2023-cü il noyabrın 25-də Azərbaycan Hakimlər İttifaqı İctimai Birliyinin təşəbbüsü ilə Gəncə şəhərində, Gəncə Apellyasiya Məhkəməsinin yurisdiksiyasına daxil olan məhkəmə hakimlərinin iştirakı ilə seminar keçirilib. E-huquq.az-ın məlumatına görə, Azərbaycan Hakimlər İttifaqı İctimai Birliyinin sədri Ramiz Rzayev seminarı açaraq bildirib ki, Ulu Öndər Heydər Əliyevin rəhbərliyi ilə ölkəmizdə hazırlanmış və 1995-ci ildə ümumxalq səsverməsi yolu ilə qəbul edilmiş Azərbaycan Respublikasının Konstitusiyası Azərbaycan xalqının hüquqi, demokratik, dünyəvi dövlət qurmaq niyyətini bəyan etmiş, insan hüquqlarının təmin edilməsini dövlətin ali məqsədi kimi təsbit etmiş, xüsusən də məhkəmə hakimiyyətinin müstəqilliyini təsbit edərək, hakimlərin işlərə qərəzsiz, ədalətlə, tərəflərin hüquq bərabərliyinə, faktlara əsasən və yalnız qanunlara tabe olmaqla baxacaqlarını müəyyən etmişdir.
Ötən müddət ərzində məhkəmə-hüquq sisteminin inkişafı üçün qətiyyətli və davamlı islahatlar aparılmış, ölkə Prezidenti cənab İham Əliyevin 03 aprel 2019-cu il tarixdə imzaladığı "Məhkəmə-hüquq sistemində islahatların dərinləşdirilməsi haqqında" Fərmanı ilə ədalət mühakiməsinin gələcək inkişafının yol xəritəsi müəyyənləşdirilmişdir. Fərmana əsasən müasir dövrün tələblərinə cavab verən, cəmiyyətdə yüksək nüfuza malik ədalət mühakiməsi formalaşmalı, bunun üçün məhkəməyə müraciət etmə imkanları əl çatan olmaqla genişləndirilməli, məhkəmələrin fəaliyyətində şəffaflıq artırılmalı, məhkəmə icraatının səmərəliliyi yüksəldilməli, məhkəmə qərarlarının icra edilməsi təmin olunmalı, süründürməçilik halları aradan qaldırılmalıdır.
Daha sonra seminarda Azərbaycan Respublikası Ali Məhkəməsinin hakimləri Tahir Kazımov "Narkotiklərlə mübarizəyə dair qanunvericiliyin tətbiqi zamanı məhkəmə təcrübəsində qarşılaşılan problemlər", Abiddin Hüseynov "Ər-arvadın ümumi əmlakının bölünməsi ilə bağlı mübahisələrdə qanunvericiliyin tətbiqi məsələləri", Bəhram Məmmədli "Müflisləşmə və iflas proseduru ilə bağlı işlərin araşdırılması xüsusiyyətləri" mövzisinda məruzələrlə çıxış ediblər.
Seminarda mövzularla bağlı səmərəli diskussiya aparılıb, verilmiş suallar ətraflı cavablandırılıb.
Mətləb
