Ukrayna Təhlükəsizlik Xidməti Kerç boğazında Ukrayna bayraqlı gəmilərin keçişinə mane olduğuna görə, Rusiyaya məxsus tankeri saxlayıb.
Baki-xeber.com xəbər verir ki, Kiyevin yaydığı rəsmi açıqlamada, Rusiya tankerinin Odessa vilayətində yerləşən "İzmail" limanına “Nika Spirt” adı ilə daxil olduğu deyilir.
Qeyd edilir ki, gəminin adı noyabr ayında Kerç boğazında iki ölkə arasında insident zamanı “Neyma” olub, sonradan isə dəyişdirilərək “Nika Spirt” adı verilib. Tankerin Kerç boğazında Ukrayna gəmilərinin yolunu bağladığına görə saxlanıldığı iddia edilir. Ukrayna Təhlükəsizlik Xidməti, hərbi prokurorlar və sərhədçilər gəmidə axtarış aparıblar, personal saxlanııb. Onların sırasında bir kontr-admiral, iki vitse-admiral və bir general-polkovnik var.
Gəminin maddi dəlil olduğu qeyd olunub və ona həbs qoyulması üçün vəsatət hazırlandığı bildirilib.
Rusiya Müdafiə Nazirliyi isə bəyan edib ki, rus personalın hər hansı biri həbs olunarsa, Ukrayna bunun nəticələrinə qatlaşmalı olacaq.
Moskva Rusiya bayrağı altında üzən tankerin Odessadakı "İzmail" limanına təmir üçün getdiyini bildirib.
Sonradan isə TASS agentliyi məlumat yayıb ki, Rusiya səfirliyi Ukrayna tərəfindən saxlanan tankerin personalının sərbəst buraxıldığını, Moldova vasitəsilə Moskvaya yola salındığını açıqlayıb. Gəmi isə limanda saxlanıb.
Qeyd edək ki, keçən ilin noyabrında da Kerç boğazında Rusiya ilə Ukrayna arasında insident olub. Həmin vaxt Rusiya su sərhədini pozduğunu iddia etdiyi Ukraynaya məxsus üç hərbi gəmini atəş açaraq saxlayıb. Gəmilərin göyərtəsində 24 hərbçi, o cümlədən Ukrayna Təhlükəsizlik Xidmətinin iki əməkdaşı olub. Məhkəmə onları sərhədi pozmaq ittihamı ilə həbs edib. Rusiya Prezidenti Vladimir Putin rəsmi Kiyevin bu hərəkətini Ukraynada gözlənilən prezident seçkiləri ərəfəsində təxribat kimi qiymətləndirib.
