Məlum olduğu kimi, amerikalı milyarder İlon Maskın “SpaceX” şirkətinə məxsus “Starlink” peyk interneti artıq Azərbaycan üçün aktiv edilib. Bu barədə rəsmi məlumat “Starlink”in “X” platformasındakı səhifəsində paylaşılıb. Bildirilir ki, “Starlink”in yüksək sürətli və az gecikməli internet xidməti artıq Azərbaycan ərazisinin böyük hissəsində aktivləşdirilib.
Qeyd edək ki, “Starlink” orbitə buraxılan minlərlə peyk vasitəsilə dünyanın istənilən nöqtəsinə yüksək sürətli internet çıxışı təmin edir. Azərbaycanlı istifadəçilər “Starlink” xidmətindən yararlanmaq üçün “Starlink Mini Kit” və ya “Starlink Standard Kit” cihazlarından birini əldə etməlidirlər. Cihazların qiyməti müvafiq olaraq 340 və 670 manat, çatdırılması 50 manatdır. Xidmətin aylıq abunə haqqı isə 100 manat müəyyən edilib.
Artıq yeni peyk şəbəkəsi ilə bağlı sosial şəbəkələrdə müzakirələr başlayıb. Vətəndaşlar bu şəbəkəyə qoşulmaq üçün aylıq məbləğin minimum 80 AZN olduğunu, bu səbəbdən yerli provayderlərin də qiymətləri qaldıracağını güman etdiklərini bildiriblər.
Maraqlıdır, yeni peyk şəbəkəsinin Azərbaycan bazarında nə kimi perspektivi var? Ümumiyyətlə, bu qiymətlər Azərbaycan istehlakçılarının tələbinə uyğundurmu?
Natiq Cəfərli: “Starlink” peyk internetinin Azərbaycan üçün aktiv edilməsi yaxşı xəbərdir, ancaq qiymətlərin yüksək olması təəccüblüdür”
İqtisadçı Natiq Cəfərli “Bakı-Xəbər”ə şərhində bildirdi ki, “Starlink” peyk internetinin Azərbaycan üçün aktiv edilməsi yaxşı xəbərdir, ancaq qiymətlərin yüksək olması təəccüblüdür: “Azərbaycanlı istifadəçilər “Starlink” xidmətindən yararlanmaq üçün “Starlink Mini Kit” və ya “Starlink Standard Kit” cihazlarından birini əldə etməlidirlər. Məlumdur ki, bu cihazların qiyməti 340 və 670 manat, çatdırılması 50 manatdır. Xidmətin aylıq abunə haqqı isə 100 manat müəyyən edilib”.
Elvin Abbasov: “İnternetin gedib çatmadığı yerlərdə internetin istifadəsi üçün peyk texnologiyası çox əlverişlidir”
İKT üzrə ekspert Elvin Abbasovun sözlərinə görə, peyk texnologiyası ilə internet ənənəvi fiber-optik texnologiya ilə verilən internetə rəqib deyil. Peyk texnologiyası daha çox internetin əlçatmaz olduğu yerlərdə istifadə üçün faydalıdır: “Məsələn, ucqar bölgələrdəki əkin sahələri, torpaq zonaları və bu tip internetin gedib çatmadığı yerlərdə internetin istifadəsi üçün peyk texnologiyası çox əlverişlidir. Həm də turizmlə məşğul olan agentliklər, ucqar rayon və bölgələrə, dənizdə səyahət edənlər üçün peyk texnologiyası çox əlverişlidir. Çünki bəzən Azərbaycanın gözəl guşələrində şəlalələrin, yüksəkliklərin başına qalxan insanlar internet sarıdan əziyyət çəkirlər. Bəzən isə insanlar ucqar yerlərdə kempinq qururlar. Onlar üçün də bu texnologiya çox əlverişlidir. Fiber-optik bizim üçün nədirsə peyk texnologiyası da həmin xidmətdir və bu prizmadan məsələyə yanaşanda fiber-optik olan yerdə peyk texnologiyası daha baha olacaq və sərfəli olmayacaq. Məncə, qiymətlər də çox baha deyil”
Günel CƏLİLOVA
