“Bakı Xəbər” qəzetinin və eyniadlı saytın baş redaktoru, politoloq Aydın Quliyev özünün facebook səhifəsində 24 aprel – ermənilərin əsassız “genosid” uydurmasının 105-ci ildönümü münasibətilə ABŞ prezidenti Donald Trampın və Fransa prezidenti Emmanuil Makronun ermənilərə müraciətilə bağlı fikirlərini bölüşüb. Əsaslı tarixi gerçəkliklərə istinad edən politoloq yazır:
Əvvəlcə ABŞ prezidenti D.Trampın qondarma “genosidin” 105 illiyi ilə bağlı ermənilərə məktubundan bəzi fikirləri deyim. Cənab Tramp yazır ki, milyon yarım erməni Osmanlı dövləti tərəfindən qətl və deportasiya olundu. I Dünya müharibəsi vaxtı Türkiyədə milyon yarım erməninin yaşaması məlumatının özü alimlər tərəfindən inandırıcı faktlarla rədd edildiyi halda, bu qədər erməni necə qətl edilə bilərdi?! 100 il sonra indi-indi Ermənistanda erməninin sayı 2,5 milyona çatdırılıbsa, o zaman Türkiyədə 1,5 milyon erməni nə gəzirdi? Tramp daha sonra ermənilərə və suriyalılara kömək üzrə Erməni Milli Komitəsinin (?) qurucularına təşəkkür edir ki, “siz qaçqın ermənilərə Amerikada sığınacaq verib himayə etdiniz...” Həqiqətən də 1890-cı illərdən, yəni I Dünya müharibəsindən çox əvvəl Osmanlıdan ABŞ-a ermənilərin köçünün təşkil başlayıb, bəli, məhz təşkili... I Dünya müharibəsi zamanı isə bu proses daha da intensivləşdirildi. İndi bizim tarixçilər buyurub Trampın qabağına fakt qoysunlar ki, bu erməni köçünü kim və niyə təşkil edirdi... Mən ipucu verə bilərəm. I Dünya müharibəsindən sonra böyük Atatürkün murdar kağız parçası kimi cırıb ayaqlarının altına atdığı “Sevr müqaviləsi” əsasında Şərqi Anadoluda 6 Türk vilayəti hesabına qondarma erməni dövləti qurmaq üçün əldən-ayaqdan gedən “Vilson planı”nın arxasında kimlər var idisə, onlar idi saxta erməni köçünü təşkil edənlər. 1895-ci ildə Osmanlıda guya erməni “soyqırımı” barədə bir Amerika missionerinə (mən adını indi unutmuşam, ancaq dəyərli izləyicilərimə onun adını mütləq təqdim edəcəm) saxta faktlar əsasında ilk kitab yazdıranlar və elə bu ildə də məsələni tarixdə ilk dəfə Amerika konqresinin müzakirəsinə çıxaranlar idi Osmanlı dönəmində saxta erməni köçünü təşkil edənlər... Plan Osmanlını dövlət vahidi kimi parçalamaq, bu mümkün olmadıqda isə (necə ki, mümkün olmadı) gələcək Türkiyə dövləti əleyhinə ağır ittiham platforması yaratmaq idi. Tarixçilərimiz gərək bu faktları cənab Trampa təqdim etsinlər və bütün dünya görsün ki, erməniləri 100 il əvvəl “öldürən” də, bu gün onlara çirkab rəngində göz yaşları ilə “yas tutanlar” da eyni qüvvələrdir. Əvvəlcə ermənilərin Osmanlıdan saxta köçünü təşkil edərək, ardınca da “Türklər genosid törətdi” kimi hay-küyə başladılar... 1890-cı illərdə bu saxta köç oyununu əvvəlcə Osmanlıdakı yunanların üzərində qurmaq istəyirdilər, yunan Pravoslav kilsəsi “bizim dini hakimiyyət coğrafiyamıza müdaxilə etməyin” bəyanatı verən kimi planlar bütün tarixi şəraitlərdə hamıya satılmağa ən hazır toplum sayılan ermənilərin üstünə yönləndirildi. IV-VI əsrlərdə Bizansla Sasani dövləti arasında min cür xəyanət oyunlarına gedən ermənilər deyildimi? Şübhəsi olanlar ermənilərin hər il göz yaşları ilə qeyd etdikləri “Müqəddəs Sarkis” əfsanəsinin motivlərinə bir daha baxsınlar. VI əsrdən başlayaraq ermənilərin bu dəfə ərəblərlə Bizansın arasında hansı xəyanət oyunları oynadıqlarını da əlavə edək. Zəncir bitmir, davamı da var. Ermənilərin üstündə 100 il əvvəl saxta köçün təşkili kimi oyun oynayanların, heç şübhəsiz, tarixdəki toplum – erməni xəyanətlərindən dəqiq xəbərləri var imiş... Yunanlar getmədi, ermənilər 100 il əvvəl bu oyuna getdi...
Keçək Fransa prezidenti Makronun ermənilərə 24 aprel məktubuna. Dünya tarixində misilsiz bir yalanın üzdəniraq simvolu olan 24 apreli Fransada rəsmən “Xatirə günü” elan etməsi ilə “qürur” duyan Makron daha bir saxta fakt da uydurub. Makron yazıb ki, Konstantinopolda (İstanbul yazmağa əli və dili gəlmir) 600 erməni ziyalısının qətli ilə guya 24 aprel “genosidi” başladı. Rüsvayçılığa baxırsınızmı? Türk dünyasının tarix araşdırmaçılığı ilə məşğul olan bütün alimlərdən soruşuram ki, indiyə qədər belə “fakt” eşitdinizmi? Makronun yarımçıq və motivi kirli maliyyə mənbələrinə bağlı “biliklərini” alt-üst etməyi də dəyərli alimlərimizin ixtiyarına buraxdım. Ancaq mən “nələrəsə” xidmət edən yox, xalis elmə xidmət edən alimlərimizi nəzərdə tuturam.
Nəhayət, Makronun “105 illik məktubundan” son İBRƏTAMİZ məqamı da xatırladım. “Prezident-alim” yazır ki, hansı çətinliyin olmasından asılı olmayaraq, Fransa həmişə Ermənistanın yanındadır. Yəni diplomatik dildə desək, tək “genosid” məsələsində yox, hər şeydə...
Bütün bunlara rəğmən, Qarabağ məsələsinin həllində “obyektiv vasitəçi” olaraq Fransaya bəslənilən ümidlərin əsası və gələcəyi varmı...
