Azərbaycan hərbi aviasiyasını gücləndirir

Tarix: 06.10.2015 / 03:50
Bölmə: Gündəm

Azərbaycan ordusunun arsenalında olan hərbi texnikanın sayını artırmaq üçün ölkəmizin sıx əməkdaşlıq etdiyi dövlətlər sırasında Türkiyə kifayət qədər önəmli yerlərdən birini tutur. Elə bu səbəbdəndir ki, Silahlı Qüvvələrimizin arsenalında Türkiyə istehsalı olan hərbi texnikanın sayı kifayət qədərdir. Bu arada isə bəlli olub ki, Azərbaycan Türkiyədən yeni müasir əsgəri texnika almağa hazırlaşır.

Söhbət Türkiyənin TAİ şirkəti tərəfindən istehsal edilən "T-129 ATAK" helikopterlərindən gedir.

Artıq Türkiyənin özündə bu helikopterlərdən geniş istifadə olunur. Azərbaycan hələ xeyli müddət əvvəl bu helikopterlərin alınmasında maraqlı olduğunu açıqlayıb. İndi isə bildirilir ki, Türkiyədən 60 "T-129 ATAK" döyüş vertolyotunun alınmasına dair Azərbaycan qarşı tərəflə razılıq əldə edib. Sövdələşmənin ümumi dəyəri 3 milyard dollardır. Türkiyə və İtaliyanın ortaq layihəsi olan "T-129 ATAK" hərbi vertolyotlarının sürəti saatda 300 kilometrə çatır, hər cür hava şəraitində, gecə və gündüz uçuş həyata keçirə bilir. Vertolyot həm də Türkiyə istehsalı olan kompyuter sistemi ilə təchiz edilib. Helikopterin 42 fərqli avionika və silah sistemi Türkiyə şirkətləri tərəfindən istehsal olunur. Ekspertlər bildirir ki, "T-129 ATAK" döyüş helikopterlərinin alınması Azərbaycan hərb aviasiyasını daha güclü hala gətirəcək.

"T-129 ATAK" vertolyotları iki pilotludur. Qanadlarının altında Türkiyənin "Roketsan" şirkətinin istehsalı olan 76 "hava-yer" tipli raket daşıyır. Əlavə yanacaq götürmədən 556 kilometr məsafə uça bilir. Vertolyotun silahlanmasına burun hissəsində yerləşdirilmiş 20 millimetrlik avtomatik top da daxildir. Ölkəmizin Türkiyə ilə sövdələşməsinin detalları, vertolyotların nə zaman təhvil veriləcəyi haqda məlumat olmasa da, prosesin yaxın tezliklə həyata keçirilməsi gözlənilir. Qeyd edək ki, Azərbaycandan başqa Birləşmiş Ərəb Əmirlikləri, Malayziya, Pakistan və İordaniya da TAİ ilə bu vertolyotların alınmasına dair danışıqlar aparır. Ekspertlər isə bildirir ki, "T-129 ATAK" vertolyotlarının alınmasına dair sövdələşmə Azərbaycanın Ermənistan üzərində hərbi üstünlüyünü daha da möhkəmləndirəcək. O da gözlənir ki, Azərbaycan Türkiyədən "Hürkuş" Yeni Nəsil Təməl Təlim Təyyarəsi alsın. Qeyd edək ki, Türkiyənin TUSAŞ şirkətinin mühəndisləri tərəfindən dizayn və istehsal olunan "Hürkuş" Yeni Nəsil Təməl Təlim Təyyarəsi testlərinin sonuncusu olan Maksimal Güc Tətbiqi Mərhələsini uğurla tamamlayıb. Sertifikatlaşdırma mərhələsində testlər EASA və Mülki Aviasiya Baş İdarəsinin nəzarəti altında keçirilib və maksimum yük statik test təyyarəsinə uğurla tətbiq edilib. Bir il yarım ərzində keçirilən testlərdə statik test təyyarəsinə "Hürkuş"un uçuş zamanı məruz qala biləcəyi fərqli tiplərdə vacib yüklənmələr tətbiq olunub. Bütün testlər uğurla tamamlanaraq müvafiq sertifikatlaşdırma tələbləri yerinə yetirilib.

Türkiyədən hərbi texnika alınması isə ölkəmizə daha ucuz başa gəlir. Hazırda hərbi təchizatların alınması baxımından Türkiyə şirkətləri Azərbaycanla sıx əməkdaşlıq həyata keçirməkdədir. Hərbi təyinatlı məhsulların istehsalında xüsusi çəkiyə malik olan Türkiyənin ASELSAN şirkəti isə ölkəmizlə bu sahədə əlaqələrini daim genişləndirir. Türkiyənin ROKETSAN şirkəti Azərbaycanın ilk T-300 "Qasırğa" raket sistemini təhvil verib. Qeyd edək ki, Azərbaycan ROKETSAN şirkətindən T-122 "Sakarya" reaktiv atəş sistemləri də alıb. Bu sistemlər mənzili artırılmış mərmilərlə düşmənin 40 kilometr uzaqlıqdakı hədəflərini məhv etmək gücünə malikdir.

Aviasiya sahəsində isə ölkəmiz Rusiya ilə də sıx əməkdaşlıq edir. Azərbaycanın silahlanmasında olan döyüş vertolyotlarının çoxu məhz Rusiya istehsalıdır, Mi-8, Mi-24, Mi-35 tiplidir. Azərbaycan bu yaxınlarda Rusiyadan Mi-35M vertolyotlarının böyük partiyasını alaraq öz hərbi-hava qüvvələrinin imkanlarını xeyli gücləndirib. "Mi-24" helikopterlərinin bazasında yaradılmış "Mi-35M" helikopterləri həm zərbə, həm də desantın daşınması məqsədilə istifadə oluna bilir. Müasir avionik sistemlərlə təchiz olunmuş helikopterin silahlanmasına 23 mm çaplı top, idarə olunan və olunmayan raketlər daxildir."Mi-35M" sürət və manevr imkanları, eləcə də daşıdığı silah yükü baxımından "Mi-24"-ləri geridə qoyur. Ümumiyyətlə, Ermənistanla müharibə vəziyyətində olan Azərbaycanda xüsusi diqqət mərkəzində olan məsələlərdən biri də onun müasir hərbi texnika alışını həyata keçirməsidir. Qeyd edilən istiqamətdə isə artıq mühüm nailiyyətlər əldə olunub.