Azərbaycanın hərbi texnika arsenalında inanılmaz yeniliklər edilir

Tarix: 10.09.2015 / 04:33
Bölmə: Gündəm

Silahlı Qüvvələr tərəfindən keçirilən son təlimlər yüksək döyüş qabiliyyətini bir daha nümayiş etdirən əyani göstəricilərdən hesab olunur. Bu təlimlərin gedişində bir daha aydın olur ki, ordu qarşıya qoyulan vəzifələri yerinə yetirmək, o cümlədən işğal olunmuş əraziləri azad etmək iqtidarındadır. Qeyd edək ki, Silahlı Qüvvələrin qoşun növləri və qismlərində müxtəlif ixtisaslar üzrə intensiv döyüş hazırlığı məşqləri mərhələli surətdə davam edir.

Bu arada xatırladaq ki, Prezident İlham Əliyevin təsdiq etdiyi plana əsasən, müdafiə nazirinin rəhbərliyi altında Silahlı Qüvvələrin bütün qoşun növlərinin döyüşə hazırolma və döyüş qabiliyyətinin yoxlanması məqsədilə Komanda Qərargah Hərbi Oyunları davam etdirilir.

Təlimlərə 65.000 nəfərədək şəxsi heyət, 700-dək zirehli texnika, 500-dən çox raket və artilleriya qoşunlarının qurğusu, Hərbi Hava Qüvvələrinin 40-dək təyyarəsi və 50-dək helikopteri, Hərbi Dəniz Qüvvələrinin 20-dək gəmi və kateri, eləcə də xüsusi təyinatlı qüvvələrin və qruplaşmaların havadan mühafizəsi məqsədilə qoşunların hava hücumundan müdafiə bölmələri və müasir hava hücumundan müdafiə kompleksləri ilə silahlanmış zenit-raket birləşmələri cəlb edilib. Təlimlərdə hava kəşfiyyatının aparılması məqsədilə pilotsuz uçan aparatlardan istifadə olunur. Təlimlər həm də ordunun hərbi texnika ilə yüksək səviyyədə təchiz olunduğunu göstərir. Proseslər göstərir ki, Azərbaycan qarşıdakı dövr ərzində də ordunun silahlanmasına xüsusi diqqət yetirəcək. Hazırda ölkəmizin hərbi texnika aldığı əsas ölkələrdən biri isə Rusiyadır.

Bu arada Rusiya Strateji Təhlil və Texnologiyalar Mərkəzi belə bir məlumat yayıb ki, Rusiya ikitərəfli müqavilələr çərçivəsində Azərbaycana T-90C tankları, BMP-3, özüyeriyən artilleriya qurğuları, ağır alov saçan sistem göndərir. "Rosoboroneksport" şirkətinin baş direktorunun müavini İqor Sevastyanov isə Rusiya texnikası və silah-sursatına olan xarici sifariş portfelinin 12 milyard dolları keçdiyini bildirib. Onu da bildirək ki, Azərbaycanın aldığı T-90C tanklarının ixrac üçün nəzərdə tutulmuş ən son variantlarından biridir. Tankın atəşi idarəetmə sistemi avtomatlaşdırılıb, hərəkət edən hədəflərə dəqiq zərbə endirmək üçün elektron tank ballistik ayırdedici ilə təchiz olunub, kondisioneri var. Bu tanklar istənilən hava şəraitində və sutkanın istənilən vaxtında hədəfi dəqiq vurmağa imkan verən elektron sistemlərlə təchiz olunub. Tankın əsas silahı 125 millimetrlik topdur, onun qülləsində 48 millimetrlik zenit pulemyotu və yüngül pulemyot quraşdırılıb. Zirehinin qoruma qabiliyyətinə görə bu tanklar dünyada ən öndə gedir. Özüyeriyən artilleriya qurğularına gəlincə, Azərbaycan Rusiyadan "Msta-S" qurğusu alır. Onlar T-72 və T-80 tanklarının bazasında yığılır. Düşmənin taktiki nüvə vasitələrini, artilleriya və minomyot batareyalarını, tanklarını və digər zirehli texnikasını, canlı qüvvəsini, möhkəmləndirilmiş atəş nöqtələrini və digər hədəflərini məhv etmək üçün nəzərdə tutulub. Qapalı mövqedən və ya birbaşa müşahidə olunan və olunmayan hədəflərə atəş aça bilir. Rusiyanın 120 mm-lik "Vena" özüyeriyən artilleriya qurğuları 1 kilometr məsafədən düşmənin möhkəmləndirilmiş atəş nöqtələrini, zirehli texnikasını və canlı qüvvəsini, minomyot batareyalarını və digər hədəflərini sıradan çıxarmaq üçün nəzərdə tutulub. Mərmi hədəfdən yayınanda növbəti mərmini hədəfə düz tuşlayan avtomatik sistemlə təchiz olunub. Ölkəmizin aldığı ağır odsaçan "Buratino" müvafiq sistemlərinin bazasında yığılıb, lakin taktiki-texniki göstəriciləri xeyli üstündür. Sistemin tərkibinə BM-1 döyüş maşını, 220 mm kalibrli 24 raket yönləndirici, nəqliyyat-doldurma maşını daxildir.

Azərbaycan Rusiyanın "Mİ-28" döyüş helikopterinə də böyük maraq göstərir. Bundan əvvəl Azərbaycan 24 ədəd "Mİ-35" zirehli hərbi döyüş helikopteri alıb. Ermənistan isə dəfələrlə Azərbaycanın Rusiyadan aldığı silahlardan narahatlığını ifadə edib. Məsələn, Ermənistan müdafiə nazirinin müavini, general-leytenant Alik Mirzabekyan bu günlərdə etiraf edib ki, Rusiyanın Azərbaycana hücum silahları satması onları narahat edir. Onun sözlərinə görə, hücum vəzifəsini həll etməyə kömək edəcək silahlar məqsədyönlü şəkildə satılıb. "Söhbət də məhz bundan gedir". A.Mirzabekyan qeyd edib ki, Rusiya Azərbaycana "Smerç" reaktiv atəş sistemləri, TOS-1A ağır alov saçan sistem, T-90 tankları, MTU-90 tank körpüsalan və digər silah növləri satıb. Onun sözlərinə görə, bütün bunlar təkcə hücum yox, həm də seçmə silahlardır. Onu adını çəkdiyi "Smerç" reaktiv yaylım atəşi sistemləri isə dünyada öz sinfində ən dəhşətli və dağıdıcı silahdır. "Smerç" sistemləri 300 millimetrlik raketlərlə atəş açır. Sistem bir neçə tip raketlə atəş aça bilir. Bunlardan biri döyüş başlığı kaset formasında olan raketlərdir. Bu raketin hər biri 7 minə yaxın ağır döyüş qəlpələri və 30 minə yaxın yüngül qəlpə daşıyan 72 döyüş elementinə malikdir.

Ağır döyüş qəlpələri düşmənin zirehli olmayan texnikasını, yüngül qəlpələr isə canlı qüvvəsini məhv etmək üçündür. Bir "Smerç" sistemi 16 raket daşıya bilir, həmin raketlər ümumilikdə 522 mindən çox qəlpə daşıyır və bu da silahın nə dərəcədə dağıdıcı gücə malik olduğunu göstərir.