Rusiya və Türkiyə S-400 raketdən müdafiə sistemlərini birgə istehsalı ilə bağlı danışıqlar aparır. Baki-xeber.com xəbər verir ki, bunu Rusiyanın silah ixrac şirkəti “Rosoboroneksport”un rəhbəri Aleksandr Mixeyev deyib.
A.Mixeyev S-400 sistemlərinin təslim edilməsi ilə Rusiya və Türkiyə arasında strateji əməkdaşlığın daha da gücləndiyini bildirib.
Mixeyev, rəhbəri olduğu "Rosoboroneksport” şirkətinin Türkiyə ilə helikopter mühəndisliyi, aviasiya və havadan müdafiə sistemləri sahəsində əməkdaşlığı genişləndirməyi planlaşdırdığımı qeyd edib.
Mixeyev, S-400-dən ortaq istehsalına bağlı danışıqlar prosesinin davam etdiyini deyib: "Ankara ilə S-400-ün müəyyən hissələrinin Türkiyədə istehsalı edilməsilə bağlı danışıqlar davam edir".
Rusiyanın dövlət müdafiə sənayesi şirkəti “Rostex”in sədri Sergey Çemezov da bir müddət əvvəl Anadolu Agentliyinə açıqlamsında, S-400 sistemlərinin müəyyən hissələrinin Türkiyədə istehsalı ilə bağlı danışıqların davam etdiyini demişdi: "Rəqiblərimizin əlaqələrimizə qarşı müdaxilə cəhdlərini müvəffəqiyyətlə aşa bilirik. Türkiyə ilə aviasiya, helikopter istehsalı və enerji sahələrində əməkdaşlığı genişləndirməyə hazırıq".
Bu arada, Türkiyənin Müdafiə Nazirliyi bəyan edib ki, Rusiya istehsalı S-400 sistemlərinin çatdırılmasının birinci mərhələsi başa çatıb. S-400-lərin ilk partiyasının tədarükü Ankarada yerləşən Mürtəd bazasına həyata keçirilib. Tədarük çərçivəsində ümumilikdə 30 təyyarə reysi həyata keçirilib.
Qeyd olunur ki, ikinci partiyanın da tədarükü Ankaraya olacaq.
Xatırladaq ki, iyunun 17-də rəsmi Vaşinqton Rusiya istehsalı olan S-400 zenit-raket komplekslərinin tədarükü ilə bağlı Türkiyənin"F-35" proqramından çıxarılmasına dair qərar qəbul edib. Ağ Ev vurğulayıb ki, Ankara tərəfindən zenit-raket komplekslərinin alınması ən yeni ABŞ qırıcılarının tədarükü ilə uyğunsuzluq təşkil edir.
Pentaqon rəhbərinin satınalmalar üzrə müavini Ellen Lord bəyan edib ki, Birləşmiş Ştatların Türkiyə ilə "F-35" proqramı üzrə əməkdaşlığı dayandırması nəticəsində rəsmi Ankara təxminən 9 milyard dollar investisiya almayacaq: "Türkiyə iş yerlərini və iqtisadi imkanları itirəcək. Türkiyə "F-35" təyyarələrinin 900-dən çox detalını istehsal edirdi və bunun üçün 9 milyard dollar investisiya alırdı".
Türkiyə Xarici İşlər Nazirliyi isə öz növbəsində ABŞ-ın rəsmi Ankaranı "F-35" tipli qırıcıların istehsalı üzrə proqramdan çıxarmasını birtərəfli və qanunsuz addım adlandırıb. "Bu qərar iki ölkə arasında strateji əlaqələrə bərpa edilməz şəkildə zərər vuracaq. "S-400" zenit-raket komplekslərinin "F-35" qırıcılarına təhdid təşkil etməsinə dair iddialar əsassızdır. Türkiyə tərəfinin bu məsələ ilə bağlı NATO-nun da iştirakı ilə bağlı təkliflərini ABŞ tərəfi cavabsız qoyub", - deyə Türkiyə XİN bildirib.
Nazirlik Türkiyənin "F-35"-lərlə bağlı proqramdan çıxarılması barədə qərarı ədalətsiz adlandırıb.
Digər tərəfdən Vaşinqton Ankaraya sanksiya tətbiq etməyi nəzərdən keçirir.
