Ümid Partiyasının sədri İqbal Ağazadə noyabrın 1-də Milli Məclisə keçirilmiş seçkilərlə bağlı Mərkəzi Seçki Komissiyasına (MSK) 35 saylı Xətai üçüncü seçki dairəsinin 17, 18 və 26 saylı seçki məntəqələrində səsvermənin nəticələrinin ləğv edilməsi ilə bağlı müraciət edib.
Trend-in məlumatına görə, müraciət MSK-nın bu gün keçirilən iclasında müzakirə edilib və baxılması üçün aidiyyəti üzrə dairə seçki komissiyasına göndərilib.
54 saylı Şabran-Siyəzən seçki dairəsindən deputatlığa namizəd olmuş Elza Seyidcahanın iki tərəfdarının müraciətinə də baxıb. Müracətdə həmin seçki dairəsində səsvermənin nəticələrinin ləğv edilməsi xahiş edilib.
İclasda bildirilib ki, MSK-nın ekspert qrupunun araşdırmaları nəticəsində müəyyən olub ki, müraciətin heç bir əsası yoxdur və həmin dairədə səsvermənin nəticələrinin ləğv edilməsinə səbəb ola biləcək hər hansı hal qeydə alınmayıb.
Bu səbəbdən müraciət əsassız hesab edilərək təmin edilməyib.
MSK iclasında Müsavat Partiyasından deputatlığa namizəd olmuş şəxslərin müraciətinə də baxılıb. MSK Müsavat Partiyasından deputatlığa namizədliyi qeydə alınmış 18 nəfərin şikayətini müzakirə edib.
Onlar şikayətlərində oktyabrın 29-dan deputatlığa namizədliklərinin qeydiyyatından imtina etdiklərini bildiriblər və adlarının seçki bülletenindən çıxarılmamasını seçicilərin iradəsinə təzyiq kimi qiymətləndiriliblər. Lakin MSK şikayəti əsassız sayıb. Bildirilib ki, Müsavat Partiyasının namizədləri noyabrın 1-də keçirilmiş parlament seçkilərində seçki dairəsindəki lider namizədlərdən az səs toplayıblar. Buradan görünür ki, seçicilərin iradəsinə təzyiq kimi iddialar əsassızdır.
MSK sədri Məzahir Pənahov deyib ki, namizədliyin geri götürülməsi səsvermə gününə ən geci 10 gün qalmış mümkün ola bilər: "Müsavat Partiyasından deputatlığa namizədliyi qeydə alınanlar isə bu müddət keçdikdən sonra MSK-ya müraciət ediblər. Hüquqi baxımdan həmin şəxslərin deputatlığa namizədliklərinin ləğv edilməsi mümkünsüzdür. Bu məsələ birdəfəlik hər kəsə aydın olmalıdır. Bütün bunlar seçki Məcəlləsi ilə tənzimlənir”.
Sonda MSK müraciətı əsassız hesab edərək qəbul etməyib.
