İlqar Hüseynli: "Bu da, nəticə etibarilə, direktorların əsasən qadınlardan ibarət olmasına şərait yaradır"
2015-ci ildə əyani tam orta təhsil müəssisələrində direktor vəzifəsində çalışan qadınların sayı ötən tədris ilə müqayisədə 32,1 faizə qədər artıb. Statistik göstəricilərə görə, əyani ümumtəhsil müəssisələrindəki qadın direktorların və müavinlərin sayı 1,8 faiz artıb.
Bundan başqa, Azərbaycanda hər 100 təhsil alana 47 qadın və 53 kişi düşür. Ötən tədris ili üzrə olan məlumatlara əsasən, dövlət orta ixtisas təhsili müəssisələrində qadın tələbələrin xüsusi çəkisi bütün tələbələrin 68 faizini təşkil edir. Qadınlar əsasən pedaqoji, səhiyyə, humanitar və sosial, mədəniyyət və incəsənət, iqtisadiyyat və idarəetmə ixtisasları üzrə təhsil alır.
Qeyri-dövlət orta ixtisas təhsili müəssisələrində tələbələrin çox hissəsini kişilər təşkil edir.
2015/2016-cı tədris ilinin əvvəlinə dövlət ali məktəblərində qadınların xüsusi çəkisi 49,7 faiz, kişilərin xüsusi çəkisi isə 50,3 faiz olub. Qadınlar əsasən pedaqoji, səhiyyə, qida məhsullarının texnologiyası, təbiət elmləri, eləcə də mədəniyyət və incəsənət ixtisaslarına üstünlük verir.
Bütövlükdə orta məktəb direktorlarının çoxunun qadın olmasını ekspertlər nə ilə əlaqələndirir? Sözügedən məsələni dəyərləndirən ekspert İlqar Hüseynli bunu bir sıra amillərlə, əsasən də əməkhaqqı ilə əlaqələndirdi: "Bakıda və digər böyük şəhərlərdə məktəb direktoru əsasən qadınlardır. Kəndlərdə isə əsas üstünlüyə kişilər malikdir. Yəni direktorların çoxu kişidir. Bir müddət əvvəl belə bir statistik məlumat yayılmışdı ki, orta məktəblərdə dərs deyən müəllimlərin 80 faizdən çoxu qadınlardır. Ayrıca Bakı üzrə götürdükdə isə, müəllimlərin təxminən 90 faizini zərif cinsin nümayəndələri təşkil edir. Buna görə hətta keçmiş nazir jurnalistlərə açıqlamasında oğlanların və kişilərin təhsilə gəlməsini daha çox arzu etdiyini demişdi. Bu məsələ dəfələrlə gündəmə gəlib və müxtəlif fikirlər səslənib. Təklif olunub ki, müəllimlərin heç olmasa 30 faizi kişi olsun. Fikrimcə, belə vəziyyətin yaranmasının əsas səbəblərindən biri əməkhaqqının aşağı olmasıdır. Evə əsas qazancı kişi gətirdiyi üçün, onlar da gəliri yüksək olan sahələrdə işləməyə üstünlük verir. Bu da, öz növbəsində, məktəblərdə qadın müəllimlərin üstünlük təşkil etməsinə gətirib çıxarır. Bu da, nəticə etibarilə, direktorların əsasən qadınlardan ibarət olmasına şərait yaradır. Hesab edirəm ki, müəllimlərin məvacibi yüksək olsa, sözügedən balans dəyişə bilər". Vidadi ORDAHALLI
