyib.
X. Xələfov bildirib ki, Xəzərin təkinin bölgüsündə orta xətt və yaxud hər hansı vahid prinsip nəzərdə tutulmayıb.
Nazir müavini qeyd edib ki, Azərbaycanla Türkmənistan və İran arasında da bu sahədəki məsələlər ikitərəfli saziş əsasında həllini tapmalıdır.
X.Xələfov qeyd edib ki, gələn ilin birinci yarısında Qazaxıstanda prezident Nursultan Nazarbayevin təklifi ilə Xəzəryanı ölkələrin dövlət başçılarının sammitinin keçirilməsi nəzərdə tutulur: "Sammitin tarixi dövlət başçıları ilə razılaşdırılacaq. Həmin dövrə qədər razılaşdırılmış konvensiya layihəsi müvafiq olaraq ölkədaxili prosedurlar və digər normativ texniki proseslər keçməli olacaq" (Trend).
Qeyd edək ki, Azərbaycan, Qazaxsıtan və Rusiya arasında analoji ikitərəfli sazişlər artıq mövcuddur.
"Razılaşdırılan Konvensiya layihəsində Xəzərdə su səthinin bölgü prinsipi əksini tapıb. 15 millik suverenlik zonasına dövlətin suverenliyi şamil olunur, dövlətin ərazisi 15 mildə davam edir. 15 mildən sonra 10 mil də balıqçılıq zonası müəyyənləşdirilib. Qalan su səthi ümumi istifadədə olacaq" – deyən X. Xələfov bildirib ki, su səthinin bölünməsi ilə bağlı bölgü prinsipləri ayrıca sazişlə razılaşdırılacaq və qəbul olunacaq.
"Rusiya və Azərbaycan arasında demarkasiyanın həyata keçirilməsi üçün dövlət komissiyası mövcuddur. Bu komissiya indiyə qədər bütün normativ hüquqi sənədləri qəbul edib". Bunu da xarici işlər nazirinin müavini Xələf Xələfov bildirib.
X. Xələfov deyib ki, hazırda qəbul edilmiş, razılaşdırılmış plan əsasında sərhəddə konkret sərhəd işarələrinin qoyulması və müvafiq qurğuların quraşdırılması ilə bağlı fəaliyyətlər həyata keçirilir: "Bu iş gələn il də davam etdiriləcək. Biz diplomatik kanallar vasitəsilə komissiyaların rəhbərləri arasında görüşləri razılaşdırırıq. Bu, daimi prosesdir ".
Nazir müavini Azərbaycanla Gürcüstan arasında delimitasiya prosesinin isə hələ bitmədiyini qeyd edib: "Komissiyalar danışıqları davam etdirir. Gürcüstanla bu il delimitasiya ilə bağlı belə məsləhətləşmə həyata keçirmək planımız var idi, ancaq bunu edə bilmədik. Yəqin ki, gələn ilin əvvəllərindən başlayaraq Gürcüstanla danışıqları davam etdirəcəyik. Müəyyən sahələrdə razılaşma əldə olunmursa, danışıqlar davam etdirilir. Bu, uzun, çox da asan olmayan prosesdir. Elə olur ki, hər bir sahə üzrə aylarla müzakirə aparılır".
