Azərbaycanda 2023-2024-cü illər üzrə ov mövsümü bir ay öncə - fevralın 25-də başa çatıb. Ancaq hələ də müxtəlif restoranların menyularında quş ətindən olan yeməklərə rast gəlinir. Hətta menyuya salınan quşlardan bəziləri nəsli kəsilməkdə olan quş növləridir.
Hətta Bakının bazarları, yol kənarları, restoranlar və s. yerlərdə ov quşu və ov heyvanlarının açıq aşkar satışı həyata keçirilir,hələ bu azmış kimi, artıq çöl quşları sosial şəbəkələrdə də rahat və maneəsiz şəkildə satılır. Hətta müxtəlif növ çöl quşlarından kabab təklif edən restoranlar var. Qeyd edək ki, “Qırmızı kitab”a düşən nadir və nəsli kəsilməkdə olan heyvanların ovlanmasına görə isə qanunla müəyyən edilmiş qaydada cərimələr nəzərdə tutulub.
Maraqlıdır, qadağan olunmasına baxmayaraq bu quşlar necə ovlanır?
Elçin Sultanov: Çöl quşlarını özəl təsərrüfatlarda saxlayıb artırmaq istəyənlər çox azdır”
Biologiya üzrə fəlsəfə doktoru ornitoloq Elçin Sultanovun sözlərinə gör, yeyilən quşlar ördəklər və toyuqkimilərdir. Onların da 8 növündən sadəcə birinin - kəkliyin ov icazəsi var: “Çöl quşlarının özəl təsərrüfatlarda saxlayıb artırmaq istəyənlər çox azdır. Bu səbəbdən mədəni ov ölkədə yox dərəcəsindədir”.
Məhsəti Əliyeva: “Ovlanması qadağan olunmuş heyvanlar hələ də restoranlarda təklif olunur”
Qida mütəxəssisi Məhsəti Əliyeva “Bakı-Xəbər”ə açıqlamasında qeyd etdi ki, qanunla "Qırmızı kitab”a düşən heyvanların ovlanması qadağandır. Dövlət tərəfindən bəzi heyvanların, quşların, balıqların ovuna qadağa qoyulub. Ancaq buna baxmayaraq, ovlanması qadağan olunan heyvanlar, quşlar, balıqlar müştərilərə təklif olunur. Həmin restoranlar mütləq ifşa olunmalıdır: “Əslində hələ məlum deyil ki, restoranlar istehlakçıya qeyd edildiyi kimi çöl quşu yedirir, ya broyler toyuq. Aidiyyəti qurumlar bu məsələni diqqətdə saxlamalıdır. Ola bilər ki, restoran rəhbərliyi həmin heyvanın ətini xaricdən də gətirsin. Bu məsələ tam şəkildə araşdırılmalıdır”.
Günel CƏLİLOVA
