Aytən Ələkbərova: “Bu günlərdə boşanma üçün yığıncaqların keçirilməsi gənc nəslin şüursuz düşüncələrindən irəli gəlir”
Günümüzdə aktual problemlərdən biri də zamanla boşanmaların sayının artmağıdır. Bu, xüsusilə yeni ailə həyatı qurmuş gənclər arasında baş verir. Boşanmaların sayı elə sürətlə artır ki, bunun qarşısının necə alınacağı artıq hər kəsi maraqlandırır.
Açıqlanan statistik rəqəmlərə əsasən, günə 60 boşanma hadisəsi qeydə alınır. Bu da vəziyyətin daha da pisləşməsindən xəbər verir.
Qeyd edək ki, əvvəl boşanma faciə, bədbəxtlik kimi qiymətləndirilirdi. Ancaq indi boşanan şəxs bunun şərəfinə tort bişirtdirib, üzərinə “boşandım” və ya “canım qurtardı” sözlərini yazdırır. Hətta boşandığı üçün parti keçirənlər də var. Demək olar ki, son zamanlar boşanma partilərinin sayı artıb. Bu partilərdə təmtəraqla qeyd edilir, ictimailəşir. Beləliklə də boşanma hadisəsi adi hala çevrilir və təbliğ olunur. Sanki artıq bir ailənin dağılması, nikahın pozulması bayram sayılır. Boşanma partisi ilə bunu insanların düşüncəsinə, beyninə azadlıq, bayram kimi qəbul etdirməyə çalışırlar.
“Biri boşanır, yığıncaq keçirir və bunu çəkib el-aləmə göstərir, baxanlar da görür ki, heç kim onu qınamadı, özü də həvəsə düşür”
Psixoloq Aytən Ələkbərova hesab edir ki, bunlar gənc nəslin şüursuz düşüncələrindən yaranır: “Bəli, o dövrdə qızı boşanan ailə dost-tanış içinə çıxmağa utanardı. Amma bu günlərdə boşanma üçün yığıncaqların keçirilməsi gənc nəslin şüursuz düşüncələrindən irəli gəlir. Bunların dəb halını alması isə psixoloji “qonşudan geri qalma” prinsipindən yaranır. Bir-birinə baxıb müəyyən addımları təkrarlayan adamlara aid etmək olar. Biri boşanır, yığıncaq keçirir və bunu çəkib el-aləmə göstərir. Baxanlar da görür ki, heç kim onu qınamadı. Özü də həvəsə düşür. Beləcə bu yığıncaqlar dəb halını alır”.
Günel CƏLİLOVA
