Eyyub Hüseynov: "İvanovka adı altında çoxlu aldatma mövcuddur"
Bakı şəhərinin Səbail rayonunda yerləşən “İvanovka” ticarət obyektində aparılan yoxlamalar kərə yağı adı ilə satılan məhsulların tərkibində ciddi uyğunsuzluqlar olduğunu üzə çıxarıb.
AQTA-nın məlumatına görə, satışdan götürülən yağ və süd məhsulları bitki yağları qarışığından ibarət olub və müvafiq sənədlər olmadan realizə edilib. Təkrar laborator sınaqlar isə həm yağlarda saxtalaşdırmanı, həm də kəsmikdə mikrobioloji çirklənməni təsdiqləyib.
Aparılan araşdırmalar göstərir ki, satıcıların kərə yağı adı altında bitki yağlarından ibarət qarışıqları alıcılara “təbii məhsul” kimi təqdim etməsi bazarda saxtakarlığın daha incə üsullarla genişlənməsinə səbəb olur.
Satışa çıxarılan kərə yağlarından Qida Təhlükəsizliyi Agentliyinin əməkdaşları tərəfindən nümunələr götürülərək laborator müayinələrə cəlb olunub. Sınaq nəticəsində kərə yağlarının tərkibinin bitki yağı və ya bitki yağları qarışığından ibarət olduğu müəyyən edilib. Məhsullar satışdan kənarlaşdırılıb, toxunulmazlıq aktı tərtib edilib və möhürlənərək saxlanca qoyulub. Təkrar laborator sınaq nəticəsində kərə yağı və kəsmik məhsulunun tərkibinin bitki yağı və ya bitki yağları qarışığından ibarət olduğu, həmçinin kəsmik məhsulunda mikrobioloji uyğunsuzluq (E.coli) müəyyən edilib.
Qeyd edək ki, “İvanovka” brendi ilə fəaliyyət göstərən başqa ticarət obyektləri də var. "İvanovka" adı ilə satışa çıxan kərə yağları dövriyyədən çıxa bilərmi?
"İvanovka” ticarət şəbəkəsi ciddi nəzarətə götürülməli və bu ad altında fəaliyyət göstərən və İvanovka kəndi ilə əlaqəsi olmayan marketlərin üzərindən bu ad götürülməlidir"
Azad İstehlakçılar Birliyinin sədri Eyyub Hüseynov "Bakı-Xəbər"ə açıqlamasında qeyd etdi ki, Bakı şəhərində 20-yə qədər “İvanovka” şəbəkəsinə daxil olan market var: “Əslində isə İsmayıllı rayonunun İvanovka kəndi ilə bağlı Bakıda sovetdən qalma 2 dükan var. AQTA məhz həmin dükanlardan birində ciddi nöqsanlar aşkar edib. Bu da o deməkdir ki, digər 20 dükanda vəziyyət daha acınacaqlıdır. İvanovka adı altında çoxlu aldatma mövcuddur. "İvanovka” adı ilə mənşəyi bəlli olmayan ağartı məhsulları satılır. Ümumiyyətlə, mal nişanlarından İvanovka sözünü götürməlidilər onlar. Çünki əhali bununla aldadılır. Yəni İvanovka sözü olmalı deyil. Üstəlik bu, coğrafi adlar haqda qanunvericiliyə də ziddir. Yəni İvanovka mal nişanı ilə mal buraxan bir müəssisə gərək İvanovka kəndində yerləşsin".
Günel CƏLİLOVA
