Rusiya xarici işlər naziri Sergey Lavrov İrana daha bir hücum olacağı təqdirdə həm Yaxın Şərq, həm də Rusiya üçün ciddi nəticələr barədə xəbərdarlıq edib. Onun sözlərinə görə, ABŞ və İsrailin İranın nüvə obyektlərinə əvvəlki hücumları artıq nüvə hadisəsi üçün real risqlər yaradıb.
"Nəticələr dəhşətlidir. Artıq İrana zərbələr endirilib - MAQATE-nin nəzarəti altında olan nüvə obyektlərinə. Bildiyimiz qədəri ilə, nüvə hadisəsi üçün real risqlər var idi", - deyə Lavrov "Əl-Ərəbiyyə" televiziyasına verdiyi müsahibədə bildirib.
O qeyd edib ki, iranlı həmkarlarının fikrincə, vəziyyət az-çox normallaşıb, lakin hücumlar Tehranı agentliyin nəzarəti altında nüvə materiallarının fiziki qorunmasını nəzərdən keçirməyə vadar edib. Lavrov İsrail və ABŞ-ın bu risqləri görməzdən gəlməsindən təəssüfləndiyini bildirib. Onun fikrincə, bu cür hərəkətlər təkcə fiziki təhlükə yaratmır, həm də Nüvə Silahlarının Yayılmaması haqqında Müqavilənin nüfuzuna xələl gətirir.
Bu arada, ABŞ-ın İrana hücum gözləntiləri fonunda İsrail təhlükəsizlik xidmətləri və hüquq-mühafizə orqanları yüksək hazırlıq vəziyyətinə gətirilib. Məlumatlara görə, Vaşinqton Tehrana hücum edərsə, İsrail əməliyyata qoşulmağa hazırdır. Bölgədəki rəsmilər ABŞ-ın hücumunu praktik olaraq qaçılmaz hesab edir.
SAMİRƏ
