Ermənistan aclıq şousu düzəldib, ondan istifadə etməklə Azərbaycana qarşı hansı təxribatları həyata keçirmək istəyir?
Birincisi, Azərbaycanı ləkələmək, ermənilərə qarşı etnik nifrətdə, milli dözümsüzlükdə, qeyri-humanist davranışlarda suçlamaq və Qarabağdakı erməni icmasının hüquq və təhlükəsizliyinə Azərbaycan tərəfindən verilən dövlət zəmanətinin dəyərini və sanbalını mənasızlaşdırmaq və heçə endirmək məqsədi güdür.
İkincisi, Ermənistan aclıq şousundan istifadə etməklə, onu sülhə məcbur edən dövlətlərə həzm etdirməyə çalışır ki, Azərbaycan torpaqlarının 30 illik işğalının məqsədi, onun torpaq bütünlüyünə qarşı təcavüz müharibəsi yox, guya ermənilərə patoloji nifrəti olan azərbaycanlılardan məcburi müdafiə olunmaq üçün yaratdığı təhlükəsizlik zolağı idi.
Üçüncüsü, Azərbaycanı qeyri-humanist addımlar atmaqda günahlandırmaqla, ölkəmizi beynəlxalq qınağa tuş gətirib, Xankəndi-Bakı təmasını beynəlxalq müstəviyə keçirməyə və beynəlxalq güclərin iştirakını təmin etməyə, bununla da Xankəndindəki separatçı ermənilərin quldur rejimini danışıqların subyektinə çevirib leqitimləşdirməyə nail olmaqdır.
Dördüncüsü, aclıq şousunu eninə-boyuna tiirajlayıb, Azərbaycana qarşı BMT TŞ-nın qətnamə qəbul etməsinə nail olmaq və bununla da 44 günlük müharibənin Ermənistanın kürəyinə yüklədiyi öhdəlikləri yerinə yetirməkdən boyun qaçırmağa və Laçın Sərhəd Keçid Məntəqəsinin ləğv edilməsinə müvəffəq olmaqdır.
Və nəhayət, beşincisi, Ermənistan hakimiyyətinin Rusiyanın qarşısında keçirdiyi potensial devrilmə və fiziki məhvedilmə qorxusundan, eyni zamanda Azərbaycanın irəli sürdüyü sülh şərtlərindən doğan məğlubiyyət zorundan xilas olmaq üçün bölgəyə beynəlxalq güclərin gəlməsini təmin edib, hər şeyin sıfırdan başlanmasına nail olmaqdır.
Qarabağda "humanitar fəlakət və aclıq" şousunun senari müəllifi və memarı Fransa prezidenti Makrondur, şounun icraçısı Paşinyan hökumətidir, bu şoudan qeosiyasi sələm götürməyə çalışanlardan biri isə Rusiyadır.
Bu şounun ən dramatik nöqtəsi isə Ermənistanın bu "humanitar fəlakət" oyununu BMT TŞ-na çıxarmaqdır. Bu oyunda da Fransa aktiv şəkildə iştirak edir və pərdəarxası məqamlarda Ermənistana əlindən gələn yardımı edir.
Ermənilərin senarisi ilə BMT Təhlükəsizlik Şurası indiki məqamda antiazərbaycan yükümlü qətnamə çıxara bilərmi? Əlbəttə, nəzəri cəhətdən hər şey mümkündür, üstəlik nəzərə alsaq ki, Təhlükəsizlik Şurasının iki daimi üzvü olan Fransa və Rusiya ermənilərin əbədi çobanlarıdır və Qarabağdakı erməni separatçılarını göz bəbəyi kimi qorumağa çalışırlar, bizə qarşı neqativ qərarın çıxması hər zaman mümkündür. Ancaq praktik cəhətdən məsələlər daha mürəkkəbdir.
ABŞ-ın mövqeyi bu gün heç bir coğrafiyada Rusiyanın mövqeyi ilə üst-üstə düşmür. Afrikada da, Avropada da, postsovet məkanında da bu iki dövlətin strateji maraqları kəskin ziddiyyət təşkil edir. Üstəlik, Ermənistanın Güney Qafqazdakı qələbəsi birbaşa Rusiyanın və İranın qələbəsi sayılır. Digər tərəfdən ABŞ Avropanın enerji təhlükəsizliyinin təmin olunması müstəvisində Azərbaycanın ən etibarlı tərəfdaş olduğunu daim dəyərləndirir və Azərbaycanın enerji layihələrini müdafiə edir. ABŞ Azərbaycanın sülh şərtlərini də qəbul edir və dəstəkləyir. Bir tərəfdən də ABŞ -da fəaliyyət göstərən yəhudi lobbisi Azərbaycanın tərəfindədir və mütləq nəzərə alınacaq gücdür. Belə olan halda niyə ABŞ erməni layihəsinə səs versin?
Böyük Britaniya Azərbaycanla sıx enerji ittifaqındadır, Türkiyə ilə regional əməkdaşlıq sahəsində bir müstəvidə addımlayır. Ukrayna cəbhəsində Rusiyanın məğlubiyyətini ən çox istəyən Avropa dövlətidir. Bundan əlavə, Böyük Britaniya Fransanın hər zaman separatçılıqla məşğul olduğunu, daim Böyük Britaniya-ABŞ birliyinə qarşı Rusiyanın destruktiv oyunlarını və Avropanı parçalamaq niyyətlərini müdafiə etdiyini detallı şəkildə bilir və ona müqavimət göstərir. Ermənilərin "humanitar fəlakət " oyununun arxasında Fransanın durduğunu bilən Böyük Britaniya, İranın və Rusiyanın qələbəsini təmin edəcək erməni layihəsinə niyə səs versin?
Fransa birmənalı şəkildə erməni layihəsinə dəstək verəcək, ancaq Afrikada Rusiya ilə açıq qarşıdurmada olan Fransanın erməni layihəsinə Rusiya səs verəcəkmi? Fransanın erməni oyunu Rusiyanın Qafqazdakı təkbaşına hökmranlıq niyyətlərinin əleyhinə yönəlib və Makron-Paşinyan cütlüyünün bütün siyasi oyunları Kreml tərəfindən qəzəblə qarşılanır. Rusiya onun nəzarətindən kənarda Ermənistanın qurduğu kombinasiyaları qətiyyətlə rədd edir. Belə olan halda Rusiya BMT-də erməni layihəsinə niyə səs versin?
Və nəhayət, Çin. Çin Orta Asiyanı və Azərbaycanı "Bir kəmər, bir yol" layihəsinin ən vacib oyunçuları sayır və Qüney Qafqazın sakit, çiçəklənən bir bölgəyə çevrilərək, Çinin Avropa ilə nəqliyyat loqistikasını təmin edən bir qovşağa çevrilməsində maraqlıdır. Bu isə Azərbaycanın təklif etdiyi sülh layihəsindən kənarda mümkün deyil. Üstəlik, Çin Ermənistanı silahlandıran Hindistanla deyil, Azərbaycanı qardaş dövlət sayan Pakistanla birlikdədir. Belə olan halda Çin niyə erməni layihəsinə səs versin?
Deyilənlərdən çıxan məntiqi nəticə odur ki, "humanitar fəlakət" oyununun müəllifləri Paşinyan və Makron sonuncu BMT şousundan da ağır məğlubiyyətlə çıxacaqlar.
Politoloq Mehman İsmayılov
