"Tək may ayı ərzində Ümumdünya Səhiyyə Təşkilatının baş direktorunun Prezident Əliyevə iki dəfə rəsmi məktub yazması özlüyündə tarixi əhəmiyyətli faktdır. Baş direktorun məktubları Azərbaycana çox mühüm tətəfdaş kimi baxıldığının və bu əməkdaşlığın gələcək formalarını axtarmaq səylərinin bariz göstəricisidir. Baş direktorun qısa zamanda iki məktubu koronavirusla mübarizədə ilk növbədə Azərbaycanın və Prezident Əliyevin əldə etdiyi nəticələrə, ÜST ilə fəal donorluq münasibətlərinə, eləcə də başqa ölkələrə göstərdiyi yardıma və dövlətlərin səylərini əlaqələndirmək sahəsində göstərdiyi fəaliyyətlərə verilən qiymətdir. Ancaq bunlardan başqa, məktubların mahiyyəti daha uzağa gedən məqsədlərlə də bağlıdır".
Bu fikirləri "Bakı-xəbər" Media qrupunun təsisçisi və baş redaktoru, politoloq Aydın Quliyev deyib.
Politoloqun sözlərinə görə, dünyanın bütün mənalarda artıq koronavirusdan sonrakı dövr üçün hazırlıqlar görməsinin əlamətləri ortadadır:"Beynəlxalq münasibətlərin hüquqi norma və prinsipləri, iqtisadi və ticarət münasibətləri, müxtəlif mərkəzlər arasında güc nisbətləri, investisiya qaydaları, humanitar-mədəni əməkdaşlıqlar nəzərəçarpan dəyişikliklərə məruz qalacaq, artıq bunun qaçılmaz olduğunu hər kəs qəbul etməyə başlayır.
Mühüm dəyişikliklərdən biri Ümumdünya Səhiyyə Təşkilatının özünün strukturu və fəaliyyət prinsipləri ilə bağlı olacaq. Faktdır ki, pandemiyanın ilk mərhələsində dövlətlərin çoxunun fəaliyyəti xaotik şəkildə idi və müəyyən vaxtdan sonra məhz ÜST-nin səyləri nəticəsində koronavirusa qarşı birgə müqaviməti təşkil etmək və koordinasion formaya keçirmək mümkün oldu. Hətta bu şəraitdə də ÜST-nin vəziyyəti tam koordinasiyalı səviyyəyə çatdırmaqda çətinlikləri üzə çıxdı. İlk əvvəldən ÜST-nin koordinasiya etmək imkanları və səlahiyyətləri yetərli olsaydı, pandemiyanın tam nəzarətə alınması daha optimal müddətlərdə mümkün olardı. Halbuki, bütün dünya ölkələri üzrə yoluxma və müalicə dinamikaları arasında balans yaratmaq çox sonralar mümkün oldu. Bir vaxtlar bir ölkədə yüzlərlə meyit bir gündə dəfn olunduğu halda, pandemiyanı qeyri-ciddi xəbər sayan ölkələr var idi. Gec də olsa, bütün ölkələr üzrə pandemik durumu təxminən oxşar vəziyyətlərə gətirmək mümkün oldu. Bu, Azərbaycan kimi tək-tək fədakar və uzaqgörən ölkələrin səyləri hesabına olmaqla, həm də ÜST-nin zəruri xidmətlərinin nəticəsi sayılmalıdır".
Aydın Quliyev bildirib ki ,ÜST Azərbaycanın milli, regional və qlobal miqyasda pandemiya əleyhinə gördüyü tədbirlərin bəşəri sağlamlıq üçün necə dəyərli olduğunun fərqinə anındaca vardı. "ÜST baş direktoru Prezident Əliyevə bu sözləri heç də təsadüfən yazmır. Baş direktor pandemiyadan sonra da Azərbaycan və onun Prezidenti ilə milli, regional və qlobal miqyasda koronavirusa qarşı mübarizə məsələsində əməkdaşlıq etməyə hazır olduğunu bildirib. Bu o deməkdir ki, ÜST postpandemiya dövrünün bütün istiqamətlərdə proseslərində Azərbaycana sabit, etibarlı, iş görməyi bacaran və təcrübəli ölkə kimi baxır.
Məhz ÜST baş direktorunun məktubu əsasında qəti fikir yürütmək olar ki, postpandemiya dövründə ÜST dünyanın ən nüfuzlu təşkilatına çevriləcək, onun səlahiyyət və təsir imkanları artacaq. Gələcəkdə daha da güclənən ÜST-nin ən güclü tərəfdaşlarından birinin Azərbaycan olacağına şübhə yoxdur. Bu gün Azərbaycan Prezidenti ölkəmizi gələcək dünya səhiyyəsinin həlledici tətkib hissəsinə çevirə bilən proseslərin əsasını qoyur. ÜST baş ditektorunun İlham Əliyevə iki məktubunun mahiyyəti bunlardan ibarətdir".
Baki-xeber.com
