Çinin Uhan şəhərində ortaya çıxan və minlərlə insanın ölümünə səbəb olan koronavirus (Covid 19) sürətlə bütün dünyaya yayılır. Mənbəyi barədə bir neçə versiya irəli sürülən virus Azərbaycanın sərhədlərinə qədər gəlib çatıb.
Baki-xeber.com xəbər verir ki, qonşu İranda bir neçə gün əvvəl 2 nəfərin öldüyü, 18 nəfərin virusa yoluxduğu açıqlanmışdı.
Bu gün isə İranda koronavirusdan ölənlər və virusa yoluxma şübhəsilə bağlı ən son rəqəmlər açıqlanıb. İranın səhiyyə naziri Said Nemeki koronavirusdan ölənlərlərin sayının 5-ə çatdığını və 18 nəfərin yoluxduğunu deyib. Nazir daha 750 nəfərin virusa yoluxduğu şübhəsinin olduğunu bildirib.
Onu da qeyd edək ki, koronavirus bütün dünyada yayılmağa davam edir. Ən son İsrail və Livanda da virusa yoluxanların olduğu ortaya çıxıb.
Bundan əvvə İranın Səhiyyə, Müalicə və Tibbi Təhsil Nazirliyinin mətbuat xidmətinin müdiri Kiyanuş Cahanpur 13 nəfərin yeni koronavirusa yoluxduğunu açıqlamışdı. Onun sözlərinə görə, bu rəqəm aparılan analizlərin nəticəsində əldə olunub. Cahanpur əlavə edib ki, virusa yoluxanların əksəriyyəti Qum şəhəri sakinidir və ya son günlərdə bu şəhərə səfər edənlərdir.
Nazirlik rəsmisi qeyd edib ki, 13 nəfərin 7-si Qum şəhəri, 4-ü Tehran, 2-si isə Gilan vilayətindədir.
Cahanpur deyib ki, Ərak şəhərində koronavirus şübhəsi ilə əlaqədar 8 nəfərin bu virusa yoluxmadığı bəlli olub. Ərak şəhərində virusa yoluxan həkimin vəziyyəti ötən günlə müqayisədə yaxşıdır.
Nazirlik rəsmisi ötən günlər ərzində 735 nəfərdən çox şəxsin yeni koronavirus şübhəsi ilə xəstəxanada yatırıldığını deyib.
Rəsmi İRNA xəbər agentliyi iki gün əvvəl, virusun İranda ilk dəfə görüldüyü müqəddəs Qum şəhərində bütün məktəb və universitetlər, dini şiə seminariyalarının bağlandığını bildirib. Digər xəbərlərdə isə İranın bu yaxınlarda epidemiyanın mərkəzi, Çinin Uhan şəhərindən 60 iranlı tələbəni təxliyə etdiyi bildirilib.
Paytaxt Tehrandan təqribən 140 kilometr cənubda yerləşən Qum İran, İraq, Pakistan və Əfqanıstandan gələn şiə müsəlmanların müqəddəs yeri və dini araşdırmalar mərkəzidir.
İranın səhiyyə nazirinin müavini Məhəmməd Mehdi Guya virusa yoluxanların Çin vətəndaşları ilə hər hansı bir əlaqəsi olmadığını deyib. İran hökuməti xəstəliyin mənşəyini və bunun Pakistan və ya digər ölkələrdən gələn dini zəvvarlarla əlaqəsi olub-olmadığını araşdırır.
