“Ənənəmizə sadiq qalıb bu il də sizlərlə gənc əməkdaşları görüşdürdük. Bu görüş həm də keçmişlə gələcəyin, illərin və nəsillərin görüşüdür. Yaşı 50-ni, 60-ı ötən, hətta 70-i geridə qoyan sizlərin zəngin təcrübəsinə, bilik və bacarığına xidmətə yeni qəbul olunan, peşəmizin sirlərinə elə də dərindən bələd olmayan, çətinə, bərkə-boşa düşməyən gənclərin ehtiyacı var. Ömür də, xidmətdə bir estafetdir.
Bu estafeti etibarlı əllərə buraxmaq üçün dəyərli veteranlarımızın da üzərinə böyük bir məsuliyyət düşür. “Mən artıq veteranam”,- deyib əlini ağdan-qaraya vurmayan, ömrünün qalan hissəsini də gələcəyimiz olan gənclərin uğurlarının təməlinin daha da möhkəmlənməsi üçün sərf etməyənlərə, bilirəm ki, sıranızda yer yoxdur. Bunları ona görə belə ürəkdən deyirəm ki, İdarəmizin müxtəlif mövzularda keçirdiyi tədbirlərdə, vətəndaşlarla görüşlərdə bu gün burda olanlar və ya müəyyən səbəbdən gəlməyən veteranlarımız çox fəal şəkildə iştirak edirlər. Sizlərlə görüşlərin təşkil edilməsi, xoş ünsiyyətin yaradılması həm də Daxili İşlər Nazirliyinin rəhbərliyi tərəfindən qarşımıza qoyulan tələbdir”.
Bu fikirləri bu il də ilin yekunu ilə əlaqədar Xətai Rayon Polis İdarəsində polis veteranları ilə gənc əməkdaşların artıq ənənə halını almış görüşündə idarə rəisi, polis polkovniki Muradəli Babayev dedi. Ölkəmizdəki sabitliyin təminində hüquq-mühafizə orqanlarının, xüsusilə də polisin fəaiyyətinə diqqət çəkən rəis ölkəmizdəki sabitliyin davamlı olmasında, krimonogen durumun nəzarətdə saxlanmasında polis veteranlarının rolunu yüksək qiymətləndirdi və hesabat xarakterli çıxışında RPİ tərəfindən görülən işlərin qənaətbəxş olduğunu, rayon ərazisində törədilmiş ağır və xüsusilə ağır cinayətlərin üstünün açılmasının qısa zaman kəsiyində təmin olunduğunu qeyd etdi.
Bildirildi ki, Azərbaycanda dilindən, dinindən asılı olmayaraq, hər kəs sülh və əminamanlıq şəraitində yaşayır, ən ali dəyər kimi qorunub-saxlanan, əsasında Vətənimizi sevməyə çağırış olan mültikultiralizm gündən-günə inkişaf etdirilir.
DİN Veteranlar Şurasının sədri Fərhad Süleymanov belə tədbirlərin keçirilməsində xüsusi həssaslıq göstərən, həm peşə borcuna sadiq olan, həm də vətəndaş mövqeyi nümayiş etdirərək cəmiyyətdə baş verən bəzi neqativ halların qarşısının alınmasında, xüsusilə də DİN rəhbərliyinin diqqət yetirdiyi əsas prioritetlərdən biri kimi gənclərlə işin qurulmasında polis veteranlarının təcrübəsindən yararlanan, mütəmadi olaraq, məktəblərdə, müxtəlif əmək kollektivlərində belə vacib görüşlər təşkil edən İdarə rəisinə öz təşəkkürünü bildirdi.
Bakı Şəhər Baş Polis İdarəsinin mətbu orqanı-“Polis” qəzetinin redaktoru, polis kapitanı Elşad Hacıyev cəmiyyətdə polis haqqında müsbət rəyin formalaşmasında veteranlarımızın rolundan danışdı, onların ömür yolu haqqında “Mübariz keşikdə” və “Polis” qəzetlərində mütəmadi olaraq yazıların dərc edildiyini xüsusi vurğuladı.
BŞBPİ-nin Veteranlar Şurasının sədri Emin Məmmədov, Nərimanov RPİ-nin Veteranlar Şurasının sədri 85 yaşlı Paşa Kərimov və Xətai RPİ Veteranlar Şurasının sədri Nazim Xıdırov polis orqanlarının rəhbərlərinin veteranlarla işə verdikləri önəmin faydasından söz açdılar, ali diqqət və qayğıdan məmnunluğunu bildirdilər.
Gənc əməkdaşlar adından çıxış edən polis leytenantı Ülkər Talıbova veteran həmkarlarımızla mütəmadi keçirilən görüşlərin gənclərə stimul verməklə yanaşı, onların bilik və bacarıqlarına da müsbət təsir etdiyini dedi.
Tədbirə yekun vuran polis polkovniki Muradəli Babayev qarşıdan gələn Yeni il və Həmrəylik günü münasibətilə veteranları təbrik edərək, bundan sonra da Azərbaycanımızın inkişafı naminə var güclərini səfərbər etmələrinə inamını ifadə etdi.
Hafiz TƏMİROV polis mayoru
