Azər Allahverənov: “Regionlarda yeni istehsalat sahələri yaradılması potensial işçi qüvvəsinə tələbat deməkdir, bu səbəbdən də urbanizasiya prosesində səngimələr baş verir”
Ölkə iqtisadiyyatının inkişafı istiqamətində görülən işlər sayəsində regionlarda sahibkarlıq fəaliyyəti genişlənir, yeni iş yerləri yaradılır. Görülən işlər bölgələrdən paytaxta gələnlərin sayına təsir edib. Artıq bu sahədə vəziyyət müsbətə doğru dəyişib. Belə ki, kənddən şəhərə gələnlərin sayı azalıb.
Qeyd edək ki, Azərbaycanda demoqrafik vəziyyət açıqlanıb. Dövlət Statistika Komitəsinin yaydığı məlumata görə, əhalinin 52,9 faizi şəhər, 47,1 faizi isə kənd sakinləridir.
Məlumat üçün bildirək ki, əhalinin sayının artımı urbanizasiya məsələsinə də öz təsirini göstərib. Belə ki, sosioloqların verdiyi məlumata görə, ötən illər kənddən şəhərə axın nisbətən çox idisə, bu il artıq azalma var. Yəni bölgələrdə, xüsusən də kəndlərdə sosial infrastrukturun inkişafı şəhərə meylliliyin azalmasına səbəb olub.
Ekspertlərin fikrincə, regionlarda daimi iş yerlərinin açılması, sosial təminatı yaxşılaşdırılması, həyat şəraitinin yüksəldilməsi, mədəni-intellektual mühit formalaşdırılması və digər hallar bölgələrdən paytaxta əhalinin axınının qarşısını alıb.
Miqrasiya məsələləri üzrə ekspert Azər Allahverənov “Bakı-Xəbər”ə açıqlamasında qeyd etdi ki, 2001-2002-ci illərdən etibarən bölgələrdən paytaxta insanların gəlməsi prosesi sürətləndi. Bunun da səbəbi Bakıda inşaat sektorunun inkişaf etməsi ilə bağlı idi: “Həmin ərəfədə çoxlu sayda bina inşa edilirdi. Eyni zamanda, neft-qaz hasilatı sənayəsində də yeni iş yerlərinin açılması bölgələrdən paytaxta gələnlərin sayına təsir edirdi. 2013-2014-cu illərdən sonra bu sahədə vəziyyət əks istiqamətə doğru dəyişdi. Manatın məzənnəsinin xarici valyutaya nisbətən dəyişməsindən sonra tikinti sektorunda vəziyyət dəyişdi. Bu, rayon əhalisinin paytaxtdan öz yurduna qayıtmasına səbəb oldu”.
Həmsöhbətimiz onu da vurğuladı ki, regionların inkişaf etdirilməsi ilə bağlı dövlət siyasəti müəyyən olunub. Xüsusən də qeyri-neft sektorunun inkişaf etdirilməsi prioritet sahə kimi seçilib. Bu sahədə də kənd təsərrüfatına böyük dəstək göstərilir.
Ekspertin sözlərinə görə, regionlarda yeni istehsalat sahələri yaradılır. Rayonlarda yeni istehsalat sahələrinin yaradılması isə potensial işçi qüvvəsinə tələbat deməkdir. Bu səbəbdən də urbanizasiya prosesində səngimələr baş verir. Hazırda insanların şəhərdən geri qayıdışı prosesi yaşanır: “Regionlara geri dönən insanlar daha çox aqrar sahədə fəaliyyət göstərmək istəyirlər. Məlumdur ki, dövlət bu sahəyə xüsusi diqqət göstərir. Sahibkarlıqla məşğul olmaq istəyənlərə kiçikhəcmli kreditlər verilir. Kənd təsərrüfatı məhsullarının ixracının sadələşdirilməsi insanların kəndə geri dönüşünə səbəb oldu. Bakıdan kənd yerlərinə qayıdanlar daha çox bildikləri, ənənəvi aqrar sahədə çalışmağa başlayıblar”.
Günel CƏLİLOVA
