11/07/2020 04:29
728 x 90

Naxçıvana təyyarə uçuşlarının bərpası həyati zərurətə çevrildi...

img

Məlum olduğu kimi, 2020-ci il aprel ayının 5-də COVID-19 infeksiyasının yayılmasının qarşısının alınması məqsədilə Naxçıvan-Bakı-Naxçıvan istiqamətində təyyarə reysləri dayandırılıb. Bakı şəhərində Naxçıvan Muxtar Respublikasının daimi nümayəndəliyinin rəhbəri Bəxtiyar Əsgərov nümayəndəliyə olan çoxsaylı müraciətlərlə bağlı Azərbaycan Respublikası Nazirlər Kabineti yanında Operativ Qərargaha Naxçıvan-Bakı-Naxçıvan istiqamətində təyyarə reyslərinin açılması ilə əlaqədar olaraq məktubla müraciət edib. Bu barədə daimi nümayəndəliyin rəsmi saytında məlumat yerləşdirilib.

Məlumdur ki, muxtar respublikanın ölkəmizin paytaxtı ilə yeganə çıxış yolu olan hava nəqliyatından istifadəsinin mümkünsüzlüyü ora ilə əlaqəsi olan vətəndaşlarımız üçün ciddi problemlər yaradır.  Həmin istiqamətdə aviareyslərin bərpası ilə bağlı səslənən təklifə münasibət öyrənmək üçün əslən Naxçıvandan olan AMİP funksioneri Rəşad Bayramovun fikirlərini öyrəndik.

  • Naxçıvanla hava məkanının açılması olduqca vacibdir, çünki...

O, “Bakı-Xəbər”ə açıqlamasında bildirdi ki, pandemiya ilə bağlı tətbiq edilən karantin rejiminin ilk günlərində müxtəlif istiqamətlər üzrə aviareyslərin təxirə salınması, o cümlədən də Bakı-Naxçıvan və Naxçıvan-Bakı istiqamətində uçuşların dayandırılması, təbii ki, başadüşülən idi:”Lakin artıq 2 aya yaxın vaxt keçib və Operativ Qərargah tərəfindən karantin rejiminin yumşaldılması ilə bağlı verilən qərərların yerli aviareyslərə tətbiq olunmaması başadüşülən deyil. Xüsusilə də Naxçıvanla hava məkanının açılması olduqca vacibdir. Çünki digər bölgələrimizdən fərqli olaraq, Naxçıvanın Bakı ilə, Azərbaycanın digər bölgələri ilə quru əlaqəsi yoxdur. Əvvəllər Naxçıvana getmək üçün heç olmasa İran ərazisindən keçmək mümkün idisə, indi sərhədlərin bağlanması səbəbilə bu da imkansız olub. Nəticədə 2 aya yaxındır ki, bu və ya digər səbəbdən Naxçıvanda olan insanlar geri qayıda, Bakıda olanlar isə Naxçıvana gedə bilmir. Bu da, təbii ki, onsuz da blokada şəraitində yaşayan Naxçıvanda əhalinin vəziyyətini daha da çətinləşdirir. 30 ildir blokada şəraitində yaşayan Naxçıvanın bu illər ərzində ən azından təyyarə vasitəsilə Bakı ilə daimi əlaqəsi olub, lakin indi bu imkandan da məhrum olublar. Vətəndaşlarımız dünyanın o başından belə cənazələrini Azərbaycana gətirə bildikləri halda, Naxçıvan əhalisi bu imkandan da məhrum olub. İnsanlar var ki, ailə üzvlərinin, yaxınlarının dəfnində belə iştirak edə bilmir. Bu baxımdan da Naxçıvan Muxtar Respublikasının Bakı şəhərindəki daimi nümayəndəliyinin rəhbəri Bəxtiyar Əsgərovun müraciəti başadüşüləndir. Nümayəndəliyin qarşısında hər gün yüzlərlə insan toplaşaraq Naxçıvana getmək üçün kömək istəyir. Bəxtiyar Əsgərov da onların müraciətlərini cavablandırmaq məcburiyyətindədir. Buna görə də belə bir müraciətin olması zəruri idi və mən də mətbuat vasitəsilə Naxçıvandan seçilmiş millət vəkillərinə müraciət edərək, bu bölgənin insanlarının düşdükləri vəziyyətlə bağlı müvafiq qurumlar qarşısında məsələ qaldırılmasını istəyirəm. Operativ Qərargah da, qərar vermək səlahiyyəti olan digər qurumlar da başa düşməlidirlər ki, bu gün Naxçıvanı Bakı ilə bağlayan yeganə nəqliyyat vasitəsi təyyarədir və insanları bu imkandan məhrum etmək olmaz”.

Məhəmmədəli QƏRİBLİ

 

Son xəbərlər