Məhərrəm Zülfüqarlı: “Ölkəyə daimi yaşamaq üçün gələnlərin sayının artması müsbət məqamlardan xəbər verir”
Bu ilin yanvar-oktyabr ayları ərzində 2826 nəfər daimi yaşamaq üçün Azərbaycana gəlib. Bu barədə Dövlət Statistika Komitəsindən məlumat verilib. Sözügedən məlumatda qeyd olunur ki, Daxili İşlər Nazirliyi və Dövlət Miqrasiya Xidmətinin müvafiq qurumları tərəfindən daimi yaşamaq üçün Azərbaycana 2826 nəfər gələn, Azərbaycandan isə 1360 nəfər gedən qeydə alınıb, ölkə üzrə miqrasiya saldosu müsbət 1466 nəfər təşkil edib.
Dövlət Miqrasiya Xidməti əcnəbilərin və vətəndaşlığı olmayan şəxslərin olduğu və yaşadığı yer üzrə qeydiyyatı, ölkədə olma müddətinin uzadılması, ölkə ərazisində müvəqqəti və daimi yaşamaq istəyən əcnəbilərə icazənin, haqqı ödənilən əmək fəaliyyəti ilə məşğul olmaq üçün iş icazələrinin, sığınacaq axtaran əcnəbilərə qaçqın statusunun verilməsi məsələləri ilə məşğul olur. Eyni zamanda, vətəndaşlıq məsələlərinin həllində iştirak edir və qanunsuz miqrasiyaya qarşı mübarizə aparır. Miqrasiya proseslərinin vahid və çevik prosedurlar əsasında tənzimlənməsi, sənədləşmənin sadələşdirilməsi məqsədilə imzalanmış müvafiq Fərmana əsasən, 2009-cu il iyulun 1-dən miqrasiya proseslərinin idarə olunmasında “bir pəncərə” prinsipinin tətbiq edilməsinə başlanıb. Bu prinsip üzrə vahid dövlət orqanının səlahiyyətləri DMX-yə həvalə edilib.
Bütün bunlarla yanaşı, Azərbaycan iqtisadiyyatının inkişaf etməsi, insanların həyat səviyyəsinin yüksəlməsi ölkəyə yaşamaq üçün gələnlərin sayının artmasına öz təsirini göstərir. Bu baxımdan cari ilin 10 ayında 3000 nəfərə yaxın şəxsin daimi yaşamaq üçün ölkəyə gəlməsini ekspertlər necə şərh edirlər?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, belə bir tendensiyanın formalaşması müsbət göstəricidir: “Ölkəyə daimi yaşamaq üçün gələnlərin sayının artması müsbət məqamlardan xəbər verir. Bunun başlıca səbəbi ölkədə olan sabitliklə bağlıdır. İnvestisiya qoyuluşu günü-gündən artır. Yəni artıq Azərbaycanda yaşamağa üstünlük verənlər çoxdur. 1994-cü ildə imzalanan “Əsrin kontraktı” sazişindən sonra başlayan tendensiya yüksələ-yüksələ gedir. İqtisadi inkişaf o qədər cəlbedicidir ki, sözügedən sazişin vaxtı bir az da uzadıldı. Yəni bütün bunlar Azərbaycanda stabil mühitin olmasından və iqtisadi inkişafdan irəli gəlir. Ona görə də insanlar burada özlərini daha rahat hiss edirlər və gələnlərin sayında artım müşahidə olunur. Bu səbəbdən ölkəyə gələnlərin sayı daha çoxdur, nəinki ölkədən gedənlərin sayı. Bir məqamı da qeyd edim ki, Azərbaycandan gedənlər daimi getmirlər. Təhsil almaqdan ötrü ölkədən gedənlər var. Həmçinin, təhsil alıb Azərbaycanı başqa ölkələrdə təmsil edən insanlar var. Bunların da mütləq əksəriyyəti Azərbaycana bağlı olan insanlardır. Yəni qayıdacaqlar vətənə. Bir sözlə, sözügedən məsələ ilə bağlı açıqlanan statistik rəqəmlər məqbuldur. Azərbaycan dünya ölkələri sırasında bu cür vəziyyətlə yüksək imicə malik bir ölkə kimi özünü sübut edir”.
Vidadi ORDAHALLI
