Seçkidə hər-hansı ciddi nöqsan qeydə alınmadığını deyən M. Məmmədov fondun 123 seçki məntəqəsində müşahidə apardıqlarını bildirib. Monitorinq qrupunun rəhbəri seçkilərlə bağlı fondun hazırladığı hesabatı açıqlayıb.
Hesabatda deyilir: "Avropa Demokratiya və İnsan Haqları Fondunun seçki qərargahı tərəfindən Naxçıvan Muxtar Respublikası istisna olmaqla, respublikanın 35 şəhər və rayonunda seçkidən öncə və seçki günü aparılmış monitorinqin nəticələri göstərir ki, Azərbaycanda əlverişli seçki mühiti yaradılıb. Ədalətli seçkilərin keçirilməsi məqsədilə qanunvericiliyə uyğun olaraq seçki proseduru tam təmin edildiyi üçün heç bir ciddi nöqsan aşkarlanmayıb. Seçkiqabağı təşviqat dövründə deputatlığa namizədlər üçün hər cür şərait yaradılıbdır. Deputatlığa namizədlər KİV-də, xüsusilə elektron mediada maneəsiz olaraq istifadə edərək, təbliğat-təşviqat kampaniyası aparıblar. Mərkəzi Seçki Komissiyası ölkə üzrə Təqvim Planına uyğun olaraq bütün tədbirləri vaxtında yerinə yetirib. Deputatlığa namizədlərin sənədlərinin yoxlanması və qeydə alınması prosesi də operativ şəkildə həyata keçirilibdir”.
M. Məcidov qeyd edib ki, Mərkəzi Seçki Komissiyası və dairə seçki komissiyaları parlament seçkilərinə hazırlığı yüksək səviyyədə təşkil etdiyi üçün hər-hansı ciddi çatışmazlıq və nöqsanla rastlaşmadıq: "Biz noyabrın 1-də Milli Məclisə keçirilmiş seçkilərin şəffaf və demokratik keçirildiyinin şahidi olduq. Bütün seçki məntəqələrinin hər birində seçki günü müxtəlif siyasi partiyaların, bitərəf namizədlərin və beynəlxalq təşkilatların 20 və 30 nümayəndəsi müşahidəçi kimi iştirak edərək seçkiləri yaxından izləyibdir. Müşahidələrimizə əsasən, Avropa Demokratiya və İnsan Haqları Fondu Azərbaycanda 1 noyabr 2015-ci il tarixində Milli Məclisə keçirilmiş seçkilərin demokratik və şəffaf şəkildə keçirildiyi qənaətindədir”.
Konfransda çıxış edən fondun seçki qərargahının müşahidə monitorinq qrupunun digər üzvlərindən Ateş Türkoğlu və digərləri də seçkilərin şəffaf və qanunvericiliyə uyğun keçirildiyini bəyan ediblər.
