Tibbi Ərazi Bölmələrini İdarəetmə Birliyinin (TƏBİB) icraçı direktoru Vüqar Qurbanovun vəzifəsindən azad edilməsi qərarı rəsmən elan olunsa da, səbəblər barədə heç nə deyilmədi. Sabiq rəhbər özü isə TƏBİB-in Müşahidə Şurasının qərarını “normal qarşıladığını” bildirməklə kifayətləndi.
Lakin prosesin bununla bitməyəcəyi, hətta səhiyyə sistemində həbslərin də ola biləcəyi barədə ictimaiyyətdə fikirlər dolaşır. Bu sırada ilk adı çəkilənlərdən biri isə İcbari Tibbi Sığorta üzrə Dövlət Agentliyinin rəhbəri Zaur Əliyev oldu.
Modern.az-ın əldə etdiyi məlumatlara görə, məsələ adi kadr dəyişikliyi çərçivəsindən xeyli kənara çıxır. Hətta sabiq rəhbərin yaxın günlərdə hüquq-mühafizə orqanları tərəfindən məsuliyyətə cəlb ediləcəyi, həbsinin qaçılmaz olduğu iddiaları səslənir.
Sayt bildirir ki, redaksiyaya daxil olan məlumatlarda ən ciddi məqam qurum daxilində qərarvermə mexanizmlərinin şəxsi münasibətlər üzərindən formalaşmasıdır. İddialara görə, TƏBİB-də əsas idarəçilik rıçaqları sabiq rəhbərin yaxın çevrəsinin əlində cəmləşib ki, burada artıq söhbət dövlət idarəçiliyində maraqlar toqquşmasından və vəzifə səlahiyyətlərindən sui-istifadədən gedə bilər. Bu isə hüquqi müstəviyə çıxarıla biləcək məsələdir.
Üstəlik, Vüqar Qurbanovun səhiyyə naziri postuna iddialı olması ilə bağlı da xəbərlər yayılır ki, bu halda məsələ təkcə kadr dəyişikliyi ilə yekunlaşmaya bilər.
Hazırda hüquq-mühafizə orqanlarının qurumda maliyyə intizamı, satınalmalar, kadr təyinatları və struktur qərarlarının qanunauyğunluğu ilə bağlı araşdırma apardığı iddia olunur. Bildirilir ki, audit və ya istintaq nəticəsində pozuntular aşkar edilərsə, cinayət işinin başlanması istisna deyil.
Əli TURABOV
