Azər Həsrət: “İndi məsələ ciddiləşib, dövlətin müvafiq qurumları vəziyyəti nəzarətə alıb, günahkarlar öz cəzasını çəkəcək”
Azərbaycan Respublikasında fəaliyyət göstərən bəzi qeyri-hökumət təşkilatları tərəfindən qanunsuz olaraq müxtəlif adda orden və medallar təsis edilərək ayrı-ayrı şəxslərə verilməsi faktları ilə bağlı Baş prokuror yanında Korrupsiyaya qarşı Mübarizə Baş İdarəsində cinayət işi başlanaraq ibtidai istintaq aparılır.
Beləliklə, bir qrup QHT qanunvericiliyin tələblərini sərt şəkildə pozub. Həmin QHT-lər açıq-aşkar surətdə qanundan kənara çıxmaqla müxtəlif adda çoxsaylı orden, medal və döş nişanları təsis edib, həmin orden medal və döş nişanlarını şəxsi münasibətlərə görə, eləcə də, müxtəlif məbləğlərdə pul vəsaiti qarşılığında çoxsaylı şəxslərə təqdim ediblər. Məlumata görə, həmin medal və ordenlər şəxslərə müəyyən vəsait qarşılığında verilib. Maraqlıdır, saxta orden, medal alan şəxslər məsuliyyətə cəlb oluna bilərmi?
“İctimai birlik quran bəzi şəxslər bazar açıb orden və ya vəsiqə satışı ilə məşğul oldu, bu kimi iyrənc hadisələrə son qoyulmalı idi”
Siyasi şərhçi Azər Həsrət baki-xeber.com-a açıqlamasında bildirdi ki, bu məsələ yeni deyil: “Bir zamanlar bəzi “media adamları” 20-30 manat müqabilində jurnalistlərə “qızıl qələm” mükafatı verirdilər. Bu mükafatı pul qarşılığında alanlar da özlərini böyük adam sanırdı. Ancaq zamanla hər bir fakt ortaya çıxdı. Məlum vəziyyətlə bağlı illərdir biz irad bildiririk, çağırışlar edirik, ancaq ciddiyə alan olmayıb. Sevindirici haldır ki, indi məsələ ciddiləşib, dövlətin müvafiq qurumları vəziyyəti nəzarətə alıb. Günahkarlar öz cəzasını çəkəcək. Ordeni, mükafatı Prezident və ya hansısa qurumun rəhbəri verməlidir, hansısa QHT rəhbəri yox. İctimai birlik quran bəzi şəxslər bazar açıb orden və ya vəsiqə satışı ilə məşğul oldu. Bu kimi iyrənc hadisələrə son qoyulmalı idi”.
Həmsöhbətimiz onu da əlavə etdi ki, bu gün jurnalistikaya aidiyyəti olmayan çoxlu sayda şəxs “Jurnalistlər Birliyinin” vəsiqəsinin daşıyır: “Müxtəlif zamanlarda yoldan ötən, bu sahəyə aid olmayan şəxslər adıçəkilən vəsiqəni əldə edib. Bu sahəyə də nəzarət edilsə, yaxşı olar”.
Günel CƏLİLOVA
