Aydın Xan Əbilov: “Bu həm Azərbaycanın öyrənilməsində, həm də azərbaycanşünaslığın inkişafında böyük rol oynayır”
Tarixən əcnəbilər Azərbaycanı öyrənməyə böyük maraq göstəriblər. Orta əsrlərdə bu tendensiya əsasən tarixçilər, səyyahlar, şairlər tərəfindən həyata keçirilirdisə, müasir dövrümüzdə bu tamamilə yeni yaradıcı üsullarla reallaşdırılır. Hazırda dünyanın bir sıra ölkələrinin nüfuzlu ali məktəblərində azərbaycanşünaslıq kafedraları, mərkəzləri yaradılıb. Sözsüz ki, bu mərkəzlərin yaradılmasında Azərbaycanı sevən qüvvələrin və xaricdəki diplomatik qurumlarımızın rolu var.
Məlumatlara görə, Xarici İşlər Nazirliyinin Beynəlxalq İnkişafa Yardım Agentliyinin (AİDA) dəstəyi ilə Varşava Universitetində Azərbaycanşünaslıq Mərkəzi yaradılıb və artıq mərkəzin açılışı da keçirilib.
Son zamanlar ardıcıl olaraq xarici ölkə universitetlərində azərbaycanşünaslıq mərkəzlərinin yaradılmasının böyük əhəmiyyətə malik olduğunu qeyd edən ekspertlərin bildirdiyinə görə, bu, həmin ölkələrlə qarşılıqlı siyasi, humanitar, mədəni əlaqələrin yüksək səviyyədə inkişaf etdiyinin göstəricisidir.
Yeni Yazrlar və Sənətçilər İctimai Birliyinin sədri, yazıçı-kulturoloq Aydın Xan Əbilov “Bakı-Xəbər”ə bildirdi ki, bu tendensiyanın dünyada geniş miqyas alması müsbət haldır. “Sözsüz ki, Azərbaycanla, ümumiyyətlə, ölkəmizin öyrənilməsi ilə bağlı son illər dünyanın bir sıra ölkələrində olduğu kimi, Avropanın ali məktəblərində və beyin mərkəzlərində azərbaycanşünaslıq mərkəzləri yaradılıb, fəaliyyətləri gücləndirilib. Azərbaycan dövlətinin dünyada geosiyasi və geoiqtisadi gücünün, eyni zamanda, intellektual və mədəniyyət mərkəzi olaraq tanınmasında xüsusi rolu var. Eləcə də ölkəmizin bir güc mərkəzi olaraq Şərq və Qərbin qovuşduğu bir məkan olması onun nüfuzunun get-gedə artmasına səbəb olub. Azərbaycan yalnız Şimali Azərbaycanda yaşayan 10 milyonun vətəni deyil, o, 60 milyona yaxın soydaşımızın tapındığı, güvəndiyi bir dövlətdir. Bu gün Azərbaycan bütün dünya üçün maraqlıdır və ölkəmizin öyrənilməsi istiqamətində atılan addımlar bunu açıq şəkildə sübut edir. Xarici ölkə universitetlərində azərbaycanşünaslıq mərkəzlərinin fəaliyyətə başlaması o deməkdir ki, bizim tariximiz, mədəniyyətimiz dərindən öyrənilir, ölkəmizdə mövcud olan multikulturalizm və tolerantlıq mühiti, birgəyaşayışın Azərbaycan modeli təbliğ edilir”. A.X.Əbilov hesab edir ki, Azərbaycanı bütün dünya qəbul edir və bunun da nəticəsində Azərbaycan dilini, mədəniyyətini, etimiologiyasını, ictimai psixologiyasını, vətəndaş cəmiyyətini, ictimai-siyasi mühitini öyrənmək üçün bu cür mərkəzlər yaradılır. “Buna görə də dünyada Azərbaycanı tədqiq edən mərkəzlərin sayı bundan sonra da çoxalacaq. Əlbəttə, ölkəmizdə dövlət və ictimai qurumlar, Diasporla İş üzrə Dövlət Komitəsi xarici dövlətlərlə, onların ali məktəbləri və mərkəzələri ilə daha sıx əməkdaşlığa nail olmaq üçün addımlar atmalıdırlar. Bu mərkəzlərə elmi, bədii ədəbiyyat örnəkləri, materiallar göndərməli, Azərbaycan haqqında onlara məlumatlar verməlidirlər” .
Ekspert hesab edir ki, bu materiallar arasında elektron kitablar, bir sözlə, elektron resurslar üstünlük təşkil etməlidir. “Əlbəttə, bu həm Azərbaycanın öyrənilməsində, həm də azərbaycanşünaslığın inkişafında böyük rol oynayır” - deyə A.X.Əbilov bildirdi.
İradə SARIYEVA
