Sentyabrın 30-da Rusiyanın Yekaterinburq şəhərində VI Rusiya-Azərbaycan Regionlararası Forumu öz işinə başlayıb. Azərbaycan Respublikası Prezidentinin İctimai-siyasi məsələlər üzrə köməkçisi Əli Həsənov Azərbaycan Prezidenti İlham Əliyevin forum iştirakçılarına ünvanladığı müraciətini oxuyub.
Dövlət başçısı forumun işinə başlaması münasibətilə tədbir iştirakçılarını təbrik edərək qeyd edib ki, bu forum cari il Azərbaycanın ənənəvi sıx ticari-iqtisadi əlaqələri olan Sverdlovks vilayətinin inzibati mərkəzi sayılan Yekaterinburqda keçirilir.
Müraciətdə deyilir: "Regionun ictimai-siyasi, sosial-iqtisadi və mədəni həyatında fəal iştirak edən çoxsaylı Azərbaycan diasporunun nümayəndələri əlaqələrin qorunması və möhkəmləndirilməsində əhəmiyyətli rol oynayır”.
Azərbaycan Prezidenti bildirib ki, regionlararası forumlar qısa zaman kəsiyində həyat qabiliyyətini və səmərəliliyini göstərdi: "Regionlararası forumlar haqlı olaraq birgə fəaliyyət üçün mövqelərin əlaqələndirildiyi və səylərin birləşdirildiyi, işgüzar əlaqələrin qurulduğu və onların genişləndirmə perspektivlərinin müzakirə edildiyi ehtiyac duyulan məkan hesab edilir. Başqa sözlə, bu görüşlərdə Azərbaycan Respublikası və Rusiya Federasiyasının subyektləri arasında birbaşa qarşılıqlı mənfəətli əlaqələr qurmağa imkan verən konstruktiv və açıq dialoq aparılır”.
Müraciətdə vurğulanır ki, forumun formatı ticari-iqtisadi və sərmayə tərəfdaşlığından başlayaraq humanitar sahədə qarşılıqlı əlaqələrədək bir çox məsələləri nəzərdən keçirməyə imkan verir: "Cari tədbir çərçivəsində hər iki tərəfdən tələbələr, gənc alimlər və sahibkarların iştirakı ilə ayrıca "dəyirmi masa”nın təşkil edilməsi sevindirici amildir. Bu cür dialoq platforması təkcə əməkdaşlığın daha səmərəli forma və istiqamətlərinin axtarışına kömək etmir, həm də gənclər arasında yeni dost və həmfikirlərin qazanılmasına xidmət edir. Sirr deyil ki, dövlətlərimiz arasında qarşılıqlı münasibətlərin inkişafının perspektivləri yüksək intellektə və kommunikabelliyə malik indiki gənc nəsildən asılıdır. Azərbaycan-Rusiya əlaqələrinin müasir vəziyyətini qiymətləndirərək məmnunluqla qeyd etmək olar ki, birgə səylər sayəsində onlar strateji tərəfdaşlıq səviyyəsinə çatıblar”.
İlham Əliyev əmin olduğunu bildirib ki, forum inteqrasiya proseslərinin dərinləşməsinə və iki ölkənin bundan sonra da yaxınlaşmasına yeni təkan verəcək. Prezident forum iştirakçılarına işlərində uğurlar və qarşıya qoyulan məqsədlərə çatmağı arzu edib.
Vladimir Putin: "Azərbaycan və Rusiyanın fəaliyyət potensialını artırmaq üçün bütün imkanları var”
Rusiya-Azərbaycan Regionlararası Forumu ötən illər ərzində öz nüfuzunu möhkəmləndirib və getdikcə özündən iki ölkənin həyatında böyük, vacib hadisə kimi bəhs etdirir. Bu barədə Rusiya Prezidenti Vladimir Putinin forum iştirakçılarına və qonaqlarına ünvanladığı müraciətində deyilir.
Müraciəti forumun açılışında Rusiya Prezidenti Administrasiyasının Xarici ölkələrlə regionlararası və mədəni əlaqələr üzrə idarə rəisi Vladimir Çernov oxuyub.
VI Rusiya-Azərbaycan Regionlararası Forumu Yekaterinburqda Beynəlxalq Sərgi Mərkəzində işinə başlayıb. Forumun təşkilatçıları qismində Rusiyanın İqtisadiyyat və İnkişaf Nazirliyi və Azərbaycanın İqtisadiyyat və Sənayesi Nazirliyi çıxış edirlər.
Müraciətdə deyilir: "Forum Rusiya və Azərbaycanın hakimiyyət orqanları rəhbərlərinin, qeyri-hökumət təşkilatlarının, tanınmış alimlərin, siyasətçilərin, mədəniyyət xadimlərinin, işgüzar və ekspert ictimaiyyəti nümayəndələrinin diqqətini cəlb edir, sənaye və kənd təsərrüfatında, energetika, turizm sahələrində, eləcə humanitar əlaqələrin möhkəmləndirilməsində tərəfdaşlığımız üçün əhəmiyyətli olan perspektivli ideya və layihələrin geniş spektri üzrə fikir mübadiləsi aparmaq üçün ehtiyac duyulan məkan sayılır”.
Dövlət başçısının sözlərinə əsasən, qarşılıqlı fəaliyyətin potensialını artırmaq və ona əlavə təkan vermək üçün Azərbaycan və Rusiyanın bütün imkanları var.
Forum çərçivəsində ekspert görüşləri və "dəyirmi masa”lar keçiriləcək. Həmin görüşlərdə sənaye və işgüzar dairələrin nümayəndələri, iqtisadiyyatın müxtəlif sahələri üzrə müəssisələrin rəhbərləri, sərhədyanı ərazilərin administrasiya rəhbərləri nəqliyyat, rabitə, turizm, humanitar və təhsil sahələrində inteqrasiya əlaqələrinin inkişafı və əməkdaşlığın dərinləşməsi problemlərini müzakirə edəcəklər.
Azərbaycan və Rusiya regionlarının birbaşa təmaslarına xüsusi diqqət yetiriləcək.
