İlqar Hüseynov: "Bu müşavirə bəzi rayon icra hakimiyyəti başçılarının vəzifədən azad edilməsini əsaslandırmaq məqsədi daşıya bilər"
Bakı Şəhər İcra Hakimiyyətində keçirilən müşavirədə paytaxtın sanitar təmizliyi, abadlıq işləri və qanunsuz tikintilər müzakirə olunub. Toplantının yekununda Suraxanı Rayon İcra Hakimiyyətinin başçısı Adil Əliyevə rayondakı nöqsanlara görə rəsmi töhmət verilib. Xəzər Rayon İcra Hakimiyyətinin başçısı Elşən Salahova isə xəbərdarlıq edilib. Eldar Əzizov rayon rəhbərlərinə çatışmazlıqların qısa müddətdə aradan qaldırılması ilə bağlı ciddi tapşırıqlar verib və vəziyyətin nəzarətdə saxlanılacağını tapşırıb.
Bu müşavirənin nəticələri olaraq Bakı şəhərinin rayonlarında icra başçıları arasında vəzifəsindən azad edilənlər ola bilərmi?
Sosial-iqtisadi məsələlər üzrə ekspert İlqar Hüseynov məsələ ilə bağlı Bakı-Xəbər qəzetinə açıqlamasında bildirdi ki, müstəqillik dövründən bəri biz Bakı şəhərinin idarə edilməsinin daimi monitorinqini aparmışıq. Lakin biz bu sahənin mütəxəssisləri olaraq hələ indiyədək belə bir presedentə rastlaşmamışıq ki, Bakı şəhərinin icra başçısı şəhərin sanitar vəziyyəti, abadlıq işləri və qanunsuz tikintilər ilə bağlı ayrı-ayrı rayon rəhbərlərinə töhmət, şiddətli töhmət versin və ya xəbərdarlıq etsin: “Hətta bu tipli müşavirənin keçirilməsi presedenti belə olmayıb. Diqqət etməliyik ki, səbəb nədir, hansı sanitariya vəziyyətindən söhbət gedir. Əgər doğrudan da şəhərdə antisanitariya varsa, bəs burada Bakı Şəhər İcra Hakimiyyətinin məsuliyyəti nədən ibarətdir? Axı bu işə birbaşa cavabdeh olan ən böyük qurum - "Kommunal Xidmətlər Müəssisəsi" Məhdud Məsuliyyətli Cəmiyyəti Bakı Şəhər İcra Hakimiyyətinə tabedir. Tutaq ki, ayrı-ayrı rayon rəhbərlərinə qarşı tənbeh tədbirləri gördük, bəs burada Bakı Şəhər İcra Hakimiyyətinin (BŞİH) başçısı Eldar Əzizov özü səlahiyyətlərindən niyə istifadə etmir, o hara baxır? Əgər bu, BŞİH-in görəcəyi iş deyil, ayrı-ayrı rayonların görəcəyi işdirsə, onda BŞİH nəyə lazımdır?
Bu problemə belə yanaşmalıyıq ki, bu presedentin mahiyyətində nə dayanır. Ola bilsin ki, icra başçıları arasında maraq konfliktləri var və yuxarıdan verilən tapşırıq əsasında kiminsə işdən azad edilməsinə zəmin formalaşdırmaq üçün belə bir müşavirə keçirilir.
Azərbaycanda bələdiyyələr formalaşanda biz yerli özünüidarəetmə ilə bağlı Avropa Xartiyasına imza atmışıq. Xartiyanın tələblərində bilavasitə böyük şəhər bələdiyyələrinin və mer institutunun yaradılması ilə bağlı kifayət qədər öhdəliklər götürmüşük. Əgər idarəetmə sistemində yeniliyə getməsək, konstitusion islahatlarla yeni idarəetmə sisteminə keçid etməsək, böyük şəhər bələdiyyələrinin yaradılmasına başlamasaq, təbii ki, səlahiyyət bölgüsü ilə bağlı problemlərlə hələ çox üzləşəcəyik.
İstənilən rayon icra hakimiyyətinin başçısını işdən çıxarmaq, hansısa nöqsan (antisanitariya, zibilliklər, yaşıllıqların məhv edilməsi və s.) üzərindən xəbərdarlıq etmək də olar, töhmət vermək də olar.
Bakı şəhərində bu qədər yaşıllıq məhv edildi, yerində göydələnlər tikildi. Bəs onda BŞİH hara baxırdı, rayon icra hakimiyyəti başçılarını çağırıb demədi ki, bu qədər yaşıllıq zolağını niyə məhv edirsiniz?
Əslində burada müxtəlif məqsədlər ola bilər. Birincisi, bu, BŞİH tərəfindən qeyd etdiyimiz yeni idarəetmə sisteminə keçidi əsaslandırmaq üçün nəzərdə tutulmuş bir addım ola bilər. İkincisi, bu müşavirə bəzi rayon icra hakimiyyəti başçılarının vəzifədən azad edilməsini əsaslandırmaq məqsədi daşıya bilər.
Məsələn, Adil Əliyev indiki vəzifəsinə qədər daha yüksək səlahiyyətli post tuturdu - Azərbaycan Respublikasının Milli Məclisinin vitse-spikeri idi. Birdən-birə onun icra hakimiyyəti rəhbərliyinə təyin olunması müəyyən suallar doğurmuşdu. Bəlkə də belə qiymətləndirmək olar ki, bu addım onun işdən azad edilməsinə zəmin yarada bilər. Amma hər halda bunlar vəziyyətdən çıxış yolu deyil.
Bildiyiniz kimi, artıq icra hakimiyyəti qurumlarının yenidən formalaşdırılması ilə bağlı ölkə başçısının niyyəti var. Ərazi idarəetmə məsələlərində dəyişikliklər edilir, Prezident nümayəndəlikləri yaradılır. Artıq Qarabağda bir neçə rayonu birləşdirərək Prezidentin xüsusi nümayəndəlik institutları formalaşdırılıb.
Mən düşünürəm ki, mahiyyət etibarilə Bakı şəhərinin bələdiyyələşdirilməsi, böyük şəhər bələdiyyəsinin formalaşdırılması ilə bağlı konstitusiya islahatlarına gediləcək. Ən doğru yol şəhərin rayonlarının da bələdiyyələşdirilməsi prosesinə start verilməsidir. Hər bir rayon icra hakimiyyətinin səlahiyyətlərinin bələdiyyələrə ötürülməsini daha məqsədəuyğun hesab edirəm və burada niyyətin həm də bu istiqamətdə ola biləcəyini istisna etmirəm.”
Akif NƏSİRLİ
