Cavanşir Əliyev: “Uşaqlar üçün nəzərdə tutulan vəsaitlərdə suallar qeyri-insani və şagirdlər üçün təhlükəli hesab edilir”
3-cü sinif şagirdlərinə verilən KSQ (Kiçik Summativ Qiymətləndirmə) imtahanındakı dərs vəsaitindən yayılan sual ciddi müzakirələrə səbəb olub. Sualda “Atam həyətdə .... doğrayır” cümləsi təqdim edilib və tapşırııq olaraq nöqtələrin yerinə cavab variantları kimi “odun” və “adam” ifadələri göstərilib.
Sosial şəbəkələrdə valideynlər tərəfindən yayılan bununla bağlı foto sərt şəkildə tənqid edilib.
Qeyd edək ki, KSQ imtahanındakı sualın uşaqların psixologiyasına mənfi təsir göstərə biləcəyi vurğulanaraq, “Adam doğramaq” variantının təqdim edilməsi gələcək nəsillər üçün potensial cinayətkarlığın aşılanması kimi qiymətləndirilib.
“Uşaqlar, məktəblilər üçün dərslik, vəsait, test tapşırıqları hazırlanarkən onların psixologiyası da nəzərə alınmalıdır”
Məsələ ilə bağlı Məktəbəqədər və Ümumi Təhsil üzrə Dövlət Agentliyindən bildirilib ki, paylaşım edilmiş hissə ümumi təhsil müəssisələrində istifadədə olan 3-cü siniflər üçün dərsliklərdə mövcud deyil: “Belə bir test tapşırığı təhsili idarəetmə orqanları tərəfindən ümumi təhsil müəssisələrinə təqdim olunmayıb. Mənbəyi məlum olmayan hər hansı çap materialının dərslik və ya tədris vəsaiti kimi ictimaiyyətə təqdim edilməməsi, həmçinin əsassız və dəqiqləşdirilməmiş məlumatların paylaşılmaması xahiş olunur”.
Məlum vəziyyətlə bağlı fikir bildirən təhsil eksperti Cavanşir Əliyev “Bakı-Xəbər”ə şərhində bildirdi ki, bəzi dərsliklər, uşaqlar üçün nəzərdə tutulan vəsaitlərdə suallar qeyri-insani və şagirdlər üçün təhlükəli hesab edilir: “Zaman-zaman bu kimi halların şahidi olmuşuq. Tapşırıqda “atam həyətdə ........ doğrayır” cümləsi təqdim edilib və tapşırıq olaraq nöqtələrin yerinə cavab variantları kimi “odun” və “adam” ifadələri göstərilib. Bu sualı, tapşırığı tərtib edən şəxs “adam” yazmaqla uşaqları zorakılığa, cinayətə çağırır. Düzgün cavab “odun” olsa da, orda “adam” sözünün olması uşaqların düşüncəsinə təsir edə bilər. İstənilən halda, uşaqlar, məktəblilər üçün dərslik, vəsait, test tapşırıqları hazırlanarkən onların psixologiyası da nəzərə alınmalıdır. Bu kitab bir neçə dəfə baxışdan, yoxlanışdan keçəndən sonra istifadəyə verilib. Bu o deməkdir ki, dərsliklərə nəzarət yoxdur”.
Günel CƏLİLOVA
