Türkiyə ABŞ-ın rəhbərliyi altında İrana qarşı mümkün hərbi kampaniya üçün ehtiyat planlarını yeniləyib. Bu planlara qaçqınların kütləvi axınının qarşısını almaq üçün İran ərazisinə sızma variantları da daxildir. “Bloomberg”in məsələ ilə tanış olan şəxslərə istinadən verdiyi məlumata görə, hazırlıqlar NATO-nun Türkiyədəki hava nəzarət əməliyyatlarını Rusiyadan İrana yönəltməsi ilə əlaqədardır.
Mərkəzi Anadoluda, Konyada yerləşən alyansın ən yeni radarla təchiz olunmuş E-3A AWACS təyyarələri uzun müddətdir ki, hər iki ölkəni izləyir. Lakin məsələ ilə tanış olan və həssas təhlükəsizlik məsələsini müzakirə etmək üçün anonimlik istəyən şəxslərin sözlərinə görə, son həftələrdə İranla əlaqəli uçuşların tezliyi xeyli artıb. “Bloomberg”in məlumatına görə, Türkiyənin ABŞ-ın rəhbərlik etdiyi İrana mümkün hücuma fəal şəkildə hazırlaşması təsadüfi deyil. Rəsmilər bunun Tehranı nüvə proqramı ilə bağlı güzəştə getməyə məcbur etmək məqsədi daşıya biləcəyinə inanırlar və diplomatiya uğursuz olarsa, daha geniş hərbi kampaniyanın başlaması ehtimalı var. Mənbələrə görə, Ankara Vaşinqton və Tehranı gərginliyi artırmamağa çağırıb. Hazırlıqlar ABŞ-ın Yaxın Şərqdə iki təyyarədaşıyan gəmi və qırıcı təyyarə də daxil olmaqla əhəmiyyətli hərbi aktivlər toplamasından sonra başlayıb.
ABŞ prezidenti Donald Tramp, Amerika və İran diplomatları yeni nüvə sazişi üzrə danışıqlar aparmağa çalışsalar da, İrana məhdud hücumlar etməyi düşündüyünü bildirib. O da qeyd edilir ki, Konyadakı Hava Bazası1983-cü ildən bəri AWACS təyyarələri üçün NATO-nun əməliyyat bazası kimi xidmət edir və Alyansın Hava-Dəniz Erkən Xəbərdarlıq və Nəzarət Sistemi qüvvələri tərəfindən idarə olunan üç belə bazadan biridir. E-3A təyyarəsi yüzlərlə kilometr məsafədə təyyarələri aşkarlaya və izləyə bilir və bu da bazanı Türkiyə və ya beynəlxalq hava məkanını tərk etmədən Yaxın Şərq boyunca hava məkanını izləmək üçün strateji əhəmiyyətli bir obyektə çevirir. “Bloomberg”in məlumatına görə, Türkiyənin əsas narahatlığı kütləvi qaçqın axını perspektividir. Ankaradakı rəsmilər İranla münaqişənin çox sayda məcburi köçkünü, xüsusən də hazırda İranda yaşayan Əfqanıstan və Pakistan dvətəndaşlarını Türkiyə sərhədinə doğru itələyəcəyindən ehtiyat edir.
Samirə SƏFƏROVA
