Ustad Şəhriyar nə gözəl deyib: “Bilsinlər ki, adam gedər ad qalar, yaxşı-pisdən ağızda bir dad qalar”. Xoşbəxt o kəsdir ki, həm sağlığında, həm də dünyasını dəyişəndən sonra xeyirxahlığı dillərdə yaşayır. Tamahına əyilməyən, vicdanını satmayan hüquq-mühafizə orqanları əməkdaşları da həmişə hörmətlə qarşılanır, dünyalarını dəyişsələr belə xatirələri ehtiramla anılır.
Uzun illər daxili işlər orqanlarında çalışmış mərhum Əzizağa Kazımov işlədiyi müddətdə heç vaxt haqqı-nahaqqa verməyib. Onu tanıyıb-bilənlər, çiyin-çiyinə işlədiyi həmkarları, hətta istintaqını aparıb ədalət mühakiməsinə təslim etdiyi şəxslər də belə deyirlər...
1943-cü ilin 20 dekabrında Lənkəranda doğulub. Ordudan tərxis olunduqdan sonra Bakıya gəlib, daxili işlər orqanlarında xidmətə qəbul olunub. Çalışıb, oxuyub, universitetin Hüquq fakultəsinə daxil olub.
Universiteti əla qiymətlərlə başa vurandan sonra paytaxtda müstəntiq işləyib. Təcrübəli həmkarlarından istintaqın sirlərini öyrənib, ünsiyyətqurma bacarığını daha da təkmilləşdirib. Bu sahədə çalışan insanların müxtəlif psixologiyaya məxsus insanlarla, ayrı-ayrı sahələrin mütəxəssisləri ilə ünsiyyətdə olduğunu nəzərə alaraq, həmişə bilik və bacarığını artırıb, peşəkarlığı da artıb.
Xidməti ərzində ən müxtəlif sahələrdə qeydə alınan cinayətlərin istintaqını aparsa da, bir müstəntiq kimi, xüsusən oğurluq və quldurluq cinayətlərinin açılmasında mahir idi. Təkcə bunu demək yerinə düşər ki, 1979-1980-ci illərdə Oktyabr (indiki Yasamal) rayonunda mənzillərin quldurluq yolu ilə qarət edilib talanması halları artmışdı. Törədilmiş bu cinayət əməllərinin istintaqını ona həvalə etmişdilər. Təcrübəli müstəntiq bu cinayətlərin eyni qrup tərəfindən törədilməsini müəyyənləşdirib və 12 nəfərdən ibarət cinayətkar dəstə ifşa olunub. Təzyiqlər çox olsa da, işin xüsusatlarının hərtərəfli araşdırılması, bütün dəlil-sübutların üzə çıxarılması sayəsində günahkarlar cəzalarını aldılar, Əzizağa Kazımov isə vaxtından əvvəl “milis kapitanı” xüsusi rütbəsi ilə mükafatlandırıldı. Vaxt ötüb, zaman keçdikcə özü gənclərin hami-tərbiyəçisi olub, bu işin sirlərini onlara açıb. Təmiz əl, soyuq beyinlə apardığı istintaq işlərini məsuliyyətlə və vicdanla vaxtında başa çatdıran Əzizağa Kazımovun təcrübəsindən həvəslə bəhrələniblər. öz bilik və bacarığını, tövsiyələrini gənclərdən heç vaxt əsirgəməyib. Ehtiyacı olana həm maddi, həm də mənəvi dəstək olub. Onun haqqında xatirələrini bölüşənlər minnətdarlıqla qeyd edirlər ki, Əzizağa müəllim həmişə mütaliə etməyi xoşlayardı. Və həmişə polis əməkdaşlarının dünyagörüşünü artıran kitabları oxumağı məsləhət bilərdi. Bu gün onlardan bir çoxu DİN-də yüksək vəzifələrdə xidmət edir.
Polis mayoru Ə.Kazımov uzun illər səmərəli fəaliyyətinə görə “Milis əlaçısı”, “Qüsursuz xidmətə görə” döş nişanları, DİN-in “Fəxri fərman”ları ilə təltif olunmuşdu. AXC-Müsavat dövrünün qısa hakimiyyəti dönəmində qeyri-peşəkarların meydan suladığı vaxt xidmətdən uzaqlaşdırılsa da, sonradan 1994-cü ildə yenidən işə bərpa olunmuşdu.
Təqaüdə çıxdıqdan sonra da yenə işdən ayrılmamışdı. Ömrünün son günlərinə qədər Nərimanov RPİ-də Veteranlar Şurasının katibi kimi gənclərin peşəyönümlü biliklərinin artırılmasında, bağlı cinayətlərin açılmasında əlindən gələni əsirgəmirdi.
Yaşasaydı, 75 yaşı tamam olacaqdı...
Zeyni HÜSEYNOV DİN Mətbuat Xidmətinin əməkdaşı
