Nizami Hüseynov: “Sertifikasiyada nəticə göstərə bilməyən müəllimlərin təhsildən kənarlaşdırılması…”
"Keçən il sertifikasiyadan kəsilmiş müəllimlər yenidən uğursuz olsalar, onların əmək müqaviləsinə xitam verilə bilər". Bunu Təhsil İnstitutunun direktoru Rüfət Əzizov deyib. O bildirib ki, bu, güzəşt tətbiq edilmiş müəllimlərə şamil deyil: "Kimlərə güzəşt nəzərdə tutulduğu qaydalarda öz əksini tapıb”.
Qeyd edək ki, son illər müəllim peşəsi üzrə məzunların çoxalması nəticəsində işsiz müəllimlərin sayının artdığı deyilirdi. Hazırda isə ölkədə təhsilverənlərin peşəkarlıq səviyyələrinin və peşə yararlılıqlarının yoxlanılması məqsədilə sertifikasiya tətbiq olunur.
Həmin sertifikasiyanın tələblərinə uyğun olaraq bəzi müəllimlərin əmək müqaviləsinə xitam veriləcəyi təqdirdə bu, işsiz müəllimlər ordusunun yaranmasına gətirib çıxarmayacaq?
“Sertifikasiya məsuliyyət hissidir, məqsəd heç də müəllimlərin işdən azad edilməsi deyil”
Təhsil eksperti Nizami Hüseynov qeyd etdi ki, sertifikasiyadan keçə bilməyən müəllimlərin gələcək taleyi hər kəsi maraqlandırır: “Sertifikasiyada nəticə göstərə bilməyən müəllimlərin təhsildən kənarlaşdırılması ilə bağlı və ümumiyyətlə, onlara gələcəkdə dərs verilməməsi ilə bağlı fikirlər doğru fikirlərdir. Bilirsiniz ki, sertifikasiyanın ilkin mərhələsi təxminən 11 mindən çox ibtidai sinif müəllimini əhatə edib. Bu prosesin nəticələrini analiz edərkən biz çox fərqli, həmçinin narahatedici məqamları görə bilərik. Belə ki, sertifikasiyadan müəllimlərin ¼ hissəsi, təxminən 24 faizi kifayət qədər aşağı nəticə toplayıb. Bəzi müəllimlər çox sadə suallara cavab verə bilməyiblər və hesab edirəm ki, həmin müəllimlər tədris prosesinə buraxıla bilməz. Əslində sertifikasiya bir çox mətləblərə aydınlıq gətirdi. Düşünürəm ki, həmin müəllimlərə ikinci dəfə şans vermək olar. Amma gələcəkdə bütövlükdə respublika üzrə sertifikatlaşmanın geniş tətbiqi baş tutacaqsa, biz daha real həqiqətləri görəcəyik. Hətta düşünürəm ki, aşağı nəticə göstərən müəllimlərlə bağlı faiz daha da arta bilər. Bu prosesdə daha aşağı nəticə göstərəcək rayonlar bəllidir.
Sertifikasiya kiminsə istəyindən, arzusundan asılı olmayaraq keçirilməlidir. Nazirin də qeyd etdiyi kimi, “şaftalı” sözünü yaza bilməyən, kvadratın sahəsini hesablaya bilməyən müəllimlər var. Əsas niyyət kimisə işdən azad etmək deyil. Sertifikasiya məsuliyyət hissidir. O ki qaldı son bəyanatlara, məqsəd heç də müəllimlərin işdən azad edilməsi deyil”.
Günel CƏLİLOVA
