"Ölkəmizə müəyyən müddətə gələn əcnəbi həkimlər burada xəstələri öz ölkəsinə dəvət edir, orada daha yaxşı müayinə ediləcəyini deyir"
Qonşu ölkələrin həkimləri Azərbaycanda çalışmaq və xəstələri sağaltmaq üçün ölkəmizə gəlir. Xarici həkimlər ölkəmizə gəlməzdən öncə onların kütləvi informasiya vasitələrində geniş reklamı gedir. Bu və ya digər ölkənin həkiminin bir neçə gün özəl klinikaların birində xəstələri qəbul edəcəyi bildirilir.
Dərdinə dərman tapmaq istəyənlər həmin reklamlardan sonra yollanır həmin xəstəxanaya. Əcnəbi həkimin qəbuluna düşmək üçün öncədən 50 manat verməlisən. Daha sonra həkim xəstəni qəbul edir. Əcnəbi həkim xəstəyə müalicə yazır və deyir ki, dərmanları qəbul edib qurtarandan sonra gələrsən səni bir də müayinə edim. Problem elə bunda yaranır. Çünki əcnəbi həkimlər özəl klinikalarla bir neçə günlük müqavilə imzalayır. Müqavilə müddəti bitəndən sonra həmin həkim öz ölkəsinə qayıdır. Olan yenə də bizim xəstələrə olur.
Əcnəbi həkimlərlə bağlı bu günlərdə səhiyyə nazirinin müavini Elsəvər Ağayevin açıqlaması oldu. E.Ağayev media nümayəndələrinə açıqlamasında bildirib ki, bəzi hallarda Səhiyyə Nazirliyinin icazəsi olmadan xaricdən həkimlərin dəvət edilməsi halları olur. Onun dediyinə görə,
xarici həkimlərin Azərbaycana gəlib işləməsi Səhiyyə Nazirliyinin xüsusi komissiyası tərəfindən tənzimlənir: "Azərbaycanda fəaliyyət göstərəcək həkimlər diplomlarını Təhsil Nazirliyi tərəfindən təsdiq etdirir, sonra isə sənədlərini nazirliyə təqdim edir. Əfsuslar olsun ki, bəzi hallarda bundan yayınanlar da olur. Biz onları dəvət edirik ki, belə hallardan yayınmasınlar. Səhiyyə Nazirliyinin komissiyasından keçdikdən sonra həkimlərin fəaliyyətinə icazə verilir".
Məsələ ilə bağlı fikir bildirən professor, tibbi ekspert Adil Qeybulla qeyd etdi ki, xaricdən dəvət edilən həkimlər müalicə etdiyi xəstələrin sonrakı sağlamlığına cavabdehlik daşımır. Başqa sözlə, bir-iki günlük səfərlə müalicə etdiyi xəstələrin sonrakı taleyi bu həkimlər üçün önəm daşımır: "Azərbaycana dəvət edilən əcnəbi həkimlərin hansı dərəcədə mütəxəssis olması, hansı dərəcədə tibbi savada malik olması cəmiyyət üçün qaranlıq qalır. Çünki belə "mütəxəssislər" ya internet vasitəsilə, ya da təsadüfi tanışlıqla dəvət edilir. Onların tibb sahəsində hansı nailiyyətlər əldə etməsi isə nəinki sadə vətəndaşlara, heç özəl klinikaların özünə də bəlli olmur".
A.Qeybullanın sözlərinə görə, xaricdən yalnız bir neçə halda mütəxəssis dəvət oluna bilər: "İlk növbədə bundan Səhiyyə Nazirliyinin xəbəri olmalıdır və ya nazirliyin, ya nazirliyin hansısa qurumunun razılığı, təşkilatçılığı ilə həyata keçirilməlidir. Bunlar da o halda mümkün ola bilər ki, əcnəbi həkimin tətbiq etdiyi müalicə, yaxud cərrahiyyə əməliyyatını Azərbaycanda hələlik həyata keçirmək mümkün deyil və bu sahəni qaydaya, "rels"ə salmaq üçün həkim çağırıla bilər. Həmçinin təcrübə mübadiləsi məqsədilə də dövlət səviyyəsində əcnəbi həkimlər ölkəmizə dəvət edilə bilər. Lakin hər hansı bir özəl xəstəxananın istənilən həkimi dəvət edib, reklamını təşkil edib, bundan korporotiv maraqlar üçün istifadə etməsi qətiyyən düzgün deyil. Xeyli faktlar var ki, bu şəxslər öz ölkəsində aparıcı mütəxəssis deyil".
Həmsöhbətimiz onu da əlavə etdi ki, xaricdən dəvət olunmuş həkimlər arasında savadlı, öz sahəsini dərindən bilən həkimlər də az deyil: "Belə həkimlər arasında tanıdığımız mütəxəssislər də var. Amma təəssüflər olsun ki, yaxşı həkimlər qanundakı boşluqdan istifadə edən bəzi klinikaların dəvət etdiyi savadsız həkimlərin oduna yanır".
Professorun sözlərinə görə, bəzən ölkəmizə müəyyən müddətə gələn əcnəbi həkimlər burada xəstələri öz ölkəsinə dəvət edir, orada daha yaxşı müayinə ediləcəyini deyir: "Amma bir şey var ki, bu gün Azərbaycanda dünyada tətbiq olunan diaqnostik aparatların, demək olar ki, ən müasirləri var. Bəzi klinikalar ən müasir avadanlıqlarla təchiz olunub. Hətta Moskvada bəzən bizə deyirlər ki, Azərbaycanda tibbi diaqnostika baxımdan bizdən daha yaxşı aparatura var. Təəssüflər olsun ki, ən müasir avadanlığımız, Almaniyada, Türkiyədə uzmanlıq keçmiş milli kadrlarımız olsa belə, bəzən xəstələr onların həyata keçirdiyi əməliyyatlara etinasız yanaşaraq xaricə getməyə üstünlük verir. Bunun qarşısını inzibati yollarla almaq mümkün deyil. Bunun qarşısının almaq mexanizmi sığorta təbabətinin tətbiqindən, təbliğati işləri artırmaqdan, bölgü prinsipini dəqiqləşdirməkdən keçir ki, xəstə birbaşa mütəxəssisə ünvanlansın. Bunların tətbiqindən sonra hesab edirəm ki, hər şey yoluna düşəcək".
Günel CƏLİLOVA
