Fərid Həşimov: “Bu addım yol mədəniyyətini formalaşdırmaq, piyada və sürücü təhlükəsizliyini təmin etmək üçün vacib hesab olunur”
Məlum olduğu kimi, Azərbaycanda moped idarə etmək üçün sürücülük vəsiqəsi tələb olunacaq. Bu, Milli Məclisin ötən iclasında müzakirəyə çıxarılan "Yol hərəkəti haqqında" qanunda təklif edilən dəyişiklikdə öz əksini tapıb.
Qeyd edək ki, moped idarə etmək üçün A1 növündə sürücülük vəsiqəsi veriləcək.
Ekspertlər hesab edir ki, bu qərar moped istifadəçilərinin sayını azaldacaq. Nəzərə almaq lazımdır ki, moped istifadəçilərinin əksəriyyəti tələbələrdir və onların da vəsiqə almaq imkanları çox məhduddur.
“Bur çox gənclər mopedlə gündəlik qazanc əldə edir, kuryerlik və çatdırılma sahəsində fəaliyyət göstərir, onların bir qisminin vəsiqə almaq imkanı olmayacaq, bu da…”
Nəqliyyat eksperti Fərid Həşimov “Bakı-Xəbər”ə şərhində bildirdi ki, yeni qaydalar həm təhlükəsizlik, həm də intizam baxımından zəruridir: “Mühərrikli və sürəti 60 km\saatdan yuxarı olan nəqliyyat vasitələri qarşısında tələblər qoyulmalıdır. Mopedlərin dövlət nömrə nişanı ilə təmin edilməsi və qeydiyyata alınması vacibdir. Mopedlər digər nəqliyyat vasitələri ilə eyni hərəkət zolağını paylaşır. Bu halda onların xüsusi səs siqnalı, işıqları olmalıdır. Sürücülərsə mütləq şlem, kaska geyinməlidir. Bu onların özünün də təhlükəsizliyini təmin edir.
Onu da deyim ki, yeni qaydalar moped sürücülərinin məsuliyyətini artıracaq, lakin bu qərar bazar qiymətlərinə və xidmət xərclərinə də təsir göstərəcək. Uzunmüddətli baxımdan isə bu addım yol mədəniyyətini formalaşdırmaq, piyada və sürücü təhlükəsizliyini təmin etmək üçün vacib hesab olunur. Nəzərə almaq lazımdır ki, bir çox gənclər mopedlə gündəlik qazanc əldə edir, kuryerlik və çatdırılma sahəsində fəaliyyət göstərir. Həmin gənclərin bir qisminin vəsiqə almaq imkanı olmayacaq və ya ala bilməyəcək. Bu da onların dolanışığına təsir edəcək. İstənilən halda qeydiyyata alınmaq əlavə məsuliyyət yaradacaq. Moped sürücüsü biləcək ki, hər hansı qəza törədilərsə, hüquqi məsuliyyətə cəlb edilə biləcək”.
Günel CƏLİLOVA
