Araz Səmədağa oğlu Cəfərov 44 günlük haqq savaşımızda torpaq, Vətən uğrunda canını fəda etməklə adını qəhrəmanlıq tariximizə yazdı. Bu igid, qəhrəman oğlumuz Cəlilabad rayonu, Qarazəncir kəndində boya-başa çatıb. 27 yaşında əbədiyyət dünyasına qovuşmaqla özündən sonra gələcək nəsillər üçün böyük mənəvi sərvət qoyub. Bu sərvətdə Vətənə, onun daşına, torpağına ilahi bir sevgi yaşayır. Arazın ömür yolu nə qədər qısa olsa da, bizlərə əsl həyat məktəbi oldu. İllər keçəcək, amma onun ulduzlu dünyası heç vaxt nurundan düşməz.
Qəlbi Vətən eşqi ilə döyünən, doğma yurdun düşmən işğalında qalmasına dözməyən Araz Cəfərov orta məktəbi bitirdikdən sonra hərbi xidmətə yollanıb. Cəbhə bölgəsinin əsgəri olan Arazın mərdliyi, cəsurluğu, təlimlər zamanı çevikliyi ona hörmət qazandırıb. Ən böyük arzusu da məqamı gələndə məkrli düşmənlə sona qədər döyüşüb qisas almaq olub. Buna görə də o, elə həqiqi hərbi xidmətdə olanda taleyini orduya bağlamaq qərarına gəlib. Vətən borcunu ödəyib evə dönəndən cəmi bir neçə ay sonra isə yenidən MAXE kimi xidmətə başlayıb və daim ürəkdən bağlandığı işinin peşəkarı olmadan ötrü səy göstərib. Həmişə də cəsarəti, igidliyi, Vətənə bəslədiyi halal sevgisi Arazı əsgərlərin yanında başı uca edib. Özü də bir qayda olaraq böyük komandirlərin verdiyi bütün tapşırıqları vaxtında, dəqiq yerinə yetirib. İnanıb ki, Azərbaycan xalqı tezliklə düşmənə qalib gəlməklə bütün dünyanı heyrətə salar.
27 illik ömrünün 9 ilini ordu sıralarında keçirdən Araz Cəfərov Vətən müharibəsi başlanan ilk gündən həm peşəkar, həm də əsl qəhrəman kimi yağıya qarşı savaşa girib. Neçə-neçə ağır əməliyyatlarda erməni dığaların kabusuna çevrilməklə zəfərlə çıxıb. Hər dəfə də odun-alovun içinə atılanda Vətənin müqəddəsliyinə tapınıb. Adəti üzrə öndə olmaqla şəxsi fədakarlığı onunla döyüşdə olan əsgərlərin qəlbində qələbəyə böyük inam hissi yaradıb. İgid döyüşçünün yağı ilə son savaşı Laçın uğrunda olub. Müharibə meydanında ölümcül yaralansa da, yağı qarşısında əyilməyib, döyüşə-döyüşə müqəddəs şəhidlik zirvəsinə yüksəlib. Göstərdiyi şücaəti, mərdliyi isə dillərdə dastana dönüb.
30 il yağı tapdağında qalan Vətən torpaqlarının azadlığı uğrunda Araz Cəfərov ölümündən sonra Ali Baş Komandan tərəfindən "Vətən uğrunda", Qubadlının, Laçının azadlığına görə medallarına layiq görülüb. Qeyd edək ki, zəfər şəhidimiz ailəli idi, bir qızı və bir oğlu canından artıq sevdiyi Vətəninə, xalqına əmanət qalıb.
Zəfər ORUCOĞLU Azərbaycan Jurnalistlər Birliyinin üzvü
