"Televiziya və radio yayımı haqqında" Qanunun tələblərinin imkan verdiyi dərəcədə aparıcıların efirdəki davranışlarına nəzarət edirik. Efir mədəniyyəti, aparıcılıq səviyyəsi aşağı olan aparıcılarla bağlı qərar qəbul ediləcək".
Bu sözləri Milli Televiziya və Radio Şurasının (MTRŞ) Ekspertiza, Proqramlaşdırma və Analitik şöbəsinin müdiri Təvəkkül Dadaşov deyib. O bildirib ki, aparıcıların efirdəki davranışları Şurada diqqətlə izlənir.
T.Dadaşov qeyd edib ki, bütün hallarda, yayımçıların bu məsələdə özləri maraqlı olmalıdır: "Aparıcılar kanalların sifətidir. Aparıcılar telekanalların ictimaiyyət arasında nüfuzunu artıra da, azalda da bilər. Onların efirdəki davranışı birbaşa telekanalların özlərinin mənafeyi ilə bağlı olan məsələdir. Telekanal rəhbərliyi bu məsələdə daha diqqətli olmalıdır, bu, telekanalları daha çox maraqlandırmalıdır".
Məsələ ilə bağlı fikir bildirən media sahəsi üzrə ekspert Azər Həsrət "Bakı-Xəbər"ə açıqlamasında qeyd etdi ki, aparıcılara nəzarətin olması olduqca vacib məsələdir: "Özəl telekanallara geniş imkan verilməsi təsadüfi adamların ciddi proqramların aparıcısına çevrilməsinə səbəb olub. Bəzən elə hal olur ki, hansısa verilişi aparan şəxsi biz uşaq kimi qəbul edirik. Eyni zamanda, bir sıra aparıcılar küçə ləhcəsi ilə veriliş aparır. Xüsusən də radio aparıcılarının danışıq səviyyəsi olduqca bərbad vəziyyətdədir. Həmin aparıcılar adi həyatda necə danışırlarsa, efirdə də o cür danışırlar. Təbii ki, bu cür aparıcılarla bağlı sərt addımlar atılmalıdır. Hesab edirəm ki, MTRŞ bu məsələdə gecikib".
A.Həsrət söhbət əsnasında qonşu ölkələrin təcrübəsindən də danışdı. O bildirdi ki, Türkiyə və Rusiya televiziya kanallarında yayımlanan ciddi verilişlərin aparıcısı aşağı yaş həddində olmur: "Adətən 35-40 yaşlarında olan aparıcılar ciddi verilişləri apara bilər. Həmin aparıcıların dediyi sözə ictimaiyyətin, tamaşaçının güvəni olur. Çünki o aparıcılara baxanda onun təcrübəli olduğu hiss olunur".
Həmsöhbətimiz hesab edir ki, aparıcılarla bağlı məsələ tez bir zamanda öz həllini tapmalıdır.
Günel CƏLİLOVA
