İlqar Hüseynli: “Şadlıq saraylarında toy zamanı bu cür qanunsuz atəşfəşanlıqların qarşısının alınması üçün cərimələrin tətbiq edilməsi müsbət nəticələr verər” “Atəşfəşanlığı toydan sonra tüfəngatma adətinin davamı kimi qələmə vermək düzgün deyil, bunlar fərqli mahiyyət daşıyırlar”
Toy xalqımızın gözəl adətlərindən biri olsa da, son dövrlər milli toylarımızın təşkilində ənənələrimizə zidd elementlər, məqamlar özünü göstərməkdədir. Məlumdur ki, bir neçə ildir cəmiyyətdə, KİV-lərdə ən çox müzakirə olunan qondarma toy adətləridir. Bu adətlər bizə hardan gəlib, kimlər tərəfindən gətirilib, məlum deyil.
Müasir toylar “yenilik”lərlə müşayiət olunur. Toy sahibləri bir-birinin bəhsinə toyları daha səs-küylü keçirməyə çalışırlar. Elə bilirlər ki, toy nə qədər hay-küylü olsa, bir o qədər yaddaqalan olar. Bu gün toy adətlərimizin deqradasiyaya uğradılması prosesi baş verir. Ənənələr sıradan çıxarılır, onların yerini yad ünsürlər tutur. İndi toylarda atəşfəşanlıq dəbə minib, bir sıra insanlar toydan sonra atəşfəşanlıq edirlər. Bu da sözsüz ki, ətrafda yaşayan insanların narahatlığına səbəb olur. Toydan sonra şadlıq sarayında və ondan kənarda atəşfəşanlıq keçirilməsi heç də müsbət hal deyil.
Sosial sahə üzrə ekspert İlqar Hüseynli bizimlə söhbətində bildirdi ki, bəzi şadlıq saraylarında toydan sonra təşkil edilən atəşfəşanlıq insanların rahatlığını pozur. O hesab edir ki, gecə saat 24-dən sonra baş verən atəşfəşanlığın qarşısı alınmalıdır. Onun sözlərinə görə, şadlıq saraylarında, küçə və bayırda atəşfəşanlıq edilməsi müsbət hal deyil. İ.Hüseynli bildirdi ki, atəşfəşanlıq kimi insanların rahatlığını pozan hallar qanunla qadağan edilib, lakin bəzi vətəndaşlar və ictimai iaşə müəssisələri, şadlıq sarayları bu qadağanı nəzərə almaq istəmirlər. O vurğuladı ki, bu kimi hallar İnzibati Xətalar Məcəlləsinin müvafiq maddəsi ilə tənzimlənir. Ekspertin dediyinə görə, qanunda gecə vaxtı insanların istirahət hüququnu pozanların böyük məbləğdə cərimələnməsi də nəzərdə tutulur. “Bilirsiniz, Azərbaycanda pirotexniki vasitələrin satışı qanunla qadağandır. Sözsüz ki, hüquq-mühafizə orqanları, müvafiq dövlət qurumları bu qanunun tələblərinin pozulmasının qarşısını almalı, o atəşfəşanlığı təşkil edən şadlıq sayarlarını cəzalandırmalıdırlar. Bu kimi hallar qanunla qadağandır. Atəşfəşanlıqların qarşısının alınması üçün, mütləq mənada, qanunun tələblərindən istifadə edilməlidir. Bu gün pirotexniki məhsullar satan, ondan atəşfəşanlıq hazırlamaq üçün istifadə edən iaşə müəssisələrinə, şadlıq evlərinə cərimələr kəsilməlidir ki, onlar bir daha bu hala yol verməsinlər. Şadlıq saraylarında toy zamanı bu cür qanunsuz atəşfəşanlıqların qarşısının alınması üçün cərimələrin tətbiq edilməsi müsbət nəticələr verər” - deyə İ.Hüseynli bildirdi.
İ.Hüseynli, həmçinin, qeyd etdi ki, insanların bir-birindən fərqlənmək üçün toylarında atəşfəşanlıq etməsi bir dəb halını alıb. Bu dəbin heç də müsbət nələrsə vəd etmədiyini deyən İ.Hüseynlinin bildirdiyinə görə, bu, ətrafdakı insanlara psixoloji sarsıntılar, qorxu və həyəcan yaşadır. “Uşaqlı analar, uşaqlar, eləcə də yaşlı və xəstə insanlar bu atəşfəşanlıqdan ciddi əsəb gərginliyi keçirirlər. Ümumiyyətlə, atəşfəşanlığın yaratdığı səs-küy, eləcə də kimyəvi maddələrin ətrafa yaydığı xoşagəlməz qoxular insanlara hərtərəfli mənfi təsir göstərir. Düşünürəm ki, atəşfəşanlığın qarşısı alınmalıdır. Bəzən deyirlər ki, keçmiş zamanlarda toydan sonra kənd yerlərində tüfənglə havaya atəş açılardı. Bu, bütün xalq tərəfindən qəbul edilən bir ənənə idi. Atəşfəşanlığı toydan sonra tüfəngatma adətinin davamı kimi qələmə vermək düzgün deyil, bunlar fərqli mahiyyət daşıyırlar” - deyə İ.Hüseynli bildirdi.
İradə SARIYEVA
